Volume 5 — [3] Brieve Relation dv Voyage de la Novvelle France.

[3] Brieve Relation dv Voyage de la Novvelle France.

Mon R. Pere, Estant aduerti de vostre part, le dernier iour de Mars, qu'il falloit au plustost m'embarquer au Haure de grace, pour tirer droit à la Nouuelle France: l'aise & le contentement que i'en resenti en mon ame fut si grand, que de vingt ans ie ne pense pas en auoir eu vn pareil, ny qu'aucune lettre m'ait esté tant agreable. Ie sorti de Dieppe le lendemain, & passant à Roüen, nous [4] nous ioignimes de compagnie le Pere de Nouë, nostre Frere Gilbert & moy. Estans au Haure nous allasmes saluër monsieur du Pont, neueu de Monseigneur le Cardinal, lequel nous donna vn escrit signé de sa main, par lequel il témoignoit que c'estoit la volonté de mondit Seigneur que nous passassions en la Nouuelle France. Nous auons vne singuliere obligation à la charité de de monsieur le Curé du Haure, & des Meres Vrsulines; Car comme nous n'auions point preueu nostre depart, si le Pere Charles Lallemant à Roüen, & ces honnestes personnes au Haure ne nous eussent assistez dans l'empressement, où nous nous trouuions, sans doute nous estions mal. Du Haure nous tirames à Honfleur, & le iour de Quasimodo 18. d'Auril nous fimes voile.