Front matter (continued 2)

Quharfor the Autour of this Buke prayis and requeris, and mekely makis supplicacioun to the Magestee Ryall, and till all the company of the Nobless and Chyualrye of the Realme, that thai assemble thame togidder, and mak reformacioun of this grete fault that is maid to the Noble Ordre, and the grete wrang that is done till it, in the fault of doctrine and teching of the poyntis and propereteis of Noblesse, etc.

TERTIUM CAPITULUM.

HOW SEN THE DOCTOURE HAS DECLARIT IN SUM PART THE POYNTIS OF THE ORDRE WITH THE PROPERETEIS AND CONDICIOUNS,—NOW LYKIS IT HIM TO SPEKE OF THE OFFICE THAT FOLLOWIS THE SAID ORDRE:—

hat is to say, to quhat purpos it was ordanyt—to quhat fyne—and quhat entencioun: And how gif Knychtis vss nocht thair office, thai ar contrarius to thair Ordre, and to the begynning of thair awin making: ffor the quhilk caus he is nocht veray Knycht in dede, supposs he bere the name; ffor sik Knychtis ar mare villayns na is outhir smyth, wrycht, or masoun, that dois thair craft, as thai ar techit, and tharefor to schaw the poyntis of the Ordre is grete meryt to thame that wate it nocht: the quhilkis he declaris here efterwart; and first and formast, Knychthede was ordanyit to manetene and defend Haly Kirk, and the Faith, for the quhilk God, the Fader of Hevyn, send his Sone in this warld, to tak in him oure humanitee, fleschly inumbrit, and incarnate in the glorious Virgyne Mary, his suete moder, be the joyfull message brocht till hir be the angel Gabriel; and fyne for our sakis, and to synde vs of the origynale syn, and to geve vs eternale lyf, tuke dede and passioun here, with grete dispising vilaynous, to geue vs ensample and informacioun how we suld reule oure lyfing here: Quhilk ordanyt all writtis for oure teching and doctrine; and all his werkis and dedis here, he did for oure ensample and enformyng, to multiply his faith. And thus, rycht as he has chosin to growe and manetene his fayth, the worthi and wys clerkis to hald scolis, and ilkane to teche othir be the haly wryttis of prophecies and of lawis aganis the inymyes of the Faith: Rycht sa the hye glorious God chesit Knychtis to be his campiouns, sa that the unworthy mystrowaris and rebellouris agaynis his faith mycht be throu thame chastisit, be force of armes to vencuss and ourecum his inymyes, the quhilkis every day forss thame at thair powar to put doun the fayth of Haly Kirk, and thir Knychtis that thus occupyis thame in the defense of his rychtis ar callit his Knychtis of Honour in this warld, and in the tothir, that defendis the Haly Kirk and the Cristyn Faith, quhilk is oure saule hele and salvacioun. And tharefore Knychtis that has faith and baptesme in him, and usis nocht the vertues and properteis of the faith, ar contrarius till otheris that kepis the faith, evyn as a man that God hes gevin till resoun, and discrecioun, and he dois evyn the contrary. Thus he that has faith, and kepis it nocht, is contrarius till himself, for he wald be sauf, and gais nocht the hye gate till his salvacioun: ffor quhy, his will discordis with his witt, and ledis it the way of mystreuth, that is agayne his salvacioun, and ledis him to the way of eternale dampnacioun; and syk men takis the office and ordre, mare to be prisit and honourit in this warld, na for any prouffit that thai think to do to God, na to thair Prince that gave thame the office. Bot the maist noble officeris and ordres in this erd ar office and ordre of Clerkis and of Knychtis, and the best lufe in this erde is ay betuix thame; and tharfore rycht as Clergy was nocht ordanyt to be agayn the Ordre of Knychthede, bot to honoure it, and thame that worthily beris it, sa suld Knychtis nocht be aganis the haly ordre and office of Clergy, to manetene worschip and defend it, aganis the rebellouris and euill willaris of the Kirk, that are callit Sonis of Iniquitee, as thai ar oblist in taking of the said Ordre of Knychthede: ffor a man is nocht anerly oblist to lufe his ordre, bot he is oblist with that to lufe thame that be othir ordres vnder his awin lord; for to lufe his ordre, and nocht to lufe the caus that his ordre is ordanyt for; ffor syk lufe is nocht ordere lyke, ffor God has ordanyt nane ordre vnder him to be contrair till ane othir; and as to that thare is ordres of religious that few of thame lufis ane othir, and ȝit lufis well thair awin ordre; bot that is nocht the rycht ordre of lufe and charitee, that suld be in religious: And rycht sa a Knycht suld nocht samekle lufe his awin ordre, that he myslufe othere ordres, ffor that war aganis God, and gude faith; ffor the Ordre of Knychthede is sa hye, that quhen a King makis a knycht, he sulde mak him lord and governour of grete landis and contreis, efter his worthines, and all Knychtis suld think that there is a Lord and syre aboue all knychtis, ffor the honour of quham thai ar all made Knychtis for to do his will, and serue him fyrst, and syne thair temporale lordis.

