Ci commence la seconde partie du livre de l’avision christine la quelle parle de dame oppinion et de ses ombres.

Apres ces choses me sembloit que desireuse de plus avant enquerre aloye traçant par la cité d’athenes tant que m’embatoye entre les estudes/ lors joyeuse d’estre parvenue a si noble université voluntaire de mon sens par leur savoir prouffitablement imbuer/ m’arestoie entre les escoliers de diverses facultez de sciences disputans ensemble de maintes questions formant plusieurs argumens.

¶ Lors sicomme l’oreille vouloie tendre a escouter/ adont le sens de ma veue preceda cellui de m’ouye/ Car en haulçant mes yeulx avisay volant entre yceulx une grant ombre femenine sanz corps sicomme chose espirituelle de trop estrange nature et qu’elle fust merveilleuse l’experience prouvoit/ Car celle chose veoie estre une seule ombre/ mais de Cent mille milions voire innombrables parties les unes grandes/ les autres mendres autres plus petites de soy elle faisoit/ puis s’assembloient ses parties d’ombre comme par grans tourbes si que font nuees ou ciel ou oyselés volans par tas ensemble/ mais plus en y avoit que onques oyseaulx ne volerent. Si estoient ces tourbes sepparees les unes des autres ainsi comme les couleurs d’elles se differoient/ car de toutes les coulours qui onques furent et de plus que onques n’en fu estoient differenciees les unes des autres/ Car une grant tourbe en y avoit de toutes blanches une autre de toutes vermeilles/ les autres yndes autres de couleur de feu autres d’eaue/ et ainsi de toutes les couleurs/ Et se tenoient ensemble celles d’une couleur sicomme font oyseaulx d’une espece Toutefois aucune foiz avenoit que ilz s’entremesloyent/ mais tous jours retournoit chacune a sa couleur/ Et non obstant que une chacune couleur se tenist ensemble toutefoiz en y avoit en la route de plus fort taintes les unes que les autres/ se vermeil estoit l’une plus ardant/ l’autre plus palle/ l’autre plus sanguine/ & ainsi de toutes les couleurs si qu’a peine en y avoit une qui aucunement ne differat de l’autre/ Et tout ainsi comme les couleurs d’icelles ombres par tourbes se differoient semblablement faisoient leurs fourmes Car il n’est corps de creature humaine ne d’estrange beste/ oysel monstre de mer serpent ne chose que dieu formast onques voire des plus haultes choses celestielles et de tout quanque pensee peut presenter a la fantasie dont la n’y eust la fourme/ Si en y avoit tant d’estranges qu’il n’est cuer qui le peust penser mais fourmes de geans serpens orribles bestes ne chose mortelle tant ne m’espoventerent comme firent les orribles noirs deffigurez monstres d’enfer de la quelle remembrance encore suis toute espaourie.

Ci dit de quoy ces ombres servoient.

D’icelles tourbes d’ombres qui par l’air voloient je veoie tous avironnez les clercs disputans es dictes escoles/ et avant que cellui qui vouloit proposer sa question parlast/ une de ses ombres lui venoit s’acouter en l’oreille comme se elle lui conseillast ce qu’il devoit dire/ Et apres quant l’autre vouloit respondre ou repliquer/ une autre ombre lui aloit semblablement s’acouter/ Et ainsi n’y avoit la nul arguant qui ne eust autour de son chief ou une ou .ii. ou .iii. ou .iiii. ou plus grant quantité qui toutes le conseilloient/ mais chacune science a part avoit sa couleur d’ombres/ sicomme gramaire les verdes/ dyaletique les morees/ arismetique dyaprees/ musique blanches Geometrie vermeilles/ Astrologie les asurez/ theologie dorez philosophie cristalines & ainsi des autres sciences liberaulx et deffendues/ Et ceulx qui arguoyent n’avoient environ eulx tant que duroit la disputoison fors les ombres de la couleur qui appartenoit a la science de leurs argus mais non obstant que toutes traÿssent a une couleur/ ceulx qui proposoient plus fort taintes ou moins taintes que ceulx qui repliquoient les avoient si que nulle fois n’estoient sans difference/ et s’il avenoit que pareilles venissent aux parties qui disputoient/ adont estoient les .ii. disputans d’acort Si estoit la chose partie en telle maniere qu’il sembloit que ycelles ombres fussent cause de leurs descors et debas qui aucunefoiz tant multiplioit entr’eulx/ que de tieulx de chaude cole y avoit faisoient venir de verbis ad verbera/ Et pour ce que estrange chose pourroit sembler a ceulx qui oyent ou orront la descripcion de ceste avision en ceste partie la quelle les yeulx de mon entendement plus clerement veoit que expliquer ne sçay ne descripre que j’appelle ycestes choses ombres/ & si dis qu’elles avoient coulours diverses/ come se chose contredisant fust couleur et ombre estre ensemble/ si dy que ombres voirement ce estoient/ car estranges causes leur donnoient leur fourmes non mie d’elles mesmes les avoient/ Coulourees couvenoit que elles fussent. autrement point ne fussent/ mais transparans petites et grans si que on veoit par mi auques toutes estoient/ fors d’aucunes si troubles que l’en n’y veoit grain ne goute. Ancore plus/ car tout ainsi comme elles se dessembloient de couleurs/ semblablement faisoient de fourmes car comme j’ay dit devant de toutes les fourmes et choses qui pevent estre ymaginees avoient/ celles ombres empraintes/ Celles qui appartenoient a philosophie estoient comme fleurs de diverses façons et couleurs/ mais tant estoient de grant odeur et beauté que toutes les escolles en resplandissoient/ si que grant beauté d’i estre estoit/ les autres fourmes d’ombres comme de gens de bestes ou d’autres choses s’estendoient plus dehors les escoles et voloient par tout le monde/ car celles plus appartenoient a oeuvres manuelles & fais que en speculacion et plus estoient attribuees aux gens d’armes et ordre de chevalerie et autres ars mecaniques & ouvrables/ De tout ce me sembloit que avoie clere cognoissance/ mais sur toute chose m’esmerveilloit et fort a comprendre m’estoit ce que je veoye non obstant ces diverses parties d’ombre qui par tout le monde s’espandoient que toutefois n’estoit ce que l’image d’une toute seule ombre en la quelle toutes se refrappoient.

Comment l’ombre araisonna christine.

Adont comme je fusse ententive a regarder ceste merveille/ l’ombreuse creature s’en donna de garde et en telle maniere m’araisonna fille d’escole qui ça t’amaine et moy a elle/ dame aventure mais voz merveilles m’ont cy arrestee/ Et se je peusse moult voulsisse plus vous cognoistre/ Et elle a moy comment ne me cognois tu doncques/ dame je n’en ay pas recort/ et elle a moy O bien voy que ignorence tolt aux humains la cognoissance des objects de leurs oeuvres mais pour emplir ton desir Ottroy que tu me cognoisses pour ce par vehementes enseignes te seray magnifestee.

¶ Saches que tres que adam fu formez je fu cree/ Et suis fille de ignorence desir de savoir m’engendra Le premier homme & sa femme par mon exort decevable fis en la pomme mordre/ et apres ce que dieu l’ot pour ce meffait condampné a avoir sa vie en sa sueur/ je lui fis querre et encercher les proprietez des herbes et des plantes et lui appris la maniere des terres cultiver et les natures des choses crees lui fis esprouver tant qu’il les attaigni/ ensuivant apres je gouvernay les humains/ & leur fis prendre loy/ la quelle fu premiere celle de nature/ Et tres ces premiers aages furent aucuns soubtilz hommes aux quieulx tant fis encerchier qu’ilz trouverent philosophie et par consequant toutes les sciences & ars par moy furent premierement investiguees et la voye trouvee d’y attaindre/ ne nom de philosophe oncques trouvé n’eust esté se je ne fusse/ Sicomme plus a plain cy apres te declaireray/ Et non obstant que philosophie avec ses filles fust avant que moy/ et que fille de dieu soit/ si fus je faite aussitost que creé fu entendement humain/ et lui et moy ouvrismes la voye aux hommes de cler engin a la trouver a entendement premier et moy seconde/ si suis chamberiere d’elle en ce mortel monde/ car en paradis n’enfer n’ay je demeure/ ma duree sera jusques au derrain jour & lors finera. je rapporte les messages des hommes de cler entendement a philosophie et a ceulx qui apliquer s’i veulent je les fois par le moyen de diligent estude se ne leur tolt deffaute d’engin attaindre par investigacion a elle/ Et pource non obstant que par tout le monde soye me vois tu principalement en ses escoles hanter es quelles par l’occasion de moy avec le labour d’estude apprennent les clercs toutes sciences & sans moy apprises ne pourroient estre Et non obstant que de dieu viengne la grace d’en hault je suis celle qui la mes a oeuvre ou cuer de la personne & sanz moy riens ne proufiteroit Et te dis plus fort que se je n’estoie avec foy esperance et charité point ne seroit es humains.

Les choses que l’ombre disoit a christine.

Ancore te dis je que tous les anciens prophetes qui ont esté non obstant qu’ilz parlassent par inspiracion divine de l’advenement de jhesucrist et des temps avenir/ et mesmement saint jehan l’euvangeliste en l’apocalipse et tous ceulx et celles qui ont prophetisié se j’eusse esté en eulx contraire a leurs dis ja n’eussent saintement parlé des secrés divins/ mais affin qu’en moy tu n’erres & que mieulx m’entendes te dis que non obstant les choses dittes maint ont prophetisié verité es quieulx je n’estoye mie saine mais leur disoie au contraire de leur prophecie sicomme caÿphe qui dist de jhesucrist qu’il estoit expedient un homme mourir pour sauver le peuple/ Il dist verité mais ce n’estoit mie ou sens ou il le prenoit/ et pource estoye faulse en lui/ car je le faisoie follement cuider.

