Volume 4 — Lettre du R. P. Charles Lallemant Superievr des Missions en Canada au Sievr de Champlain.

[868] MONSIEVR,

Nous voicy graces à Dieu dans le resort de vostre Lieutenance où nous sommes heureusement arriuez, aprés auoir eu vne des belles trauerses [869] qu'on aye encor experimenté. Monsieur le General aprés nous auoir declaré qu'il luy estoit impossible de nous loger ou dans l'habitation où dans le fort, & qu'il faudroit ou, repasser en France, ou nous retirer chez les Peres Recollects, nous a contrainct d'accepter ce dernier offre. Les Peres nous ont receus auec tant de charité qu'il nous ont obligez pour vn iamais. Nostre Seigneur sera leur recompence. Vn de nos Peres estoit allé à la traicte en intention de passer aux Hurons ou aux Hiroquois, auec le Pere Recollect qui est venu de Frãce, selon qu'ils aduiseroient auec le Pere Nicolas, qui se deuoit treuuer à la traicte & conferer auec eux, mais il est arriué que le pauure Pere Nicolas au dernier saut s'est noyé, ce qui a esté cause qu'ils sont retournez, n'ayans ny cognoissance, ny langue, ny information: nous attendons donc vostre venuë, pour resoudre ce qui sera à propos de faire. Vous sçaurez tout ce que vous pourrez desirer de ce pays du P. Ioseph, c'est pourquoy ie me contente de vous asseurer que ie suis,

Monsieur, Vostre tres-affectionné seruiteur,

Charles Lalemant.

De Kebec ce 28. Iuillet 1625.