Item, the Emperour aw to be Knycht, in significance that he is Lord and syre of all Knychtis in temporalities: And becaus that the Emperour may nocht mak na gouerne all Knychtis, thare was ordanyt Kingis, to be subordinate persons, next efter Emperouris, to gouerne realmes and contreis the quhilkis suld alssua be knychtis, sa that thai may mak knychtis, ffor na man may mak knychtis bot he be Knycht before, sauffand the Pape: alssua all kingis suld have vnder thame Dukkis and Princis, Erllis and Vicountes, and Vauvassouris and Barouns; and vnder the Barouns Knychtis of a schelde, the quhilkis suld gouerne thame be the ordynance of the Barouns that ar in the hyare degree of Knychthede, before namyt: And that gerris he [him] multiply knychtis in takenyng that na King, bot he may na can gouerne all the generalitee of Knychtis in erd, ffor thare is nouthir Emperoure, na King, that can, na may in his regne gouerne all his subditis but help of his Knychtis: bot the King of Glore can wele allane but othir power, na of his awin vertu and majestie, can and may gouerne and reugle all this erde, and all the hevin, at his awin plesaunce, the quhilk is ane anerly God allane in Trinitee and Vnitee; and tharfor wald he nocht that ony Knycht allane mycht mak a knycht that suld gouerne all the knychtis of this warld bot he allane; and tharfore ordanyt he in this warld mony of Knychtis to be, that his Magestee may the better be knawin, and that Kingis and Princis suld mak officeris vnder thame of Knychtis. And forthy dois a King or a Prince grete wrang to the Ordre of Knychthede quhen he makis othir sereffis, baillies, or prouostis of othir lawlyar men na knychtis; ffor than ar Kingis and Princis caus of the abusioun of the Ordre of Knychthede, quhilk was ordanyt for sik caus: ffor that Ordre was ordanyt to be substitute till Princis and Kingis, apon the gouernement of the peple, as maist worthy and maist honourable for sik gouernaunce of small peple; and aboue thame Dukis, Erllis, and Barouns; and aboue thai Kingis and Princis; and aboue Princis and Kingis allenerlye Emperouris and Papis. And thus suld the warld be gouvernyt be commoun reugle of gouernance, sauffand Kingis that ar priuilegit or prescribit in thaire power imperiale: and thus Knychthede is the hyest temporale Ordre that is in the warld; but nocht the hiest office: ffor Kingis and Emperouris is nocht Ordre, bot it is office; be the quhilk office thai precell aboue all othir officis of temporalitee, as Dukis, Countes, Marquis, Vauvasour, Baroun, and Knychtis; and supposs, of all officis of honourabilitee, the Knychtis office be the lawast office of dignitee vnder Imperiale or Ryale magestee, neuertheles the Ordre is hyest and maist honourable; ffor quhy, that all Emperouris and Kingis aw to bere that Ordre, or ellis thair dignitee is nocht perfyte, ffor ellis may thai mak na Knychtis. And be honourabilitee of the Ordre of Knychthede grete honour is ordanyt be the lawis to do to Knychtis, and be nobless of honour that is put till him, he suld haue nobless of vertues, and worthyness in his curage; be the quhilk nobless of curage he suld be less inclynit till all wikkitness, and all vicis of barat, and trechery, and othir villain condiciouns, na ony othir persone.

The office alssua of Knychthede aw to defend his naturale Lord, and manetene him; ffor a King is bot a man allane but his men; and but tham thare may na King gouerne, na deffend his peple, na ȝit nane othir Lord, ffor thai ar bot synglere persons; and thus, gif ony man be aganis the Magestee or othir Lordis of the temporalitee, the Knychtis suld help him to defend and manetene his rychtis. Bot commonly ane euill wikkit Knycht takis party contrair with a Kingis subditis agayne himself, ffor he wald haue his Lord put doun, that he mycht haue sum part of the lordschip; bot than wirkis he agayne his awin ordre, and office that he is ordaynit for; that is ane, the faith of Jhesu Crist; ane othir, his natural Lord; the third, the peple in thair richtis: ffor the Knychtis ar adettit to manetene and defend justice; ffor rycht as a juge has powar be his office to juge and geue a sentence, rycht sa has he poware to kepe his jugementis fra fors and fra wrang and violence, in excercisioun and in execucioun of his jugement and sentence. And becaus that till jugement of caus pertenis wele wisdome and discrecioun of Clergy to knaw the lawis, it is a noble thing quhen Knychthede and Clergy is assemblit togedir, sa that Knychtis war clerkis and wele letterit men, sa that thai war the mare sufficiand to be jugis be the knaulage of science of lawis, ffor than war thare na man mare worthy na hable till to be a juge, na a Knycht clerk: ffor bot science of Clergy to knaw the lawis, thare is na man worthy to bere office of justice. Knychtis suld be wele ryddin, and in ȝouthede lere to be wele ryddin, on destrellis and courseris, till haunte justis and tournaymentis, to hald Table Round, to hunt and hauk at hert and hynde, daa and raa, bere and baare, loup and lyoun, and all sik honourable plesauncis, and sa mayntenand the office and the Ordre of Knychthede worthily: And as all thir propereteis before said pertenis till a Knycht, as to the habilnes of his corps, rycht sa is thare othir propereteis pertenand to the saule; as justice, force, prudence, and temperaunce, charitee and veritee, lautee and humilitee, faith, esperaunce, subtilitee, agilitee, and with all othir vertues touchand to wisdome, appertenis till him, as to the saule; and forthy, when a Knycht has all strenthis and habiliteis that appertenis to the corps, and has nocht thame that appertenis to the saule, he is nocht verray Knicht, bot is contrarius to the Ordre, and inymy of Knichthede: ffor than it war lyke that Knychthede war contrarius to the saule behufe; the quhilk is fals, ffor the principale caus of the Ordre is to the manetenaunce of the Cristyn faith, and of all vertues, and inymy to vicis.