¶ Plus te diray de ma nature tres que creature humaine est nee si tost qu’entendement commence aucun petit a ouvrer en lui/ tantost moy et de mes plus legieres filles entrons en lui/ et au feur que l’enfant croist avec son entendement nous croisçons en lui pareillement & en celle croiscence selon ce que ses inclinacions se donnent je loge en lui de mes filles/ s’il est soubtil en speculacions je les lui baille teles qu’il lui fault et celles le font encercher plus avant de ce en quoy il est enclin/ Se enclin est aux armes teles qu’il lui fault les lui baille/ et celles le font encercher la maniere de excerciter les armes/ Se a oeuvres mechaniques marchandise/ ou labour de terre/ paindre/ escripre/ ou lengager pareillement selon les oeuvres par moy avec la inclinacion ou longue coustume d’enseignement/ toute personne prent ses meurs bons ou mauvais sages ou folz selon qu’il s’applique/ Si fais tout homme ouvrer parler aler et venir et sanz moy ne se mouvroit pour oeuvre faire Si me change souvent en eulx par divers accidens/ et fois souvent des bons mauvais/ et des mauvais bons/ les savans errer et dire faulx en divers cas/ et les simples aler droite voye et dire voir/ et selon que je sui en eulx je me donne a cognoistre par leurs oeuvres et parolles/ Se n’est en aucuns qui de faintise se cueuvrent/ toute foiz ce ne pourroient faire sanz aucunes de mes filles.

¶ Souventes foiz je deçois ceulx ou je habite par leur donner faulx a croire/ nil n’est si sage que souvent ne deçoive ne autrement ne pourroit estre selon le cours naturel.

¶ Je suis fondee sur ce que la fantasie rapporte a l’omme soit mal ou bien Si fois souvent faulx jugement et dis une chose estre bonne ou elle est mauvaise/ et ainsi l’opposite et pour ce fais haÿr et amer sans cause souvent advient et sans l’avoir desservi/ diffamer et aussi louer sans achoison souventes foiz.

¶ Es sages hommes suis plus certaine et plus vraye et es anciens de longue experience/ et pource a bonne cause sont appellez es conseulx des ordenances pollitiques Je suis naturellement plus vive et plus certaine en un homme que en un autre selon l’abilleté de son entendement le quel me rapporte en ses pensees Et en homme qui souvent me change est signe de pou constant et legier courage// Je ne suis nulle fois certaine/ car se certaineté y avoit/ ce ne seroie mie. Je dis souvent verité mais je la dis par couleur et informacion d’autre chose Et la gist en l’omme le sain jugement se la couleur est voir semblable et digne d’estre receue qui me fait parler/ Je ay proprieté de faire encerchier verité et de l’enquerir et fus faite pour celle cause/ mais aussi tost que elle est clerement trouvee de la chose que je fois querir adont couvient que celle mienne fille qui cause a esté d’ycelle verité attaindre se parte de la personne/ Mais g’i demeure avec plusieurs autres de mes filles qui pareillement s’en partent selon les veritez qui sont attaintes/ car la ou elle est nous ne povons arrester/ et si la faisons attaindre par labour d’encercher.

¶ Mes jugemens en nul cas riens ne valent se fondez sur raison ne sont Et cil qui parle ou oeuvre par moy ou sens n’est appellé il erre et abonde en folie J’ay comme dit est filles bonnes et mauvaises voir disans et menterresses/ mais se elles mentent ou dient voir n’est mie certaine la pensee qui en soy les a/ Combien que souvent grant foy y adjouste/ Et pour ce que je suis chose non certainement sceue peus tu appercevoir que moy avecques esperance sur le temps avenir par le moyen de vraye foy sommes cause du merite des vrays feaulx catholiques/ Si peus notter que pour cause que ainsi je me diversiffie et change vois tu ycy mes filles de diverses fourmes et couleurs Car n’est homme si sage qui en soy ne m’ait diversement/ la cause si est que ma mere ignorence ne laisse ou vaissel du corps pour sa groisseur l’ame du tout ouvrer selon sa soubtilleté/ Et pour ce couvient que moy qui composee suis de la nature de l’ame en tant que je suis speculative/ et de la nature du corps en tant que je suis ignorent soie et abite ou cuer de creature humaine mais es intelligences qui franchement voient verité & ont cognoissance des proprietez de toutes choses je ne suis ne n’abite ne nulle part se ignorence et entendement ne sont ensemble/ Et comme dit est homme n’est si sage qui n’ignore les causes du plus des choses/ et pour ce n’est il nul qui en moy ne varie/ mais pource que es moins parfais suis plus foible sont leurs raisons nices et reprouvees.

Encore de ce mesmes.

Et entens sainement encore de ma poissance/ je te dis que toutes les loys et secrés qui ont esté au monde/ puis son commencement exepté la loy escripte qui a moy se fu de dieu donnee Et puis celle de jhesucrist les quelles vindrent du ciel ou je n’ay nul repaire/ toutes les autres ay trouvees la loy de nature ou n’aouroient que un seul dieu qui fu premiere & bonne a qui bien la tenoit fu par moy trouvee Celles des payens d’aourer plusieurs dieux/ je donnay aux hommes de fol entendement/ et continuer leur fis par espace de moult lonc temps/ Et ancore plusieurs parties du monde je tiens en celle erreur. Je fis trouver a belus les premieres ydoles et a son filz le roy ninus aourer l’ymage de son pere Et combien que ne trouvasse la loy escripte/ car n’i sceusse attaindre/ fis je maintes foiz errer en ycelle plusieurs juifs qui par moy firent maintes mauvaistiez & felons fais Sicomme mesmement au peuple d’israel je conseillay faire un veel d’or et que ilz l’aourassent comme dieu/ et ou temps de abdon le prophete fis je au roy jheroboam semer la faulce creance contre dieu et sa loy/ et ainsi de mains autres/ mais aussi continuay je les bons en oeuvres meritoires// En la loy de grace je n’oz que veoir/ car elle est certaine/ mais a cellui qui en fu acteur je fis par le moyen d’envie maintes peines faire & aussi moyennant grace divine/ maint convertir a sa loy/ mais tout fusse je cause de sa mort toute fois contre moy fu par paour jugez a tort/ et ycelle envie et mauvaistié pareillement m’avoit fait ficher ou temps devant es cuers de ceulx qui persecuterent les sains prophetes et aussi en ceulx qui martirerent les benois sains Je fis trouver a mahommet la faulce loy qui ores est a esté et sera pour la punicion des crestiens continue/ si tiens les sarrasins en celle faulce creance.

¶ Par moy se ficherent le temps passé en plusieurs du nom chrestien diverses erreurs en la loy et folles creances qui fortes furent a esracher Sicomme il appert de manés le faulx herite qui trouva la secte de ceulx que on appelloit manichees/ et Arrianus qui ediffia l’eresie arrienne/ et es parties de bretaigne pelage qui par sa faulce doctrine plusieurs chrestiens corrompi/ un autre vers espaigne nomme precelin et plusieurs autres/ en qui je fus faulce et en leurs disciples que je fis errer/ Et mesmement plusieurs papes et patriarches et de divers estas de l’eglise/ Et ancore ne suis si de tous esrachee en mains faulx pas que non obstant les vrays amonnestemens de sainte theologie je ne soie en eulx avec erreur tappie/ et couverte mais paour de feu nous fait tenir coye et close.

Ci dit l’ombre les oppinions de philosophie sus le principe du monde.

En repliquant ce que devant est dit pour donner preuve que si sage ne soit que je ne face errer parlerons des anciens philosophes quelle je fus en eulx/ Et comme le traictier de ceste matiere/ tout soit elle soubtille puisse estre au prouffit de l’entendement t’en deviseray plus largement en lengage plus couvert comme la matiere le requiere/ te diray premierement des tres ancians investigueurs des choses naturelles A ceulx qui premierement philosopherent/ je disoie que des natures des choses yceulz sont seulement les princippes qui sont ramenez a cause de matere/ et a ce que plus leur fust ce apparant teles raisons leur faisoie investiguer que .iiii. condicions semblans appartiennent aux raisons des princippes/ premierement disoient ilz comme ce de quoy aucune chose est faite/ semble le principe estre d’icelle chose/ Car c’est vray signe de princippe par qui la chose est faite et tel est la matiere/ Car de matieres toutes choses sont faites. Item car tout ainsi que ce dont les choses sont faites nous disons le princippe de l’engendrement d’elles et par consequant cause/ en tant que generacion toute chose precede a estre a ce que elle est/ ne ainçois elle n’est riens. Et toutefoiz de matiere premierement comme de son princippe chacune chose est faite/ car la matiere precede la formacion des choses Et aussi la matiere premierement non pas acidentelement est le suppost des formes par quoy ancore appert que elle soit vray principe il s’ensuit que matiere soit princippe des choses/ Tiercement car comme de toutes choses ce semble le principe ou quel finablement toutes elles retournent Car sicomme les principes sont premiers en la composicion/ aussi doivent ilz derreniers estre en resolucion & autressi ytel en la matiere Quartement comme il faille les princippes demourer/ ce par especial semble estre vray principe qui en chacune generacion/ et apres toutes corrupcion demeure/ dont comme la matiere la quelle ilz afferment substance des choses soit tele que elle demeure en toutes mutacions/ Combien que aucunes passions se varient en elle/ et en elle autressi toutes les autres condicions devant dictes affierent. Par ces .iiii. premisses ilz concluoient que la matiere est l’element et le premier principe des natures des choses ainsi disoient que riens ne peut estre simplement corrompu ne engendré Car tout ainsi se disoient ilz que quant aucune mutacion est faite envers quelconques passions/ toute foiz demeurent l’essence principal/ nous ne disons ycelle chose n’engendree simplement ne corrompue aussi fors selon aucune chose c’est a dire accidentellement sicomme un homme blanc devenir noir/ nous ne disons ycellui homme engendré quant il prent tel abit ne corrompu quant il pert le premier/ Car sa substance principal si demeure/ c’est assavoir son estre le quel si est sa fourme tout autressi que la matiere disoient/ il est la substance des choses/ et ycelle demeure permanablement/ Tout autressi ilz concluent que rien n’est simplement corrompu ne engendré fors accidentelement/ mais disoient ilz toutes mutacions qui adviennent es choses sont faites vers aucuns accidans venans de la matiere comme sont passions ou quelques qualitez/ Dont combien que tous yceulx couvenissent ensemble en mettant la matiere comme cause premiere/ Toutefoiz les faisoie differer doublement en la posicion d’elle C’est assavoir quant a pluralité/ car les aucuns mettoient une seule matiere et les autres plusieurs causes materielles/ et quant a l’espece aussi/ Car aucuns l’eaue mettoient/ les autres l’air/ les autres le feu Thales l’ancien philosophe qui prince fu de ycelle philosophie/ disoit que ce estoit l’eaue et affermoit la terre estre assise sur l’eaue ainsi la mettoit le principe des choses/ et dist que ainsi estoit fondee la terre dessus comme le effaict est fondé sur la cause/ dont il est a savoir que cestui thalles fu dit prince de ycelle philosophie/ Car comme il fust l’un des .vii. sages qui plus proprement furent dis theologiens/ poetes/ lui tout seul se transporta a considerer les causes & les princippes des choses/ Les autres seulement demourez occupez es moralles sciences/ Les noms d’iceulx .vii. sages sont premierement Chales millesien qui fu du temps romulus cellui qui fonda romme ou temps d’achar le roy d’israel comme on lit es croniques environ .vi.^c .lxxxvii. ans devant l’incarnacion jhesucrist & devant aristote environ .CCC.lii. ans/ Car aristote fu du temps alixandre le grant qui preceda jhesucrist .CCC.xxxv. ans/ Cestui thales fu astrologien/ Car meismes comme on lit il pronostiqua un deffault du souleil ou temps d’ozias et des fondacions de romme bien cent ans ains que il fust Cestui aussi fu cil dont on lit en l’istoire des philosophes qui chaÿ en la fosse quant il aloit veoir le cours des estoilles/ de quoy il fu remprouvé d’une vielle/ Comment dit elle cuides tu veoir ce que l’en fait ou ciel/ quant a tes piez ne vois.

