L'Archi-Sot, echo satyrique[29].
Reading edition
L'Archi-Sot, echo satyrique[29].
Omne regnum in se divisum desolabitur.
Quatrain.
Pouvres sots, pourquoy laissez-vous Un prince quy par trop vous aime?
Responce.
Ne sçavez-vous pas que les fous Ne se cognoissent pas eux-mesme?
MDCV. In-8.
Je ne sçaurois trouver ceste charge onereuse: Si c'est vostre plaisir, c'est mon contentement. Aussy je l'entreprends, et la peine est heureuse, Puisqu'elle a pour soutien vostre commandement.
Nous savons son pays, ses parens et sa race, Non ce qu'ores ils sont, mais ce qu'ils ont esté, Et si son entretien, ses pompes, son audace, Sympathisent au moins avec sa qualité.
O Dieu! quy de là-hault contemplez tant de courses Et donnez tout à coup arrest aux charlatans, Ou vous, dieux des fripons et des coupeurs de bourses, Donnez-moy promptement le secours que j'attends.
Apprenez-moy bientost, non pas vostre pratique, Mais quels sont les parens de vostre favory, Afin que, le chantant d'un esprit prophetique, Je fasse voir à tous que vous l'avez chery.
A quy m'adresseray-je, ô dieux! je vous supplie? Si je suis obligé, vous sçavez bien pourquoy. Hé! quy voudra de vous ayder à mon envie Et m'oster maintenant d'un si fascheux esmoy? Echo.—Moi.
Peut bien estre vrayment que saint Innocent mesme, Non tant comme patron que comme son voisin, Me desire advenir (sçachant bien que je l'ayme) Que pour estre des siens il est un peu trop fin.
Car la fille de l'air ne seroit pas logée Parmy les Innocens du quartier Saint-Denys. Il est vray que peut-estre elle s'y est rengée Pour voir nostre badin, qu'elle prend pour Narcys.
Je me ry, belle Nymphe, et repare mon crime. J'ay tort, je le sçay bien, j'ay prophané ton nom; Mais je l'auray vrayment desormais en estime. Regardes si tu veux que je m'en aille ou non. Echo.—Non.
Elegie.
Stances.
La terre me portoit, l'air prenoit ma parolle, Et les cieux mes desirs, des dieux favorisez; Au bruict de votre nom les postillons d'Eole Furent (bien que mutins) à l'instant apaisez.
Si bien que j'escoutois d'Echo la resonnance Et recevois des dieux les revelations: Grand pouvoir de vos yeux, dont la seule ordonnance Faict reserrer les vents dedans leurs regions.
Je suis donc faict savant au gré de vostre envie, De mille plaisans traicts qu'a faict nostre courtaut, Et l'Echo m'a conté qu'il y va de sa vie Si, pour s'en exempter, il ne gaigne le haut.
Mais, pour ce que je voy la matière un peu grande Et qu'il y faut donner du temps et du loisir, Je vous veux supplier d'accorder ma demande Et remettre à demain ce discours de plaisir.
Aussy bien je cognois que ce que j'en sçay touche A ce pauvre chastré dont tout le monde rit: C'est pourquoy j'ayme mieux vous le dire de bouche, Pour le favoriser, que non pas par escrit.
Sonnet. Allusion sur le nom du protecteur de l'Archi-Sot.
Hé bien! te voilà donc plongé dans une fange Dont tu ne peux sortir si tu n'as mon secours! Dis ce que tu voudras, il faudra que tu manges Le remède appresté contre tes beaux discours.
Beau fils, dont le visage est pareil au lard jaulne, Ton pouvoir se mesure à la longueur d'une aulne, Dont tu ne peux juger que la fin soit le bout.
Tu sais bien que je puis apaiser ton audace; Si ma parolle a peu te bannir d'une place, Gardes que mes escrits ne t'exhilent du tout.