Item, Office of Knychtis is to manetene and gouerne landis and policy, and to defend thame; ffor the raddour and the drede that the peple has of the Knychtis, thai byde apon thair craftis and labouragis, and grathis lyfing for the Lordis, for dout to be vndone, destroyit, and desertit; and thus ar the Kingis dred for the Knychtis. And thare, sais the Doctour, that a fals Knycht, that will nocht help to defend his King and his Lord naturale, is lyke faith bot gude charitable workis, or Knychthede tume and idill bot office, or heretike aganis the faith. And thus a fals Knycht that is vntrewe, that dois nocht the bidding of his Prince, and is contrarius till his biddingis and opyniouns, dois grete wrang to the Knychtis that fechtis to the dede for justice, and for the faith, and for his Prince, and his naturale Lord, and is worthy to be punyst vtterly: ffor thare is na Ordre na office that is maid bot it may be vnmaid, or ellis Goddis mycht war bot small; and than, sen the Ordre of Knychthede was ordanyt be God Almychty, and gouernyt and manetenyt be thame that beris the said Ordre, gif thai that suld gouerne the said Ordre, and manetene it, misgouernys it, and dois the contraire, the Ordre is lytill behaldyn to thame, ffor thai vndo the Ordre. And thus the wikkit King vndois nocht anerly the Ordere of Knychthede in himself, bot alssua he vndois it in his Knychtis quhen he gerris thame do aganis the Ordre, outhir be euill ensample that he gevis thame, doand thingis that ar aganis the said Ordre, or be flatery that thai mak to thair wikkit maister, and fals suggestioun to ger thame be lufit of him, knawand that he is euill sett and will redily trow euill talis. And all thus gif it be euill done, to gerr a Knycht be misgouernyt, and mysfarne throu euill gouernaunce. It is mekle were done to misgouerne mony Knychtis, as thir wikkit princis dois, that all the charge of the misgouernaunce of all the Knychtis of his realme is be his default and negligence, or that thai be sa wikkit in thame self, that thai geve him vnworthy counsale, to do apon his subjectis extorsiouns, be wikkitness of tyrannye, or of barate or trechery, tresone to thair naturale lordis, or vnleautee till his subditis, be force of thair wikkit curage; and than is syk a Prince mekle to prise and to love, that knawis syk trychouris, and trompouris and vnworthy traytouris, that beris waste name of Knychthede, that wald counsale him, and tyce him to forffet and vndo the worthy and noble Ordre of Knychthede, that he has sa honourably tane, and worthily hydertillis has manetenyt; mekle honour and worschip is in his curage of the Prince that sa dois, and mekle suld be lufit with thame that beris the Ordre worthily, quhen he takis sik vengeaunce of the inymyes of the Ordre, that throu thair wikkit counsale wald corrumpe his noble curage.

Item, the Order of Knychthede standis in the corage, and nocht in the corssage, ffor ellis war the Ordre litill worth; ffor quhy? A lytill persone may quhilum throu habilitee of corps oure cum a mekle, and tak him, and enprisone him. Bot a thousand men, suppos thai be neuer sa stark, may nocht oure cum na vencus a gude Knychtis curage. And thus is the Ordre of Knychthede mare worthily in the curage na in the corssage, ffor ellis war nocht that the Knychthede accordit better to the body na to the saule. And be that, the vnworthy cowartis Knychtis that fleis in bataillis fra thair lordis ar nocht worthy to be callit Knychtis, na to bere the honour that to worthy knychtis efferis, ffor thai drede mare the distroublaunce and maless of thair corssage, na the honoure and worschip of thair curage that appertenis to the Ordre of Knychthede of rycht. And thus nobless of curage is better pertenand to Knychtis na is force of corssage, or ellis suerenes and cowardise in mannis persone suld be of the propereteis of the Ordre. And hardynes and largess suld be contrarius till it, and that war mekle vnresone; bot be all gude way of ordere, quhen a gude Knycht is oure sett with oure grete powar, and lesse has of help and of falouschip to supple him, in sa mekle suld he haue mare hye curage and mare force of spirit, to oure cum all his aduersaris; and gif he be oure thrawin, till manetene the poyntis and propercteis of the worthy Ordre of Knychthede, than has he optenyt the honour and the loss of the worschipfull reward and meryt of justice, that deis for the defenss of the rycht, and manetenaunce of the worschipfull and meritable poyntis of the Ordre, as he that deis for lufe and leautee, and honoure of the noble Ordre that he was ordanyt to. For the wise man sais, That Knychthede and hardynesse may neuer langsumly dwell togider bot wisedome and wise discrecion; ffor quhare na wisdome na discrecione restis, how suld thare be knaulage of honoure. Na, how suld that persone discerne betuix honorable and dishonorable act or vndertaking of worschip, quhare wisdome is away, ffor wisdome will never mare mak fault till his honoure. And forthy, is it signifyit till all Knychtis of honour, that a Knycht may neuer be hardy, na haue the vertues that to Knychthede suld pertene, bot he haue wisedome in him; na thare is na man that may sa mekle honour do till his Ordre of Knychthede, as to stand to the vtterest with stark curage for the rycht fermely, and neuer consent to leve his lord; na his rychtwise actioun to dee tharfore; and treuly that mon be reuglit with witt and resoun, and nocht be foly na ignoraunce; ffor quhen foly and ignoraunce is with the Ordere of Knychthede, wit and resone, knaulage and discrecioun, ar flemyt thairfra; ffor wisedome, resoun, and discrecioun ar the ledaris and gouernouris of Cheualrye bathe in Knycht, King, and Emperoure, and but wisedome the Order is peruertit; ffor inpossible thing it is, that foly and ignoraunce gouerne that worthy Ordre. And than mon it on nede force be gouernyt be wisedome, and thus is it, that sen the Ordre is reuglit be witt and wisedome, than suld all gude Knychtis pres them to be wyse, and sett tharon all thair hert and mynde; the quhilk makis Knycht sa curageus, that he doubtis nocht the dede, in regarde of honoure and his rychtwise cause, that he may lufe and honour his Ordre, to sauf bathe saule and honour, in the contrair of foly and ignoraunce.