¶ Le second sage fu pitacus mitilenus ou temps que es ebrieux regnoit zedechias et es rommains tharentin le premier/ le quel pithacus tua frenon d’aches qui batailloit a lui.

¶ Les autres .v. si furent solon d’athenes qui fu faiseur des drois & des loys populaires/ Chilon lacedemonien/ pithidorus corintien/ cleobelus sydien Byas periandran/ Et furent tous ou temps de la chetiveté de babiloine/ Et en ce temps ci en bretaigne la grant raignoit cordeille fille du roy loyr de bretaigne & femme d’agampus le roy de gaule/ le quel agampus a l’instance de elle subjugua et conquesta bretaigne occuppee par les serourges d’elle qui chacié en avoient son pere/ si en chaça yceulz et le royaume au pere restitua au quel puis succeda ycelle cordeille Comme plus a plain il appert par les gestes.

Ancore de ce mesmes.

Dont entre yceulx .vii. sages thales tant seulement specula la nature des choses/ et ses disputacions et les raisons qu’il fist il envoya par lettres en diverses contrees la quelle chose nul des autres ne fist pour ce fu il entr’eulx appellé prince de leur philosophie Les raisons qui murent Chales a dire ce qu’il disoit estoit qu’il veoit le nourrissement de toutes choses estre moisteur/ et par .iii. signes prouvoit son propos le premier est ce qui est dit c’est assavoir que toutes choses vivans par moisteur sont nourries/ mais ce disoit il comme ce soit une semblable chose de quoy les choses sont & a quoy elles viennent/ Et ainsi humeur semble estre le principe des essences des choses/ le second signe est que comme l’essence de toutes choses vivans tres grandement soit conservee et gardee par sa propre et naturelle chaleur/ Toutefoiz la chaleur semble faite et nourrie de humeur Car humeur est aussi comme nourrissement et matiere a chaleur/ il appert et s’ensuit que humeur soit principe des choses.

¶ Le tiers signe comme la vie de tous les animaulx soit gardee en humeur/ car par le deffault de naturelle humeur chacun animal meurt/ et par la conservacion d’elle chacun animal vit/ par quoy comme vivre soit estre aux choses qui ont vie comme il fu dit devant il appert qu’il s’ensuive que humeur soit principe des essences des choses/ & ces .ii. signes deppendent l’un de l’autre Aussi il prent signe par la generacion des choses/ Car ce dit il comme toutes generacions par especial des choses qui ont vie/ lesquelles sont tres nobles et parfaictes sur toutes autres choses soient faites de semences/ lesquelles semences ont escailles sont de nature moiste sicomme chacun scet/ il appert ce dist il humeur estre princippe des generacions des choses Cestui Chales estoit induit a ceste oppinion par l’auctorité des anciens/ car comme aucuns poetes theologisans/ eussent esté ancore plus anciens de lui Et yceulx eussent tele oppinion de nature/ c’est assavoir que l’eaue fust principe des choses/ yceulx peut estre pour l’ancienneté d’eulx thales si ensuivi.

¶ Si est cy a savoir que comme les premiers en grece renommez de sciences fussent appellez poetes theologisans/ ainsi diz poetes Car de ce qu’ilz disoient ilz formoient dictiez & parloient faintement/ theologisans aussi qu’ilz parloient des dieux et des choses divines/ les premiers et les plus principaulx renommez d’iceulx furent .iii. c’est assavoir orpheus et son disciple museus/ et linius de thebes qui fu maistre de hercules/ Et ces .iii. furent ou temps des juges qui regnoient ou peuple de israel environ. .v.^c .xxvii. ans/ avant que chales fust/ environ .xliii. ans avant que theseus le roy d’athenes ravist helayne la fille au roy de thebes environ .lxxxviii. ans ains que troye fust destruite/ Et de tous yceulx .iii. orpheus fu le plus sollempnel/ Et cestui fu cellui dont les poetes parlent qu’il ala en enfer querir erudice sa femme la quelle le serpent avoit pointe en fuyant par le pré quant euristus le frere orpheus la vouloit violer la quelle fable a bon entendement moral peut estre entendue Sicomme fulgence ou livre des natures des dieux tres clerement l’expose/ De cestui orpheus aussi parle boece ou .iii.^e de sa consolacion a la fin et ovide en methamorphoseos ou .x.^e/ Cestui orpheus aussi a parler proprement sanz nulle ficcion si que boece recite en sa musique estoit tres bon cithariste C’est a dire tant melodieusement faisoit sons en la harpe/ que par les proporcions des acors tant a point ordenez il garissoit de plusieurs maladies/ et les tristes faisoit estre joyeus.

¶ Ces .iii. poetes dis par maniere de fictions & de paroles transumptives parlans des choses de nature disoient que occean c’est a dire la mer ou l’abeisme ou a tres grant inundacion d’eaues/ Et thetis qu’ilz disoient la deesse de humeur sont parens de generacion/ Et par ce dist il comme par singuliere similitude ilz donnoient entendre que eaue fust le principe de la generacion des choses/ Encore ceste sentence par autre fabuleuse narracion ilz couvroient disant que le sacrement et le serment des dieux estoit par l’eaue qu’il appellent stix/ La quelle est un fleuve d’enfer/ Et par ce que ilz disoient les dieux faire leurs sacremens & leurs sermens de l’eaue pour ce que sacrement se fait tous jours par ce qui est plus digne/ Car le parfaict precede l’imparfaict de nature et de temps ilz se donnoient a entendre que l’eaue fust plus honorable et plus digne des dieux/ Et dont comme il appere qu’ilz cuidassent l’eaue premiere et plus ancienne des dieux/ lesquieulx dieux peut estre ilz entendoient estre les corps du ciel ou autres corps sensibles/ Car ancore des choses sepparees n’avoient cognoissance/ Il dit que nulle plus ancienne oppinion de ceste n’a esté es choses de nature/ La quelle soit cogneue/ meismement ancore ceste oppinion a esté nagaires d’aucuns renouvellee/ non pas qu’ilz deissent l’eaue plus noble ne si noble que dieu comme yceulx premiers firent/ mais sans ficcion aucune ilz la disoient & affermoient estre premiere & aussi la derreniere des choses de ce monde/ car meismes ilz la mettent premiere que le ciel/ Car la premiere espere/ c’est assavoir une que ilz ymaginent comprendre La .ix.^e ilz la mettent estre eaue Sicomme plus plainement frere rogier bacon le recite en son livre du ciel ou .xii.^e chapitre/ Et peut estre a ce ilz se mouvoient cuidans les vieulx poetes accorder avecques eulx/ ou peut estre pour les diz des philosophes nommans en plusieurs lieux les eaues sur le ciel/ Toutefoiz tant yceulx philosophes que aussi les poetes en tant comme a bon sens se puissent ramener au moins le plus des choses en enveloppement et soubz ombre parlerent non les nouveaulx mais yceulx anciens en tant que des sciences les portes vous ouvrirent vous les devez excuser amer et supporter.

Les contre dis d’aristote aux autres philosophes.

Aristote qui lonc temps fu apres ou quel je fus tres vraye et certaine par le moyen de son noble engin et entendement qui moy et mes filles attrey les plus soubtilles impugnatables/ & les autres poetes non mie les impugna en tant comme poetes/ mais en tant que ilz semblent philosophes/ et sont hors de verité/ aussi recite il d’ippones/ le quel sicomme maisme il recite sur le livre de l’ame/ fu de tres rude engin/ car il mettoit l’ame des bestes et des hommes estre eaue/ Cestui dit il suivi du tout thales sanz lui riens adjouster/ Et pource dit il nulle louange ne nul pris n’en doit recevoir.

¶ A autres philosophes je dis et fis a croire que l’air estoit principe de toutes choses si comme a dyogenes & anaximenes/ et disoient que l’air estoit premier de l’eaue Et principe de toutes choses simples/ c’est a savoir des elemens/ Si est a savoir que .ii. anaximenes furent et tous .ii. philosophes C’est assavoir l’un du temps aristote/ Et de cestui il n’entent pas ycy/ mais cestui anaximenes dont il fait mencion fu disciple d’anaxamandra qui disciple avoit esté thales devant dit/ Et cestui anaximenes & anaximendra furent du temps que cirus conquist le royaume de mede/ et transporta aux persens ou temps de la destruccion du temple de jherusalem/ En ce temps cy aussi c’est assavoir ou temps d’anaximenes regnoit tarquin l’orgueilleux. Le .vii.^e et le derrenier roy de romme/ cellui qui fu chacié pour tarqui son filz qui viola lucrece/ cellui aussi fu disciple d’anaximenes/ Toute foiz tant de difference ont ilz qu’anaximenes mettoit l’air simplement principe se non en tant que composé il fust avec raison divine/ Et de ce vint une oppinion qui est recitee sur le premier de l’ame/ Et la raison peut estre fu tele qui les mouvoit Car ilz veoient que par respiracion d’air la vie de plusieurs animaulx au moins du plus des bestes est sauvee/ Et sanz air elle est anichilee/ Et aussi car ilz veoient par imitacion & ensuite de l’air varier les generacions et les corrupcions des herbes et de plusieurs des choses.

¶ .ii. autres philosophes c’est assavoir ypassus et eraclitus mirent le feu estre principe et matere des choses et peut estre furent meus a ce pour la soubtilleté et noblece qu’il a/ Car meismes pour ce que ilz le veoyent luisant et monter contre mont/ ilz cuidoient le ciel estre de feu/ Cestui eraclitus/ pittagoras/ democritus et anaxagoras & plusieurs autres furent tous en un temps/ C’est a savoir ou temps que prophetisoient/ en judee/ aggenus/ zacharias/ et malechias/ ou temps du dit cirus.