Item, Office of Knychthede is to mantene and defend wedowis, maidenis, faderles and moderles barnis, and pore miserable persouns and piteable, and to help the wayke agayne the stark, and the pure agayne the riche; ffor ofttymes sik folk ar be mare stark na thai pelit and derobbit, and thaire gudis tane, and put to destructioun and pouertie, for fault of powere and defence. And becaus all sik dedis is wikkitnes, crueltee, and tyranny, tharfore is the Ordre of Knychthede ordanyt, as in that poynt amang the lave, to gaynstand. And gif a Knycht himself be the manetenar or doare of thir thingis, he is vnworthy to bere the Ordre for his wikkitnes. And rycht as God has gevin to the Knycht pithe, hardynes, and hye curage, rycht sa has he gevin him pitee in hert, to haue merci of the pure that gretis on him; askand help and consort for traist that thai haue in thame of help. And thus suld a Knycht haue gude sicht to the miserable persouns, gude eris to here thame, and gude mynde to think on thame, that pitously cryis apon him for help and confourt. And he that has nocht thir vertues, is nocht verray Knicht, na suld nocht be comptit as ane of the Ordere of Knychthede. Alsua, and the office of Knichthede, that sa mekle is lufit and presit and honourit, war till derub and destroy the pore folk and all sik peaceable persouns, and till desaue wedowis, that has na defence bot God and the Office of Knychthede, and till mysgouerne in thair gudis and heritagis, and dissaue the faderles and moderles barnis, and all thing that war falsate, barate, wikkitnes and trechery, war poyntis of the said office, and the office war alsmekle honourit for euill dedis, and wickit lyfing, as it is now for gude dedis, thare suld ma press to tak the said Ordre and office na thare dois now; ffor be cause that the Ordre is founded apon lautee, curtaisy, liberalitee, lufe, and pitee, many of thame that beris the said Ordre irkis tharof in the warld that now is.

For the office of Knychthede suld have stark place in gouernaunce, and he suld be wele horsit, and haue power of men to kepe the contree and the Kingis wayis, all pilgrymes, trauailouris, merchandis, labouraris, and suld haue the jurisdictioun of justice in citeis and townis; and quhen nede war, to assemble the folk for the prouffit of the commountee; and quhen perilis war apperand in the landis, to byrn mysal housis, and destroye perilous passagis, ger hag woddis, and byg and mak reparacioun of euill biggit placis, castellis, and wallit townis and fortressis, and kepe and defend all gudely persouns; chastyse and punyse all misdoaris and wikkit cruell persouns; ffor and the contrary of thir gude poyntis war approprit to the Ordre, than all gude gouernance wald faile, and na man wald be seur; ffor the office is foundit ay on gude and prouffitable werkis that ar spede full to the commoun prouffit, and to gaynstand all thame that settis thame for the distrublaunce of the pore peple, and hyndering of the commoun prouffit, and to put down euill and wikkit men, and to fauour, nurise, and manetene gude peple: ffor rycht as the hewing ax is ordanyt to cutt doun treis that hynderis labouragis of landis, and cartis and chariotis and merchandices to passe through the forestis, sa is the suerd of Knychthede ordanyt to kutt away and destroye the wickkit vnworthy wedis and ronnis of thornis of euill men that lettis labouraris, merchandis, and traualouris to trauale throu the warld, quhilk is as a forest and wildernes quhen it is not wele redde; off the quhilk euill men suld be wedit out be Knychtis, keparis of the lawe, that gude men mycht lyve in lee; and he that is a Knycht, and dois nocht this, bot dois evyn the contrary, suld be tane be the Prince, or be othir worthy, faithfull, and honourable Knychtis, and put till dede; ffor quhen a Knycht is a revare, or a thef, or a traytour or a murtherar, or a Lollard, scismatike or heretike, or in syk termys opinly knawin and approuit, than is he vnworthy for to lyve, bot to be punyst in example of otheris that defoulis that maist noble and worthy Ordre, and abusit it aganis the poyntis and the propereteis of the Ordre; ffor it war better to syk a Knycht to ȝelde him selfe to justice to be punyst, with mortall punycion, na to lyve in sik misordinate lyf for to vndo himself, and otheris mony, quhilk lesse euill war that he war vndone allane, and lesse charge till his saule: ffor gif a knycht or a lord haue all thir forenamyt vicis in him or any part of thame, and wald punyse otheris, and will nocht punyse himself, that is nocht the rycht way of justice; ffor gude justice begynnis at it selfe, and syne at othir men, ffor grete lak is to reproue and correct otheris in that, that he is foulare smyttit him self; quhilk gif he will nocht do, othir Knychtis suld do for honoure of thair Ordre, till hald it euir in honoure and worschip, as wele efferis it to be. And all Knychtis that fauouris syk cruell dedis, and gerris nocht punyse thame, thai ar foule in the dede as the doaris of thame; ffor syk men ar nocht verray Knychtis, bot feigned beris the Ordre, and dois nocht the office; ffor rycht as a Knycht had a hurt in ane of his handis, that hurt is mare nere and dere, to the laue of his othir membris, na it is to me or ane othir man, and erar efferis till him to sett remede tharein. And rycht sa, gif a Knycht mysgouernis him in syk kynde that he be othir thef, or traytour, revar, or murderar, it appertenis mare till othir knychtis to sett thare in remede, na it dois till otheris that ar na knychtis; ffor all knychtis ar, and suld be as a cors. And thare ffore, knychtis has mare wite of the mysgouernaunce of othir knychtis na ony othir man has, and mare dishonoure alssua na men that ar na knychtis; ffor it is thair default, sen the correctioun efferis to the Order and to the Office; ffor quhy, he is inymy to the Ordre that sa gouernys: And than suld it wele effere to the Order to punyse thair inymyes. Quharefore, thou that art a Knycht, and will correk otheris defaultis, correk thine awin faultis fyrst: ffor a traytour, thef, or revare Knycht, he is alssua thef, traytour, and revare till his Order that revis at the worschip and the honoure that appertenis till it, mare na to reve othir mennis gudis; ffor he that stelis or revis honour fra ony persone, bringis him hame schame and dishonoure and euill renoune; quhilkis honoure passis all richess. Quhat difference is thare, to gude vnderstanding, till a traytour that betraisis his awin Lord naturale, or his castell, or his wyf, or his douchter, or his eldest sone, or slais his counsale and murderis thame, or sik dedis dois, in regard of him that euer was lele and trewe in all thir thingis, and deis for his Lord in bataill place. And alssua quhen a Knycht defendis ane othir that is false and traytoure till his Prince or his naturale Lord, and will nocht thole him cum to justice, nor na punycione to be done apon him, he is were na he that did the dede: and the Ordre of Knychthede is dishonourit in his persone, that manetenis, and will nocht bring to justice a false traytour; and vnworthy war that he had justice in keping.

Ane othir poynt of the Office of the Knychthede is, to accuse traytouris aganis his prince, or otheris that it efferis, and till appelle thame of bataill, and feicht wyth thame: And office of traytour is, to deny his tresone, and hyde it, and cover it, quhill he may, and eschewe all prufis tharof; and thus ar the twa curagis wele contrarius togidder, that neuer curage of traytour mycht ourcum ane noble curage of a trew Knycht; bot gif it be throw pride or surquidy, that is callit oure presumptuouse in himself: the quhilk God tholes quhilom be punyst in bataill place. Bot the curage of a lele Knycht, that for a lele cause debatis, may nocht be oure cummyn, bot gif it be for sum syn agaynis the Ordre of Knychthede: ffor gif a Knycht wald reve fra the small peple the gude that God has gevin thame, and geve it till otheris that he aw nocht to, that war agayne the Office of Knychthede, to tak fra laware na himself outhir moble gudis or possessiouns, and hald it as heretage till him, nocht gevand, na restorand agayn; he may be lyknyt to the wolf that the lord gave the schepe to kepe to, as till a familyar faa; or he may be lyknyt till a fule lorde that left his faire wyf in keping till a ȝong traytour knycht; or he that left his stark castell and his gudis till a bitter cuvatous knycht, vntrew knycht; and thus is he mekle to wyte that gevis his castell, or his wyf, or his schepe, in syk gouernaunce; or how ane othir suld traist his gouernaunce in him that gouernis nocht wele himself? ffor thir ar thingis that men suld nocht put in misgouernaunce of fule men, his faire wyf, his castell, and his moble gudis; ffor commonly syk men that begylis thair lordis may neuer be reformyt na redressit till lautee, na till honour of Knychthede.

Item, Ane othir poynt of the Office of Knychthede is, to hald his armouris cleine and faire, and wele at poynt, and to se wele to the gouernaunce of his horse, and nocht to play thame at playes of dice, and of tabilles, and othir licht playis, quhilkis ar nocht contenyt in the poyntis of the Ordre: ffor it is forbedyn in the lawis to mak ony ath contrary to the Ordre of Knychthede, na to the Office; and he that puttis doune the principale thingis quhare with the Ordre and Office is haldyn at honoure and worschip, throw lycht playes or uthir wayis, he honouris nocht wele his Ordre; ffor Knycht in weris, but horse and harnais, is lytill presit; and sen it is sa, that God and man acordit in the poyntis of the Ordre of Knychthede that na false aythis suld be tharein, na in thame that gouernis the said Ordre, suld than nane be.

Item, Lordis na Knychtis suld nocht brek the ath of mariage throw misordynate lechery, ffor that is a poynt that discordis with the poyntis of the Ordre; ffor thare is thre gree of chastitee, the quhilkis all honourable persouns ar behaldin till, that is, ane in mariage, ane in wedowhede, and ane in maidynhede that is callit virginitee; of quhilk the Haly Writt biddis thame that may nocht lyve chaste, mary thame, and syne kepe thair maryage; ffor gif thai do nocht, and thai brek mariage, that brekis thair aithe to godwart, the quhilk is agayn the Ordre and Office of Knychthede; ffor chastitee is vertu, and misordanyt lechery is vice: And thus sen all vertu folowis the Ordre, and all vice discordis with it, it syttis wele that princis, lordis, and knychtis kepe honour in that poynt, and namely, nocht to forffet to thair mariage.

Item, Justice and Knychthede acordis togeder, and justice and mariage, bresing and othir disordinate lechery discordis with justice; and thus Knychthede and disordanyt lechery discordis, as apperis be the lawis of Haly Kirk, quhilkis efferis prelatis to correct: And thus gif a prince, or a lord, or a knycht brekis mariage, he is mare to blame na ony of lawer degree; ffor the hyar degree the gretter fault, and mare to be punyst in all excessis of vertu.

Item, Ane othir poynt of Knychthede is, that a Knycht suld be meke and full of clemence, and nocht prydy, na presumptuouse, na orguillouse; ffor oft tymes of pryde and orguille and presumpcione cummys injure and discensione; ffor orguille is contrary to justice, and inymy to concord; and tharfore, thare suld na Knycht be hautayn, na feir, na prydefull, na presumptuouse, bot euer with mekenes, and clemence, and humilitee, be symple as a may amang peple, and in his inymyes presence be as lyone rampand; ffor quhat ever he be, that be full of pryde and presumptuousnes, amang vertuous men is repute nocht, for thai ar contrarius to pes and concorde, and pes and concorde ar contrarius to justice. And sa is pride aganis the poyntis of the Ordre. And humilitee is the rute of the stedefastnes of Knychthede; ffor schortly to say, Knychthede acordis till all vertu and justice, and all thingis that ar contrariouse to virtu and justice ar contrariouse to the Ordere and Office of Knychthede: ffor Knychthede suld defend all injuris and wrangis, all pilleries, wrang, weris, and tribulaciouns, and suld hald the peple in all justice, equitee, veritee, and lautee, pes and debonairetee, and outsched the wikkit fra the gude peple pesable; quhilkis, gif thai do nocht, bot dois the contrarye in thair governaunce, thai ar contrarius to thair Ordere, and worthy to be punyst. Bot thare is nane that all knawis, na all may punyse, bot the Emperoure, the quhilk ordanyt Knychthede spirituale, to kepe justice, ordinare, be reugle vertuouse, in pes and concorde, and justice rigorouse, that is, the Ordre of Knychthede, quhilk suld on force compell euill men, and of wikkit lyf, to desist and cesse fra thair wikkitnesse, and punyse thame tharfore: And thus is thare Knychtis of pes and concorde amorouse, and be reugle of justice, to mak gud reugle and gracious concorde and gouernaunce in the peple; and alssua Knychtis of the justice rigorouse, ordanyt to compelle be fors of armes all tyrannis, traytouris, and all othir mysdoaris, and cruell tormentouris of the haly labouraris, kirk men, merchandis, and traualouris, to cesse and desist fra thair wikkitnesse. The quhilkis Knychtis suld be full of vertues, and gude lyf, to geue otheris ensample.