¶ Cestui eraclitus sicomme il avoit oppinion ou feu quant aux principes & causemens des choses ainsi comme on lit fu tout le premier de tous les anciens qui par maniere d’art trouva deviner ou feu/ et celle art que on dit piromancie/ Et sicomme on lit en aucuns traictiez d’elle/ lui lonc temps ainçois pronostiqua la desolacion de babiloine la cité devant qu’elle fust avenue.

¶ Ainsi diversement mirent yceulx le principe de matiere/ C’est assavoir d’eaue d’air & de feu en y adjoustant le quart element/ c’est assavoir la terre ilz en disoient toutes choses causees/ et les disoient estre incorruptibles & ingenerables/ sicomme faisoient ceulx qui mirent un principe/ mais il metoit que par l’assemblement d’entre eulx selon diversité de plus ou de moins se causoient les diversitez des choses qui se font.

¶ Dont combien que anaxagoras fust ainsné d’empedecles en temps/ toutefoiz fu il plus novice en savoir/ Car comme un chacun abregier doye a son povoir les principes des choses par quoy moins en deust avoir mis que ne fist empedocles le quel en mettoit trop sicomme plus plainement il appert ou premier de phisiques/ Cestui ancore pour les accroistre les mist infinis/ c’est assavoir car il disoit les elemens et toutes choses estre faites d’infinies petites parties/ lesquelles il mettoit estre les drois princippes & mettoit les choses estre engendrees & corrompues par congregacion & disgregacion/ c’est a dire par assemblement & desassemblement d’icelles N’autrement ycelles ne pourissent ainçois pardurablement demeurent/ Dont par les choses ja dictes de Aristote conclut que par anaxagoras et par les oppinions des jadis philosophes on ne peut autre chose cognoistre fors seulement la cause de matiere.

Encore des oppinions.

Pittagoras disoit les esperes qui sont menez ou ciel estre dix. Combien que tant seulement .ix. en soient apparans/ c’est a savoir .vii. comprises par les mouvemens des planettes/ l’uitieve par le mouvement des estoilles/ et la .ix.^e par le mouvement journal qui est le premier mouvement/ mais pittagoras adjousta la .x.^e antixthonan c’est a dire menee au contraire des mouvemens/ et par consequant sonnent contrairement/ Car comme il mist & aussi le mirent plusieurs autres que des mouvemens des esperes du ciel se facent armonies Car comme ilz considerassent que naturellement noz pensees lesquelles ilz metoient de nature celeste se resjouissent de sons qui sont par mesure ordenez/ considerans aussi que tous sons sont de mouvemens causés/ Car sanz mouvement nul son ne seroit fait voyans ou ciel esperes et cercles de diverses grandeurs preporcionnees les unes vers les autres ce leur sembloit par moult nobles mesures et meues aussi de mouvemens couvenables a elles ymaginans par ces choses ou ciel estre grans melodies/ lassus ilz affermoient estre parfaicte musique/ et celle de ça bas estre dirivee de celle de lassus Et aussi selon ceste leur ordenance le mouvement journel qui va d’orient en occident au contraire des autres seroit en l’espere .x.^e & la .ix.^e seroit celle la quelle si mouvroit toutes les esperes basses au contraire du premier mouvement.

¶ Pittagoras et ceulx de sa secte par lui instruis mettent les principes des choses encheans es causes dessus dictez/ si mettent nombres ainsi que matere et princippe des choses et les passions des nombres ainsi comme les passions ou les abis des choses/ si que nous entendions par passions accidens/ legierement passibles et par abis accidens permanens/ sicomme ilz mettoient que la passion d’aucun nombre selon la quelle il est dit pareillement per estoit princippe de justice pour l’equalité de sa division Car tout nombre qui equalement se devise par egales moitiez sicomme .viii. se devise en .ii. quatre & quatre/ en deux deux/ et .ii. unitez et plusieurs autres par semblable maniere/ yceulx ilz disoient princippes de justice/ Et par semblable maniere les autres accidens des choses ilz assimuloient aux accidens des nombres & mettoient les principes des nombres per et non per/ pour ce qu’icelles sont leurs premieres differences mais le nombre per ilz metoient estre le principe d’infinité Et le nombre non per estre princippe aux choses lesquelles sont fenies/ Sicomme plus plainement il appert declairié sus le .iii.^e de phisiques/ c’est assavoir que le nombre per semble estre couvenable a division.

¶ Pour ce infinité par especial se semble ensuivre a la division des choses continuees/ Et le nombre non per si a le per soubz lui/ & ancore unité la quelle est cause de indivision/ Et aussi prenoient ilz que les nombres non pers adjoustez par ordre l’un a l’autre retiennent la figure des quarrez nombres mais les pers varient leurs figures/ Sicomme .iii. adjoustez avec un qui est le principe des nombres/ causent ce nombre .iiii. le premier de tous nombres quarrez/ car .ii. fois .ii. sont .iiii. Et de rechief cinq qui apres .iiii. est le premier nomper adjousté avec .iiii. fait .ix. qui est second quarré/ car .iii. fois .iii. sont .ix. Et ancore adjousté .vii. a .ix. font .xvi. qui est le tiers quarré car .iiii. foiz .iiii. sont .xvi. Et apres adjousté .ix. a .xvi. font .xxv. qui est le quart quarré/ Et ainsi de tous autres. Mais se le nombre de .ii. qui est le premier nombre per est adjousté a un il constitue nombre triangulier/ c’est assavoir .iii. Et se a lui estoit adjousté .iiii. qui est le second per il constitue .vii. qui n’a tele figure/ Et ainsi les nombres pers adjoustez aux quarrez ne gardent point une meismes figure/ Et pour ceste raison leur attribuoient infinité/ et aux nompers finité/ Et pour ce que finité si signifie fourme a qui compette l’active vertu/ Et infinité en depart la matiere a qui compette passibilité/ pour ce les nombres pers ilz disoient femmelles et les masculins nompers/ Et de ses .ii. diversitez per et nomper feni et non feni non pas seulement ilz constituoient nombre mais aussi unité/ Car unité disoient ilz est per et nomper en vertu/ pour ce que toutes differences de nombres en vertu couviennent a unité/ Car tout se retournent en elle & elle en nesune/ Car combien que unité de fait ne soit pas aucun nombre. Toute foiz disoient ilz en vertu elle est un chacun nombre/ Et pource la mettoient ilz constituee de per et de nomper/ Et tous nombres constituez de elle Et mettoient le ciel et toute chose sensible estre faictes de nombres/ Et ytele estoient l’ordre des princippes qu’ilz mettoient.

De ce mesmes.

Aucuns autres naturiens anciens furent qui mirent mouvement c’est a savoir en tant comme ilz mettoyent un principe le quel par reffaccion et condempsacion ilz disoient mouvable du quel aussi engendrees metoient les diversitez des choses/ Et par ceste maniere le monde disoient engendré selon toutes differences des parties de lui/ Toute foiz car en lui ne mettoient variacion se non selon les accidens/ pource concluoient ilz que selon substance tout le monde fust un/ autres plusieurs oppinions furent dont la narracion longue seroit/ mais en brief yceulz anciens philosophes s’entre accordent assez en ce que ilz dient es choses aucun principe de matiere/ sicomme thales et dyogenes & leurs semblables/ & les aucuns si en misdrent plusieurs sicomme empidocles/ Et aucuns autres aucunes choses non corporelles sicomme ceulx qui mirent dualité/ c’est a savoir platon qui mist & grant et petit/ lesquieulx ilz dient non estre corps/ les ytaliens aussi c’est a savoir pitagoras ont remis infeni/ le quel de rechief pas ne mettoient corps/ Empedocles aussi les .iiii. elemens qui sont corps pour principes mettoient aussi anaxagoras mettoit infinité de semblables parties/ c’est assavoir infenies pars semblables estans indivisibles pour principe des choses/ Et tous ceulx ci ont touché tele cause/ c’est assavoir la cause de materre/ Et ceulx aussi qui ont dit l’air ou l’eaue ou le feu pour principes ou autre moyen entre yceulz elemens sicomme plus espeus de feu ou plus tenues d’air/ Tous yceulx ont mis ycellui corps estre premier principe et element des choses/ Et ainsi appert il que tous ceulx devant diz quant aux choses ja dictes ont mise seulement cause materielle autres plusieurs yceulx anciens ensuivirent que je delaisse pour briefté/ Toutefoiz est a notter que tant avons eu d’eulx que par leurs diz ne causes ne principes oultre yceulx canons mis en phisiques/ nul de eulx n’a diffini/ bien qu’encore obscurement trestous/ toutefoiz les aucuns y semblent approcher/ C’est a savoir yceulz qui materre estre principe dirent/ fust une ou plusieurs ou corporee ou non/ aussi platon qui mist grant et petit & les ytaliens qui mirent infini/ Et empedocles/ l’eaue le feu l’air et la terre/ Et anaxagoras l’infinité de semblables parties/ Car tous ceulx ci toucherent celle cause/ voire et aussi tous ceulx qui ont touché d’air et d’eaue ou de plus espés de feu ou de plus soubtil d’air/ lesquieulx ilz assignoient estre element premier/ yceulx tous seulement ont touché de materre.

¶ Mais les autres du principe de mouvement toucherent/ c’est a savoir tous ceulx qui amistié ou haine ou entendement mirent estre principes.

¶ Toutefoiz qui soit l’estre ou substance es choses plainement nul ne dist/ Toutefoiz cuidoient ycelles estre causees d’immobilité et de reposement/ Et pour ce de ce qui est la substance aux choses ilz mirent especes estre causes/ et un la cause des especes.

Encore de ce.

Comme ces choses soient obscures a sentir aux gens lais et rudes a dire en lengage vulgar et meismes a ton entendement pour la grosseur de lui estranges passeray oultre des oppinions des anciens philosophes lesquieulx en assez de manieres fis errer sus les princippes des choses.