QUARTUM CAPITULUM.

HERE SPEKIS THE DOCTOURE OF THE EXAMINACIOUN OF THE SQUYER, WHILK SULD ENTER IN THE ORDER NEWLY OF KNYCHTHEDE.

ayand, That he suld be first examynyt be ane alde Knycht that knewe and lufit wele the said Order atoure all thing, next to God: ffor thare is mony Princis that rekkis nocht quhat maner of condicioune na of lyf his Knichtis be, sa that he haue grete nomber of Knychtis in his company. Bot it suld nocht be sa: ffor Knychthede takis na hede to multitude bot to noblesse of cheualrye, and of curage, and of gude thewis, that we haue before spokyn of; and tharefore, gif he that is examynour lufys better multitude, na noblesse of curage and of vertu, he is nocht worthy to be examynoure of Squyeris, bot suld be reprovit and punyst be the Prince of Knychthede, of his defoulyng of the Order of Knychthede: and first and foremast it suld be sperit, Gif he trowis, lufis, and doubtis God? but quhilk poynt is na man worthy till nane order of Noblesse. Item, Gif he dredis the defaultis to do, that dishonouris the Order? and thus Squier, but lufe and but drede to do mys, is unworthy to the Ordre. And gif he takis it agayne thir propereteis and condiciouns, he wenis he takis honour till him, bot he takis dishonour; ffor a Squyer but noblesse is nocht worthy to sa hye honour, as to the worthy honour of Knychthede; na ȝit in the weris of his prince or otheris, but horse, armouris, and sik men, ar nocht habil to wyn honour in armes, ffor men may nocht mare cruelly destroye the noble Order of Knychthede, na till haue ane vnworthy examynoure of the Squier that suld enter in the said Ordre; ffor gif he admytt to the Ordre a man of vnworthy curage, that is destructione of the Ordre; and suld a Squier examyne himself first, and think on the mony noble propereteis and condiciouns of the Ordre, to think in him self gif he war worthy, or he put him to the examnacioune. Rycht as Scholaris examynit to be Prestis or greid in scholis, suld nocht sett thame thar fore, bot thai fand thame worthy tharfore, ffor dout thai war repellit, or ellis defoulit thair greis; rycht sa suld Bachelere Squieris in the examinacioune of the Order of Knychthede, ffor he suld nocht alssua ask the Ordre that he wald eftir deffoule be his euill thewis. And alssua Lordis that ar sa informyt, that thai will mak sik men Knychtis, thai do aganis the poyntis of the Ordre, and chargis thair consciences; ffor men knawis nocht noblesse of curage in fair wordis, bot in worthy werkis: Na nocht in faire clething, ffor oft tymes vnder a faire habyte may be a full false hert, full of barate, trechery, and traysoune; na he takis him nocht be his faire harnais, na his faire horse, na othir faire habilliamentis; ffor oft tymes vnder syk faire habilliament ar nocht the best men of armes, and worthiast in vertues. Quharfore, gif thou will wale worthyast and maist noble man of curage, thou seke him be thir takenis, that is, for to say, justice, and temperance, force and prudence, ffayth, esperaunce that is gude hope, and cheritee, and leautee; and be thir takenis, thou sall knawe the nobless of curage; be the quhilkis vertues, the noble hert defendis it fra the inymyes of Knychthede; quhilkis ar falsehede, trechery, traysone, thift and murder, and syk lyke thingis.

Item, Our ȝong men suld nocht be maid Knychtis, bot gif thai had gude tutouris and curatouris, for dout of misgouernaunce of the Ordre for fault of knaulage; ffor quhen a childe is made Knycht, he thinkis nocht on the poyntis of the Ordre that he sueris to kepe. And gif the Squiere that is ressauit be the examynouris to be Knycht and admyttit, be a rekles man and a wikkit, and of vile condiciouns, he dois grete wrang to the Ordre that he beris, and till himself too; ffor and he be vencust in barrier, or he be cowart or full of wikkit vicis, as fleand fra battaillis, revand or steland, he sall neuer haue honour na prouffit of his Ordre: ffor rycht as it honouris the honourable, it dishonouris the dishonourable. Bot of all thing, a Knycht suld kepe him in all vertu to hald the mydwart, for ay the mydwart is vertu, sa is the extremitee vice; and thus a Knycht suld be of resonable gude age, that he knaw the propereteis and poyntis that he aw till haue, that he nouthir excede, na be our lache in his dede.

Item, It suld be sperit at him, Quhat is the cause that he takis the Ordre for? quhethir for fairnes of corssage; or for hardinesse of curage; or for richesse, that he may be proudly cled; or for pryde, that he may take mare state na his falowis that now is; or for that he is wele horsit and enarmyt; or for to be a myrour in his lignie, that nane is sa worthy as he to be Knycht.

Item, Men may mak Knychtis of pure mennis sonis, and thai haue gude, evin in frendschip of lordschip; and with that, that thai haue the vertues foresaid. Bot and a Knycht or a Lord mak ane vnworthy creature Knycht, he puttis his honour in dangere, that disprisis and dishonouris the Noble Ordre of Knychthede, and makis his awin honour mare law na it was; for the fylth and the wrechit vnhonestee, that he has lychtlyit the said Ordre. For be rycht resone of worthynesse and noblesse of the Ordre, thare may nocht, na suld nocht na villaine curage cum be gude, evin to the said Ordre; ffor that war be gude resone vndoyng of the said Noble Ordre, that is ordanyt bot for noblesse and gentillesse of curage and gude vertues, as foresaid is, and gude thewis: For hye parage and ancien honour ar the first poyntis of the rute of Knychthede, that is cummyn fra alde ancestry, and syne worthy persouns with worschipfull condiciouns and propereteis, personale of the Knycht him self, makis mariage betuix worschipfull vertues in hye parage and Knychthede, quhilk aw nocht to lycht bot in noblesse; and tharfore, and a Lord marry nocht hye parage and Knychthede togeder, he is contrarius to Noblesse and to Knychthede, and to Knychthede bathe. Bot a Lord may put of his powere forssably agayn the noble lordis and Knychtis willis, a man in the Ordre that is nocht worthy: Bot he may nocht vndo that he has done, ffor suppose that he haue power to mak a Knycht, he has na power to vnmak him, sa mekle is the vertue of Knychthede; ffor na man but grete cause, and Juge with princis powar, may tak honour away quhare it is anys gevin. Than be resone, it aucht nocht to be that Prince nor Knycht mak na Knycht of ane unworthy persone, na of villaine lignage. ffor wald men understand that alsmekle is nature honourit, as for corporale nature, in tree and beste as in man; bot as for nature spirituale, man is mare honourde. Bot be the noblesse of the spiritualitee of the saule resounable, that accordis with angelis of hevin, thare is grete difference; and sen noblesse of curage suld be in all Knycht, it may stand that a man of a new sprongyn lygnye, that be honourable and worthy in all gentrise, mycht be convenable and worthy to the Ordre, sa that the vertues condiciouns and propereteis of noblesse of curage acord ther till. Bot this opynione is vntrewe and vnworthy, ffor and that mycht be, it war mare lyke that the Ordour of Knychthede suld better or alswele accorde to the propereteis corporalis, and personalis, as spiritualis: the quhilk is false, ffor Knycht gaynis nocht bot for hye parage and noblesse, with the seven vertues before namyt be the Doctour, as Force, Prudence, Justice, and Temperance, with Faith, Gude Hope, and Charitee, with leautee that efferis to Knychthede.

Item, The examynour suld spere of the Squieris condiciounis, and maneris, and gude vertues, and thewis, amang the peple; and quhat documentis and techingis thai ar of; ffor the fault of gude documentis and techingis gerris vnworthy men be reboytit and repellit fra the examinacione of the inquisitouris, that thai cum nocht to that Noble Ordre: ffor worthy examynouris will admytt nane, bot worthy: ffor grete foly war to put in the Ordre thame that efterwart suld be repellit for their misgouernaunce; And forthy suld the Knycht, that is the inquissitour, seke wele the poyntis of noblesse and of valour, and of the vertuouse propereteis and gude thewis of the Squyer that suld be Knycht; and quhy, and for quhat cause, he will tak the Ordre; and quhethir it be for meritable cause till implye him for the Haly Kirk, the Cristyn faith, and for the commone prouffit, for the peace, and for all peceable persouns; or he takis the Ordre for pryde or couatise, or for to be honourit, or for vane glore, or to wyn richesse thareby, quhilk, gif he may persaue that his entencione cummys of ane vnworthy cause, admytt him neuer: ffor rycht as Homycide, Symony, Usure, and Scismatyke condicioune, repellis Clerkis fra benefice and honoure, and all dignitee; in lyke cas suld thir faultis before namyt repelle a Squyere fra the noble Ordre of Knychthede, that suld haue nane affinitee bot till noblesse of corage, as said is; ffor and men wald wele knaw and consider the grete chargis and dewiteis that folowis the said Ordre, with saule perile, and worschip oft in were, thay sald stand grete aw to tak that noble Ordre, mare na to be outhir monk, or frere, or othir religiouse of the hardest Ordre that is; ffor traistis wele, that grete honour beris ay grete charge, and gretter disese it is, to fall fra grete honoure agayne that anys a man has bene at, na euir it was joy, to be thareat: Quia non est tanti gaudii excelsa tenere, quanti est meroris de excelso cadere. And tharfore Knycht suld mare dout honour na dede, and schamefulnes suld mare chastise a worthy Knycht, and geve him a hardar passione; and it suld happin him, na suld outhir hunger or thrist, or hete or calde, or ony disese that he mycht haue; and namely, grete princis and lordis sonis suld think grete schame to wyn ane euill name for lak of thair condiciouns in thair ȝouthede, gif thai thocht euer to cum to the worthy and worschipful Ordre of noblesse that Knychthede is callit; ffor thai may wele traist that the name that thai wyn in thair ȝong age remaynis with thame for euermare: And than is it grete auenture, and euer thai be worthy to ressaue that Ordre, quhen the examynouris knawis thair condiciounis; and tharfore, all syk perilis suld be schawin to the Squier or he sett him to cum to the examynyng. Cheualry may nocht be vp haldyn but grete costis, and als expensis on horse, harnais, mete, and men, and othir necessair thingis that till it appertenis; and tharfore, thare suld na man, supposs he war worthy, desyre to tak the Ordre bot he war a lorde, or that he had lord to mynister him all his necessiteis, and hald his honour abufe in tyme of weris; ffor ellis, in default of horse, harnais, and othir necessiteis, euill sett Knychtis, quhen thai wantt, assemblis syk euill men as thame selff, and gerris mony ruggaris and revaris, and othir wikkit men, destroy the commouns, and distrouble the realme, and makis mekle wrang to be done in thaire default.