¶ Mais de ces choses fu je clere a mon tres amé filz aristote le prince de philosophie le quel reprima yceulx anciens par vives raisons sicomme cy en brief te toucheray sanz du tout definir/ car longue en seroit la narracion non delitable a ceulx qui ne la sentent/ Aristote donques reprime les oppinions d’icelz anciens philosophes es principes des choses/ Et pour ce faire il se devise en .ii. parties premierement/ il impreve les singulieres oppinions/ et d’enciennement il requeult les choses qui sont dictes et les continue a celles qui ensuivent/ la premiere par ce divise en .ii. autres/ premierement il impreuve les oppinions de ceulx qui naturellement ont parlé .ii.^ement des pittagorians & des autres/ encore en la premiere part il fait .ii. choses/ premierement il impreuve les oppinions de ceulx qui mirent une cause materielle & .ii.^ement de ceulx qui en mirent plusieurs/ ancore au premier il fait .ii. choses premierement il impreuve les oppinions ja dictes en general & .ii.^ement en especial/ Il les impreuve en general par .iii. raisons dont la premiere est telle Car comme les choses non seulement aucunes soient corps/ mais aussi qu’aucunes soient non corps comme il est apparu en son livre de l’ame que yceulx anciens n’ayent mis fors seulement principes corporeulx/ La quelle chose appert/ Car ilz mettoient un/ c’est assavoir le monde estre une seule substance et une seule nature/ Sicomme la matere la quelle corporee ilz metoient recevant mesure c’est a dire division/ Et toute foiz corps ne puisse estre cause de chose incorporee/ il appert que en ce ilz ont failli qu’insouffisamment ilz ont assignez les principes des choses/ Et non pas seulement en ce ilz ont failli/ mais en autres choses plusieurs comme plus a plain apres il declare. La .ii.^e raison est tele/ que quiconques a neccessairement a determiner de mouvement/ Il fault que il mette aucune cause de mouvement dont comme les diz philosophes ayent neccessairement a traictier de mouvement La quelle chose si appert doublement c’est assavoir/ car ilz s’efforçoient a deviser la cause de generacion et de corrupcion/ les quelles ne sont sanz mouvement Tant aussi Car de toutes choses naturellement ilz vouloient traicter/ Et toutefoiz toute naturelle consideracion enquiert de mouvement pour ce que nature est principe de mouvement et de repos comme il appert ou .ii.^e de phisiques/ il s’ensuit que ilz devroient traictier de la cause qui est le principe de mouvement/ Et ainsi comme ilz ostassent ou oubliassent ycelle appert que ilz failloient La .iii.^e raison Car comme une chacune chose naturelle ait substance et essence/ C’est a dire fourme/ Car fourme est princippe de l’estre et ce que c’est/ Donques comme ce par qui toute chose a son estre soit le principe d’elle & de sa cognoiscence/ Comme les philosophes dis/ ne meissent l’estre des choses cause et laissassent la fourme il appert que ilz failloient ycy repreuve il leur oppinion plus en especial/ & se fait doublement/ premierement quant a ceulx qui le feu estre mettoient principe/ l’une/ bien que le feu fust souffisant .ii.^ement quant a ce que ilz laissoient la terre comme aucunement elle appere premiere. premierement il resume la posicion d’eulx/ Car comme ilz missent chacun des simples corps transmuer l’un en l’autre si que les uns sont engendrez des autres selon constricion ou inspissacion c’est assavoir selon tenueté ou engrossissement/ sicomme les groz des soubtilz/ Et pour ce ilz missent l’un de ces .iii. estre premier principe Car les autres sont engendrez de lui/ ou par congregacion ou disgregacion/ lesquelles guises toute foiz se different quant a priorité ou posteriorité c’est assavoir car selon une maniere ce semble premier estre de quoy autre est engendré/ par soubtiliacion/ et ceste guise il met .ii.^ement Mais dit il que ce soit premier de qui autre est engendré par condempsacion ou inspissacion/ il appert dit il par ceulx qui mettoient principes les corps plus simples/ c’est a savoir les corps ayans tres menues parties/ desquieulx par condempsacion ilz disoient les choses estre faictes/ sicomme aucuns qui mettoient le feu pource que il est tres soubtil/ aussi un chacun des autres eslemens eut un philosophe qui le jugia premier/ mais pour quoy dist il ne mirent la terre estre principe/ Il ne peut estre dit que ce eust esté contre l’oppinion commune/ Car oppinion divulguee fu la terre substance de toutes choses estre/ Et mesmement exeodus qui fu l’un des poetes theologisans l’affermoit disant la terre estre premiere faite par quoy comme il appere que la terre estre principe fu l’oppinion des theologisans poetes qui precederent les naturiens philosophes/ seulement les naturiens escheverent a la mettre principe pour la groissesse de ses parties Et pour ce comme ilz veissent que l’air eust plus grosses parties que le feu et l’eaue que l’air/ et ilz ne veissent rien si soubtil que feu/ Il s’ensuit dit il que en ensuivant ce principe de condempsacion nulz ne dirent si bien que ceulx qui mirent feu principe/ Car comme pour cause de soubtilleté aucune chose puit estre appellé premiere/ il est neccessité que celle soit principe qui est tres soubtille sur toutes/ Toute foiz s’il estoit vray qu’ilz dient s’ensuivroit il grant inconvenient/ C’est assavoir s’il n’estoit riens que feu il s’ensuivroit s’aucun disoit que air fust plus groz que feu/ ou plus soubtil que eaue que ilz mesprendroient.

Ancore des oppinions des philosophes.

Mais certes ycy met il l’autre raison par la quelle au rebours il appert que la terre soit tres proprement principe/ car comme ce soit chose evident que ce qui est derrenier en generacion est premier en nature/ pource que nature a la fin de generacion tent a ce qui est premier en son entencion/ mais tant que une chose est plus deprise plus espesse et aussi plus composte/ Tant est elle plus derreniere en generacion/ pour ce que en voye de generacion on precede de plus simples choses aux composees sicomme des elemens on va aux miscions/ et les mixtions aux humeurs et des humeurs aux membres/ tant que finablement on vient a homme qui est le plus compost Semblablement doncques comme ce qui est le plus espeus appert estre en generacion derrenier/ et par consequant principe de nature/ il appert que ceste conclusion soit contraire a celle de devant/ Car ainsi la terre qui est plus espesse et plus disperse sera premiere d’eaue et l’eaue que l’air/ et l’air que le feu/ Si est pour ce a savoir que il y a difference entre querir ce qui est premier & a parler simplement/ Car s’on enquiert de premier simplement n’est pas doubte que premier est parfaict/ de imparfaict et faict que n’est poissance/ Car nulle chose n’est ramenee d’imparfaict a parfaict/ ou de poissance en fait/ se non par aucun ens parfaict/ c’est a dire par aucune chose estant de fait parfaicte Et c’est cy a savoir que je appelle poissance en tant que je la distingue contre fait/ La poissance de quelconques effait le quel n’est c’est a dire de quelconque chose produisible et menable en aucune nature soit bonne ou mauvaise/ ycelle nature non estre ore/ mais povoir estre/ Et pource la nomme l’en poissance de povoir estre ou non/ mais quant elle est/ elle est nommee fait a difference de povoir estre/ Et parce il appert que fait est le plus noble/ Dont pource se nous parlons de la perfeccion de dieu/ dieu si est tres parfaict/ et donques tres premier/ Car en son essence nulle possibilité ne fu ainçois que fait/ mais ces particulieres choses qui precedent en leur estre de poissance en effait/ la poissance en ycelles quant temps si precede le fait et ainsi l’imparfaict le parfait combien toutefois que a nature le fait soit le premier c’est asavoir quant en son entencion et maniere d’elles savoir produire/ Tout ainsi que il appert d’un messagier qui va en aucun lieu Combien que le lieu ou il va quant au labour et a son entencion il atteigne de y venir/ Toutefoiz estoit il le premier quant a son entencion/ car autrement ne se fust il pas meu/ Et sicomme au lieu quant il ataint on pourroit dire qu’il y estoit deffaict. aussi ainçois qu’il atteignist s’entencion povoit estre appellé poissance/ Et ainsi il appert que fait se non en temps/ toute foiz quant a nature ou a entencion est premier que poissance/ il est du tout manifeste que ainsi le premier principe de toutes choses il fault estre tres simple pour ce que toutes choses sont composees des simples & non e converso donques il estoit neccessaire aux anciens naturiens que l’un et l’autre ilz attribuassent au principe premier/ c’est a savoir au principe du monde qu’ilz attribuassent avec souveraine simplicité souveraine perfeccion Mais comme ces .ii. ne puissent estre atribuez a aucun principe corporel Car es generacions & es corrupcions les tres simples choses sont les plus imparfaictes pour ce leur sembloit estoient ilz contraires mettre division es principes.

Cesse a parler des oppinions.

Plus te diroie assez quelle je fus es anciens philosophes en divers cas/ et mesmement en cestui dessus dit plus largement/ & aussi des solucions du vray distingueur et sage determineur Aristote Et qui plus de ce vouldra savoir quiere le philosophe en sa methaphisique Mais comme la matiere soit obscure de ce/ a tant souffise/ Et ainsi comme en une riche mercerie ou tresor/ sont avec perles diverses pierres precieuses de plusieurs vertus couleurs et pris/ les quelles au goust et plaisances de divers barguigneurs sont requises/ Soient ycestes choses ou tresor de ton volume reservees aux hommes scienceux de soubtil entendement/ Et passent oultre les moins expers aux choses plus legieres et communes Et tres ore soit changié l’ordre de nostre rethorique en plus vulgare et elegant parleure en retournant a nostre premiere arrenge te soient assés souffisantes les preuves des choses devant dictes/ me tenant quitte de promesse a toy par moy faite/ C’est a savoir de te clairer les termes de ma poissance manifestes mesmement es hommes plus sages & de plus soubtilz engins.

De l’ombre la poissance que elle a.

Or t’ay je assez prouvé par ce que devant est dit comment je suis cause premiere des oeuvres humaines & que se precedent ne fusse aucune oeuvre n’aroit effect es humains/ pource te vueil reprendre en aucune partie de tes dis/ en ton livre intitulé de la mutacion de fortune le quel compilas par grant labour & estude/ Car combien que par moy t’en venist l’invencion trop faillis sauve ta grace/ Lors que tu tant octorisas la poissance de dame fortune que tu la dis estre toute ordenaresse des fais qui cueurent entre les hommes/ Et ma poissance souveraine sur toutes influences refleccibles es oeuvres communes qui precelle toutes autres/ tu oublias/ Si ne te soit honte offrir l’amende a moy suppellative de toy en ceste partie injuriee te rendant repentie coulpable comme mal avertie me recongnoissant suppellative sur toutes poissances relatives ça bas de dieu ordenees/ Et que ceste chose te soit magnifeste vueil que me desnoues cest argument/ Je te demande le quel est plus noble ou l’acteur qui est principe de la chose premierement mise en fourme/ ou l’euvre qui despent et vient de la poissance de l’acteur premier princippe/ Et moy a elle/ certes dame je tiens que comme dieu soit principe de toutes choses/ Et aussi comme dit aristote l’entendement est le souverain des biens/ Car a lui tous les autres obeissent le premier principe des choses je confesse le plus parfaict en accion de oeuvre comme ci devant est assez prouvé/ Et elle a moy/ bien respondis/ or t’ay vaincue par ton meismes jugement/ Car non obstant qu’entendement soit devant moy quant en concept Toute foiz suis je premiere cause de toutes choses bonnes ou mauvaises faictes ou pourchacees par pensees ou oeuvres humaines/ Et donques comme devant est dit s’il est ainsi/ ce que si/ que principe soie des speculacions et toutes choses ouvrables/ comme il appert Je conclus vraye ma preposicion que je precelle les choses ouvrees/ Et que fortune a qui tant de poissance atribuez/ n’est fors ma chamberiere mercenere comme conduisarresse des oeuvres ja par moy disposees a mettre a effaict.

¶ Mais affin que il ne semble que par mouvement de envie lui vueille soubtraire la fame de son auctorité/ te cognois estre vray qu’en disposicion de oeuvre/ fortune a poissance de conduire les fais particuliers bien ou mal selon le soufflement de son influence/ mais te souviegne que differens sont noz mouvemens/ car de rechief te dis que je euvre en esperit et fortune ne peut ouvrer fors es choses ja par moy deliberees aptes a recevoir ses influences es choses dehors et foraines mais es repostailles de la pensee es quelles je sui muciee n’a nulle poissance/ doncques tu peus cognoistre que elle est serville et villaine vers mon auctorité comme elle soit au monde sicomme superflue comme le las de l’adversaire/ Et je soie celle sans qui nulle chose n’est faite et sans qui nul fruit d’oeuvre ne pourroit l’omme conduire a perpetuelle gloire.

Encore dit de sa poissance.

Que te diroie de mes poissances n’en doubtes point que elles passent & precedent toutes les choses mondaines Et t’acertaine que par moy singulierement depuis le commencement du monde a esté est et sera gouverné tout l’univers et fondé sur moy es choses ouvrees par les hommes/ Et non obstant que grans sciences lois escriptes/ rigles de princes coustumes de terres soient en commun usage/ si te di je que precede toutes leurs poissances/ et plus puis que toutes ensemble/ et qu’il soit voir il appert par ce que non obstant ycestes coustumes ou establissemens souventes foiz/ fais errer meismes ceulx qui y sont les plus savans et les plus expers et entrer en tieulx argumens dont les conclusions sont faulces et dampnables sicomme ja est prouvé par ce qui est dit des anciens philosophes.

¶ Et pource que tu attribues en ton dit livre de la mutacion de fortune/ elle estre menarresse des antregiez des seignouries/ je te dis que de tous yces mouvemens suis le premier motif/ ne fu je celle qui tres le .ii.^e aage fis a nambroth le jayant par presompcion ediffier la fort cité et tour de babiloine qui onques n’ot pareille comme ci apres sera dit/ si le fis errer tant qu’il dechut de l’atainte de sa pensee/ apres ce temps comme je fusse fort fichee ou cuer du roy de ninive par moy mettre a effaict/ ne vint il a chief de prendre la dicte fort cité de babiloine/ la quelle sa femme semiramis par moy et mon industrie moyennant son chevalereux courage fist ancores enforcir et brayer de bons fossez et bastides.

¶ Item apres ce lonc temps ne donnay je cuer a cirus de guerroyer astiagies son ayol qui a occire l’avoit commandé si me poursuivi tant que il avint a son entente de ce et de tout oryant qu’il conquesta/ et pour ce que la matiere en est belle ancore diray de sa conqueste/ Comme je donnasse cuer et hardement a Cirus de emprendre fortes choses ce meismes recite abacut en sa prophecie Il prist la dicte cité de babiloine la quelle prise fust tant merveillable que ainsi comme dit Orose & saint augustin a peine pout il lors estre creu que par vertu humaine fust conquestee ne qu’en ceste mortelle vie ediffiee et puis prise peut estre. Car si qu’il dit elle estoit en bel espace assise de toutes pars tres fort en sa disposicion façonnee en quarrure/ la haultece de ses murs estoit .l. coubdes/ et l’espesseur autant par .iiii. fois/ tous les murs estoient de pierre cuite enlaciez par cyment/ et avoit cent portes d’arain/ et environnoit .CCCC.lxxx. estades qui valent .li. milles C’est assavoir .xxv. lieues et demie françoises/ Car sicomme raconte orose Comme Cirus eust conquis auques tout orient & voulsist subjuguer babiloine la quelle lui restoit Comme a un des assaulx que il fist il perdist ou fleuve de euffrates qui cignoit la cité de ses chevaliers/ cellui que il amoit le plus/ le quel aussi surmontoit tous les autres en valeur et proece/ Il jura que cellui fleuve le quel avoit noyé si vaillant chevalier deviseroit en tant de parties que nulle part de lui ne seroit si grant que a une petite femme venist aux genoulx/ et ainsi fu car en .CCCC. & .lx. ruisseaulx par force d’ommes en l’espace des champs il devisa le fleuve/ si que le tres noble fleuve qui passoit par dedens la cité osté et subtrait de elle/ fu subjuguee/ et prise.

Encore de ce mesmes & des seignouries.

Pour briefté je laisse infinies autres choses lesquelles ay faites faire pendant ce temps & meismes celles que tu imputes a fortune/ ne vindrent de moy/ Les premieres invencions des fais que ains leur achevement vy en pensees/ non obstant que souvent les veoye autrement qu’ilz n’avenoient de tous les fais des conquereurs passez.

¶ Ne fis je apres autres aventures passees/ a croire au roy xerses qu’il conquerroit toute grece en lui ramentevant sa grant poissance/ Dont pour ce faire assembla tant de gent que mons et vaulx en estoient couvers/ Si avoye couleur de jugier pour lui la victoire/ mais comme fortune me soit souvent contraire/ par especial en fais de guerres et es choses avenir/ je confesse que elle voluntairement donna la victoire aux grieux tresbuchant cellui poissant es las de maleurté sicomme toy meismes as autres foiz apres autres aucteurs recordé en tes volumes Toute foiz non obstant que a lui fusse mençongiere et decevable fis je la premiere naiscence de celle emprise.

¶ Apres ce temps par moy et par mon amonnestement furent commenciees et continuees les grans guerres troyennes/ Ne fis je a croire a leomedon roy de la premiere troye que les gregois dessendus a son port/ quant aloient pour querir la toison d’or estoient venus pour espier sa terre et lui pourchacier dommage/ et par moy sans cause envoya congeer de sa terre jason hercules et les autres barons villainement/ pour le quel despit je me mis ferme ou cuer des dis barons et leur promis que bien s’en vengeroient comme ilz si firent apres/ car je fus simple et nice ou dit roy leomedon qui follement me crut et mal se gaita de yceulx gregois en qui je fus sage et vraye/ si que sagement menerent leur fait par l’ayde et disposicion de fortune conduisaresse de leur bon eur/ si que toute destruirent et ardirent la cité/ le roy occirent et toute la gent.

¶ Apres ne fis je a priant filz leomedon rediffier la seconde troye qui tant fu belle fort et poissant que merveilles estoit a comprendre/ par moy apres entreprist la vengence sur les grieux Si fis aler paaris en grece et ravir helayne et tout faire ce qui en fu fait/ Et par mes amonnestemens avec l’ayde ou nuisance de fortune perdoient troyens et gaignoient Je fus cause de la mort hector/ car je lui faisoie a croire que il n’avoit garde d’achiles qui sans cesser le gaittoit/ si que au derrain l’occist/ Semblablement depuis deceu je achilles tant que il cheut es las de la royne Ecuba qui a bonne cause le hayoit/ tout pour moy et par mon pourchas fu au derrain troye prise et destruite/ De la quelle fis apres partir plusieurs barons du sanc real a tout grant foison de gent qui par mer s’espandirent en diverses contrees dont eneas et sa compagnie arriva en ytale si lui fis couvoiter la fille du roy latin/ et pour celle cause emprendre guerre a turnus qui lui chalengioit Dont d’icellui eneas venu a son entente deffendirent puis les fondeurs de romme.

Dit ancore l’ombre des choses que elle a faites faire.

Depuis ensuivant n’ay je esté celle qui les successeurs de yceulx ay amonnestez d’emprendre les grandes et merveilleuses choses/ lesquelles par l’ayde de fortune a eulx propice/ tant esploitierent et par leur travail ayde et sens en lonc espace de temps que ilz conquesterent le monde Sicomme les histoires de leurs gestes/ et toy meismes apres autres en ton dit livre de mutacion de fortune le recordes/ le recitent/ si n’est besoing de plus en faire longue narracion.

¶ Aussi ne fus je celle qui au grant Alixandre tres sa jonesce donnay l’invension d’emprendre les fortes et fieres batailles en lui promettant fortune en son ayde qu’il seigneuriroit sicomme il vint puis a chief de tout le monde/ Semblablement devant et apres ensuivant de toutes conquestes et seigneuries/ et toutes estranges choses mettre a effaict des choses a l’aventure par propos deliberé/ ay esté moyen et principe/ ce ne me peus tu nyer/ se tu ancores par grosseur d’entendement ne m’ignores/ qu’en dis tu me suis je assez magnifestee/ me cognois tu/ et moy a elle/ dame dites ancore. A quoy veulx tu que plus je dye. Ne vois tu l’experience de moy manifeste meismes chacun jour ou pays ou tu demeures par les debas que je fais par mi la ville et en toutes places/ Regardes et avises quieulx descors/ mais meismement entre les princes qui sont d’un sanc et amis naturellement par les diversitez de moy qui suis contraire en eulx le fois devenir comme ennemis maintefoiz et en chacun suis si afferme contrairement en ce qui lui semble bon que l’en ne me peut desmouvoir Car chacun dit que il a droit et ainsi le veult soustenir et a discuter leurs raisons ne vois tu les assemblees qui en sont faites de plusieurs que on dit sages et a chacun pour soy de ses aderés qui different les uns des autres/ Lesquelles choses sont causes de grant inconvenient/ car en pays royaume/ empire ou cité ou je soie ou aye esté communement de plusieurs guises contraires & mal accordables/ ne fu que rebellion et grant debat commocion et bataille ne fust/ ne autrement ne peut estre Car certes la ou je ne suis d’un commun accord/ n’ara ja paix/ mais du tort ou droit d’entre lesdiz princes supperieurs je me tais/ Car de ce determiner n’est mie mon office qui tous jours suis en doubte et non certaine/ mais de ce demander couvendroit a la tres clere resplandissant poissant deesse que tu veis enclose en chartre et emprisonnee & de qui fraude s’estudie a estoupper et clorre les voyes de sa lumiere sicomme a toy meismes fu apparant et de qui les menistres quoy que leur desplaise n’osent soubz peine d’estre batus tinter ne lever l’ueil/ mais de leurs descors fois je sourdre par toutes places nouveaulx debas entre leurs ministres et aderez et par toute la ville en deviser negativement l’un contre l’autre/ et meismes a de ceulx qui ne les cognoiscent en estranges terres en qui je me fiche diversement/ Si les fais entre batre souventes foiz/ et questionner mesmes de chose qui riens ne leur touche/ Disant l’un contre l’autre Tel seigneur a droit pour tel cause et pour tele/ L’autre replique que non/ et ainsi par non a/ si a/ si fu/ non fu/ je fais gent entre occire souventes foix meismes es tavernes souvent avient adont suis je forte quant il y a vin & plus je y abonde & fais mesler gens de la chappe a l’evesque/ ou des guerres de anthioche le quel a ou droit ou tort et ou le quel est plus sage/ ou le quel ne l’est mie/ Et ainsi je demonstre es humains leur ignorence de eulz debatre de ce de quoy riens ne scevent et ne leur appartient/ O quel folie en homme de qui le sens doit gouverner raison/ se fonder sans elle sur moy & jugier par moy certainement de chose non certaine et que ilz ignorent Que t’en diroie je fois vivre les gens par moy/ c’est a entendre disposer leurs fais selon ce que je leur conseille/ Et quant ilz pevent avenir a l’ordre de vivre que je leur fois desirer/ adont sont ilz contens de la chose que ilz vouloient/ mais je suis different en eulx/ Car je fais penser et cuider a l’un que bon lui soit/ une maniere de vivre/ et certaines choses que il appete lui sont bonnes/ que a un autre ycelles meismes ne plairoient point/ mais lui plairoient toutes contraires/ Et cestes differences viennent selon les condicions et aages des gens sicomme je suis autre es jones que je ne suis es vieulx/ et meismes es .ii. aages entre eulx suis je different/ Et pour ce que ainsi je differe suis je cause des debas du monde/ et chacun me cuide avoir en soy meilleur/ je fais sembler a un homme que avoir des flourins il n’est plus de joye Je fais sembler a un autre que avoir belles dames il n’est plus de bien/ aux uns juger que science est souveraine chose/ aux autres que chevalerie est meilleur et plus noble & ainsi des autres choses/ Et pour ce ne fu onq si parfaict pas jhesuscrist comme homme qui peut bien vivre ne estre agreable a l’oppinion de tous Toute foiz te dis je bien que vivre vertueusement & bien faire si emporte le plus des voix des gens.

Ce que l’ombre disoit des arquemistes.

Comment cuides tu que je soie comme j’ay dit fort atachee es speculatis clercs & entre les autres es arquemistes qui la science cuident trouver par les termes entendre de aucuns livres obscurs de faire l’or/ merveilles est car s’il est voir que aucuns philosophes par investiguer les secrés de nature telle art trouvassent/ la quelle chose fort semble a croire/ toutevoie tant sont couvers estrangement les textes de leurs aucteurs que bonnement le sens humain ne les scet ne mais a l’aventure concevoir/ ne sentir fors telement quellement/ mais voy ci qui deçoit les ouvrans en ycelle art que ilz dient et touchent que comme il n’apartiengne que aux ignorans ruraulx soit descouvert si noble secret/ pour le bien des soubtilz l’ont voulu si mucier que des rustiques ne leur soit tolu ne fortraict/ Et ycy est la decevance/ Car chacun qui s’i fiche cuide estre du nombre des plus soubtilz & abuse en son entendement en estudiant yceulx livres lesquieulx baillent le sens de leurs termes/ a si doubles ententes que le plus cler voyant n’i voit nulle goute mais adont je me fiche en eulx et leur fais a croire que l’asemblement des metaulx sublimez diversement comment et de quoy doivent estre mistionnez de diverses matieres et nourris en feu attaindront l’art de nature et par espace de temps sera converty en or ou argent et toute voye l’un entant la maniere du composer en une guise l’autre en un autre/ et le tiennent secret les ouvreurs sans conferir ensemble de paour que ce que ilz en croyent et la maniere de leur ouvrer peust aviser un autre de trouver la voye d’i attaindre ne jamais nul ou pou n’euvre de la guise de l’autre/ et ainsi gastent le temps et perdent et font grant mise follement par vaine esperance qui par aventure en leur erreur les reconforte pour un pou de apparance ou conjecture de aucune congelacion estrange faite par diverses mistions & feu quelque matiere dure remettre ou pouldre en eaue ou autrement cuident par ce avenir au degré ou ilz tendent lesquelles choses sont toutes frivolles/ et tournent a folies et a chetivoison et toute jour et nuit font feu contemplant un fournel/ mau peus & mau vestus se paissent de vent/ & la font chasteaulx en espaigne pensant comment il seront aise quant l’or saront faire/ et quieulx despens ilz menront/ Et que cuides tu que de tieulx arquemistes sourdent aucune fois de grans trompeurs qui cabusent les seigneurs & leur font a croire que se ilz eussent quelque mise n’est mie doubte que ilz ont ja ataint un grant secret si en tireront grant prouffit/ et ainsi par quelque apparance de verité soubtille en ycelle art monstrent signe de aucune chose voir semblable/ et au derrain tout tourne a neant comme tu as veu meismes en ton aage avenir de plusieurs de quoy il estoit grant renom/ et maintes gens foy y adjoustoient Sicomme d’un en alemaigne que on nommoit maistre bernard qui tant se faisoit renommer par l’estat que il tenoit/ et meismes a ton pere envoya il lettres/ et tant fist que trop de gens foy y adjoustoient/ et aloient de toutes pars clercs devers lui/ et toutevoye au derrain fu trouvé que tout estoit neant et tromperie/ et de autres plusieurs que tu as veus que au derrain on faisoit mourir par leurs dessertes par cabusemens faire a seigneurs/ Et avient aucune foiz que je me fiche si en eulx par la speculacion que ilz y ont trop ententive/ je les fois devenir tous fantastiques & si astras que ilz sont comme inconversables.

¶ La bonne galle est quant de aucuns folz non lettrez s’i boutent qui mieulx cuident entendre et exposer les textes des aucteurs que les plus savans & les lisent et ymaginent dessus/ et dieux scet les bonnes fantasies/ que ilz y ont sicomme un orfevre qui volt devenir arquemiste/ mais il le fu au contraire de la ou il tendoit Car or cuidoit faire et le deffist/ comme il fust riches homs et povre devint/ cellui estudiant un chapitre entendi que mercure c’est a savoir un metal que ainsi ilz nomment estoit la matiere ouvrable de la science Et comme il passast oultre tousjours lisant de rechief entendi que la cause de la perfeccion de l’oeuvre estoit matere reputee ville/ Et que on trouvoit sur le fiens gittee sicomme chose desprisee Adont comme cestui fust fort ententif a bien speculer ceste chose que ce povoit estre Au derrain determina en soy que vrayement par ce que dit estoit/ c’est a savoir mercure que comme les aucteurs eussent baillez leurs termes obscurs/ on devoit retourner le mot/ c’est a savoir cure ton marc que il entendi par la fiente de l’omme que l’en devoit curer/ et ancore plus de ce/ le certiffia que il trouvoit que sus les fiens comme chose ville estoit trouvee/ si s’arresta sus ces poins/ et commença a ouvrer en sa fiente en la faisant secher au feu et faire pouldre et la fin en fu que il puoit comme charongne/ & chacun le fuioit et se moquoit on de lui qui cuidoit faire de fiante or/ et aloit sus les fiens a grant diligence les querir/ un autre estoit qui cuidoit de savates faire or/ et aloit sus les fiens a grant diligence les querir puis les bruloit/ et tant ouvra que les voisins qui empulantis en furent le chacierent.

¶ De tieulx folz est il assez ouvrans en celle science a qui n’en remaint ne mais parte de temps & povreté/ Et qu’il ne soit mie dit selon le proverbe commun que les sciences n’ont plus fors ennemis que ceulx qui les ignorent/ que elle soit vraye ou non je ne te acertaine mie/ Toutevoie je te dis sans prejudice que la difficulté d’elle par vehementes raisons que comme les oeuvres de nature soient impossibles a ataindre sophistiquement donroit cause a plusieurs des plus avisez de non y perdre temps et mise par folle occupacion/ en esperance vaine y adjoustant grant foy.

Des nobles que l’ombre dit que elle deçoit.

Des nobles qui suivent les armes sont ilz point que tu cuides par moy deceus/ certes si sont souvente foiz plusieurs y a Car je les fais abuser du fait des armes par ce que ilz n’en scevent ou ne veulent savoir les propres termes lesquieulx sont tieulx. Il ne loit point a nul s’armer pour aler en bataille ne se combatre fors pour certaines causes C’est a savoir pour la loy de dieu contre les mescreans ou herites contraires a la foy/ Item pour deffendre l’eglise/ son prince/ son pays/ sa terre/ le bien publique/ le droit des ignocens/ & ses propres choses/ & autrement n’est loy qui le permette ne n’est bataille juste & sans dampnacion. Or y prens garde se de tous ceulx qui s’arment sont droiturierement ses poins gardez/ et se nulz y vont sus mauvaises querelles.

¶ Bataille que tu le saches justement faite est premise de droit divin & du droit des gens qui n’est autre chose meismes ce dit la loy/ que entencion de remettre a droit par force d’armes chose par autruy deraisonnablement contendue/ Si ne regarde de sa nature ne mes retourner droit a droit & faire convertir guerre a paix/ ne les maulx que fais y sont/ de la nature de bataille ne sont mie ains par mauvais usage acoustumé en guerre sont fais/ & que batailles en justes causes soient de dieu premises appert en plusieurs lieux de l’escripture/ sicomme il ordena a un homme nommé jhesus comment sa bataille establiroit/ et que une embuche feist pour surprendre ses ennemis/ Et de ce dient voz docteurs que dieux est vainqueur et ordeneur des batailles comme par plusieurs fois est apparu.

¶ Mais ceulx a qui je fais faire armes perilleuses & sanz raison/ et leur donne a croire que grant honneur leur sera pour l’amour de leurs dames sans visiere ou un bras nu/ ou descouvert d’aucun de leur harnois/ ou en aucun autre peril emprendre fait contre un autre a qui n’ont nul contens je les deçois/ et pareillement ceulx qui tieulx armes leur aceptent/ et a eulx se coupplent.

Ce que l’ombre disoit des gens d’armes.

Et ceulx qui donnent gage pour a oultrance en champ de bataille combatre sus aucune querelle soit droit ou tort/ je te promet en ce cas sont par moi deceus/ car vers dieu mesprennent & pechent grandement/ et te diray comment/ combatre en champ est contre droit divin qui est de dieu et de sainte escripture contre le droit des gens Le civil/ le decret/ et contre droit canon et cellui qui l’acepte/ pareillement peche La cause est que a dieu miracle ne chose contre nature on ne doit demander/ comme telle chose faire soit une maniere de tempter dieu esperant il aydera au droit/ Si ne doit/ Si ne doit estre quise de la voulenté de dieu experience/ Et que ceste espreuve soit faulse/ on a veu maintefoiz que cellui qui droit avoit estoit vaincus/ sicomme une decretale raconte de .ii. freres qui furent restez d’un crime & comme ilz fussent de celle cause vaincus en champ tout ne fussent ilz mie coulpables & apres la verité fu sceue par la confession meismes de ceulx qui le delit commis avoyent/ et pareillement de plusieurs a esté prouvé la loy deffendi que teles preuves non droitturieres plus ne fussent en usage/ Item juges sont establis pour cognoistre des causes et faire droit/ Et est loy ordenee que nul de sa propre cause ne soit juge/ Et cellui le veult estre qui prouver veult son fait par soy meismes et par sa victoire qui est soubz la distribucion de fortune/ et a l’aventure Item le droit canon commande que au pape l’en obeisse/ le quel soubz peine d’escommenie deffent comme chose reprouvee contre droit de justice/ que tele espreuve ne soit faicte Et tu me diras donques comment seront punis les mau faicteurs secrés Je te respons que dieu pour lui s’est reservee la punicion/ et dit un decret que se en ce monde tous maulx pugnis estoient/ le jugement de dieu dont point de lieu n’aroit/ et cellui presomptueusement le se veult attribuer qui la victoire de la vengence s’en veult donner.

¶ Et comment est uns homs si folz qui plain de vices et de pechiez se sent/ poson que il ait bonne querelle en aucun cas/ que il cuide que a lui pecheur dieu face miracle de la chose muciee que il quiert/ mais se il estoit sage paour devroit avoir de la pugnicion de dieu en sa juste cause/ Comme souvent aviengne & soit avenu que dieu a dissimulee vengence du pecheur ou cas ou desservi l’avoit/ et puis le pugni en chose dont estoit ignocent.

La fin de l’oroison de l’ombre.

Que dis tu souffist il t’ay je assez compté du fait de mes poissances desquelles ne pourroyes en ta vie comme autre foiz t’ay dit tous les exemples ouyr tant en y a et si divers sont/ Scez tu ancore qui je suis/ Et moy a elle dame congnoistre vous cuidasse/ mais les raisons contradictoires que me narrez/ vaciler me font en vostre cognoissance/ car se bien l’ay entendu/ tres au premier me dites que la ou verité est attainte/ ne povez arrester/ et toutevoye bien sçay et suis certaine que en maint cas m’avez pure verité ycy endroit clariffiee. Si ne sçay entendre comment ce peut estre que chose doubteuse tesmoing puisse estre de verité pure Et elle a moy fille envers le sens de ton entendement & escoutez et nottez/ Car je te promet que quoy que autrefoiz en divers cas te fusse menterresse en cestui cy t’ay je dit voir/ se bien l’entens & ne m’i contredis/ S’il te recorde de ce qu’ay dit/ c’est assavoir que cause suis moyennant estude & entendement de faire attaindre les choses vrayes/ mais bien est vray que aussitost que attaintes sont je me depars en cellui cas ne plus n’y arreste Et qu’il soit voir ainsi l’as esprouvé/ car non obstant que ces choses t’aye dictes non pas moy les t’ay certefiees mes les ses par le moyen d’estude qui raporté l’a a ton entendement/ le quel par raison est certain que ainsi soit/ pource en ces cas de toy me partiray et en lieu te remaindra certaineté/ Et par plus groz exemple ne te souvient il de moy et de ma cognoissance par les divers cas que je t’ay fait mettre en termes & faire plusieurs lectures.

¶ Ne fus je celle qui mist le debat entre les clercs disciples de maistre jehan de meun comme il s’i appellent/ Et toy sur la compillacion du rommant de la rose du quel entre vous contradictoirement escripsistes l’un a l’autre chacune partie soustenant ses raisons/ sicomme il appert par le livret qui en fu fait.

Responce de christine a l’ombre.

Adont comme mon entendement se apperceust par clere cognoissance qui estoit celle qui tant araisonnee m’avoit je dis ainsi.

¶ Ha dame oppinion poissant et forte voirement vous doy je mon bien cognoistre/ car tres m’enfance oz je vostre accointance/ Et certainement je cognois et confesse vostre auctorité estre de grant vigueur et poissance/ et quoy que vous soiez blasmee souventes foiz/ qui bien de vous use ne peut errer/ et mal/ pour cellui en qui vous n’estes saine/ mais puis que il vous a pleu de vostre grace tant m’onorer que a moy si clere evidemment vous estes magnifestee me racontant voz grans proprietez/ encore vous requier que ennuy ne vous soit de me declairier aucunes demandes Et elle a moy/ fille dis ce qu’il te plaist.

¶ Dame puis que il est ainsi que de vous vient la premiere invencion des oeuvres humaines bonnes ou malles/ rudes ou soubtilles selon la disposicion des entendemens comme dit avez/ plaise vous me certiffier se es choses par vous engendrees en moy lesquelles a mon povoir par le moyen d’estude & de tel science et entendement comme j’ay qui en mes compilacions et volumes sont declairees se en aucune chose y ay erré/ comme si sage ne soit qui aucune foiz ne erre/ Et elle a moy amie chiere soyes en paix car se ainsi estoit mieulx vouldroie tart que jamais les amender Car je te dis que non/ Tout t’ay je blasmee de ce que prerogative de honneur vols comme je ay dit devant donner a fortune et moy comme je soie princippe y oublias mais non pour tant faulte n’y a.

¶ Non obstant que par moy maint s’en debatent diversement Car les aucuns dient que clercs ou religieux les te forgent Et que de sentement de femme venir ne pourroient mais ce sont les ignorens qui ce dient/ Car ilz n’ont pas la cognoiscence des escriptures qui de tant de vaillans femmes sages et lettrees et mesmement prophetes qui ou temps passé ont esté font mencion/ Et comme nature ne soit amendrie de sa poissance/ ancore en peut estre/ les autres dient que ton stile est trop obscur/ et que on ne l’entent/ si n’est si delitable et ainsi diversement le fais aux uns louer & aux autres reprimer de loz/ comme chose quelconques estre a tous agreable soit impossible/ mais tant te dis que verité par le tesmoing de l’experience ne seuffre le blasme avoir effait sur le loz/ si te conseil que ton oeuvre tu continues comme elle soit juste Et ne te doubtes d’errer en moy/ Car tant que je seray en toy fondee sur loy/ raison & vray sentement tu ne mesprendras es fondacions de tes oeuvres/ es choses plus voir semblables non obstant de plusieurs les divers jugemens/ les uns par moy simplement/ les autres par envie/ Car je t’acertaine que quant elle et moy sommes ensemble adont se font les tres faulx jugemens ne il n’est si bon qui y soit espargné/ et adont suis je perilleuse quant envie me gouverne/ si faisons la personne avuglee es autruy choses et en son meismes fait qui en soy nous a si lui rongnons le cuer/ ne reposer ne la laissons/ et vouloir lui donnons de faire maint maulx qui accomplis sont aucune foiz/ & mal est gouverné cil qui chiet entre noz mains ja si bon ne sera ne si poissant.

¶ Ne veames nous jadis les portes de romme au preus julius cesar qui tant victorieux s’en retournoit/ & au dernier tant pourchaçames que il fu occis/ Assez de teles en avons faites/ ne il n’est si sage qui garder s’en sache/ Si t’ay assez narré de mes aventures et a tant souffise/ Car parce que je donne a croire a l’un que une chose est bonne et bien faite ou que elle est vraye/ & a l’autre tout le contraire/ dont sourdent bataille et maint debas/ la prolicité de mes narracions si racontees pourroit aux lisans a ennuy tourner/ Et si te prophetise que yceste lecture sera de plusieurs tesmoignee diversement les uns sur le lengage donront leur sentence en plusieurs manieres/ diront que il n’est pas bien elegant Les autres que la composicion des materes est estrange/ et ceulx qui l’entendront en diront bien/ et le temps avenir plus en sera parlé que a ton vivant/ Car tant te dis je ancore que tu es venue en mauvais temps Car les sciences ne sont pas a present en leur reputacion ains sont comme choses hors saison/ et que il soit vray/ tu en vois peu qui a celle cause soient en la maison de fortune sus haulciez.

¶ Mais apres ta mort vendra le prince plain de valour et sagece qui par la relacion de tes volumes desirera tes jours avoir esté de son temps et par grant desir souhaidera t’avoir veue Si me suis a toy descripte/ Or diffinis de moy ce que il t’en semble.

¶ Et moy a elle dame comme la descripcion de vous meismes/ m’en appreigne la diffinitive. Je dis que comme parfaictement/ ore vous cognoisce/ que vous voirement estes de ignorence fille adhesion a une partie en doubtant tous jours de l’autre/ Et de ce je m’avise ce que de vous dit aristote ou premier livre de posteres que cellui qui vous a doubté tous jours que autrement puist estre que ce que il pense/ comme vous soiés non certaine/ Et saint bernard dit aussi ou .v.^e chapitre de consideracion que vous estes ambiguë et povez estre deceue/ Si dis et conclus que vous estes adhesion a une partie/ la quelle adhesion est causee de l’aparance de aucune raison prouvable soit que l’oppinant ait doubte de l’autre partie soit que non/ de vostre poissance je dis que pour l’ignorence qui est es hommes que par vous est plus le monde gouverné que par grant savoir.

Explicit la .ii.^e partie du livre de l’avision christine.