Item, Men countrefait in thair persone, na oure grete growin men, na men oure fat, or that has euill disposicione, or euill sekenes in thair body; ffor it war lak to the makare to mak men Knychtis that war nocht hable till armes, and to do vailliaunce in tyme of weris; ffor the nobilnesse of the Ordre is sa worschipfull, that it sufferis na man that has mahaigne, na demembrit, na othir wayis manket in corssage, visage, na membris—be he neuer sa riche—to be admyttit to the said maist noble Ordre, the quhilk excludis vttraly all ignobilitee and vilitee.

Item, The inquisitoure examynour suld mak inquest at the Squyar gif euer he did ony grete excessiue syn, as tresoune, or scisme, sorcery, or wichecraft, or grete murderis, or syk lyke thingis; the quhilk, suppose he prise thame lytill, may lett him to ressaue the noble Ordre, in company to be falowe to the worthy Cheualrye: na ȝit na vane glorius Squyare suld be na Knycht, ffor vane glore tynis the meritis of all gude vertues. Na he suld nocht be a gabusoure, na a flaitour Squyare, that suld enter in the said Ordre; na ȝit hautane, na fiere in pride, na orguillouse Squyere suld nocht enter in Knychthede; and namely outrageus in word, and sclanderouse bakbytare, suld nocht enter in the Ordre; na commone leare, na commone viciouse hurdomare hasartour, commoune tauernouris full of sleuthe, barganouris, commouns glotouns, kid and knawin for syk, dronkynsum, manesuorne, and all outrageus commoun vicius men, ar nocht to be ressauit to the Ordre of Knychthede, bot suld be repellit be the examynouris of the Ordre: And thus sald nane be ressauit to the Ordre bot nobles of parage, vertuouse, honest, and of worthy curage; and in all this suld Squyer be inquerit, or he be Knycht.

QUINTUM CAPITULUM.

HERE DECLARIS THE DOCTOUR IN QUHAT FASSONE AND MANER SULD A SQUYER THAT WALD BE KNYCHT, RESSAUE THE ORDRE OF KNYCHTHEDE.

nd as to that, the Squyer quhen he is examynyt and admyttit, he suld schriue him clene of all synnys and defautis that he may think on, that euer he maid aganis God, and his Magestee; and tak his Sacrament, sayand "In the name of thee, and in entencione to serue thee, and honour thee, My Souerane Lord God, and thy dere moder Mary, and all thy haly Sanctis of Paradise, I tak this day this worthy Ordre." And this suld be done be prince or lord in a grete feste, as Zule, Pasche, or Witsonday, or All Halowmesse, ffor the mare honourable assemble is maid thay dayes na in otheris: And than suld the Squyere fast the Fest evin, and wake all that nycht in prayeris of grace asking, and otheris als suld pray for him, to geve him grace, worthily to ressaue and kepe, and worthily gouerne the said Ordre, at the plesaunce of God, and the haly Court of Hevin: And on the day before, he suld pas to the Kirk, in his best array as efferis and custum of the countree is, thair to be in prayeris, and to here a preching, or a proposicione langand the said mater; na he suld nouthir here na speke viciouse speche, na trompouris, na janglouris, for that is lak to the Ordre: And on the morne eftir, quhen he is arayed in habyte of Knychtis wede, thare mon be grathit a solempne Messe with note, and in the tyme of the Offeratore, he sal cum before the altare and offer: And syne sall he mak ane athe to the Ordre till honoure it eftir his powere, in the honour of Almychtj God, Prince of all Chevalrye; and thare in present place, suld thare be maid a faire sermone, declarand the poyntis of the Christyn faith, acordand thame togeder with the poyntis of the Ordre of Knychthede. To the quhilkis poyntis of acordans the Squyre suld take gude tent, and knaw thame all, and hald thame prentit in his hert percure, with all the Vij. sacramentis, the X. Commandmentis, the Xij. articles of the treuth, and to kepe him fra the Vij. dedely [synnis]. To all the quhilkis poyntis of the faith, to kepe and honoure and fulfill at his powere, incontynent that he haue tane the said Ordre at the honoure and reuerence of God, and thareto suld mak his speciale prayeris for all, the tyme of the Messe: And fra thyne furth for all his lyf dais. And quhen the preching is done, than sall cum furth the Prince or Lord that suld mak him Knycht; the quhilk aw of dett to be Knycht or he mak ony Knychtis: rycht as nane may mak Preste bot he be Preste, sa may nane mak Knycht bot first he be maid Knycht, saiffand the Pape: ffor how may he geve that he has nocht? ffor herbes and bestis may geve thair nature ilkane till othir, to mak thair nature perpetuall; bot sa may nocht Knychtis be maid, bot first the makare be possessit of his gift, and of his Ordre: ffor gif ony lord wald geve the Ordre and nocht haue it, or vnworthily geve it othir wayis na the Ordre requeiris, he dois grete dishonour to the Ordre. And thai that takis the said Ordre of thame that has na powere vnworthily, thai haue na grace in the Ordre to do wele, na prouffit to thame na otheris; and thus is the Squyere begylit, and dissauit of his Ordre, and all Cheualrye sclanderit. And than suld the Squier hald vp his handis to the hevyn, and his eyne to the hicht, and his hert to God, syttand on his kneis, and thare suld the Prince haue the Suerd redy of Honour, gylt with gold, and belt it about his sydis, in takenyng of Chastitee, Justice, and Cheritee, and thare the Knycht suld outhir geve him a strake with his hand, or with a drawin suerd, in the nek, to think on the poyntis and defend his dewiteis. And syne suld he outhir kys him in the mouth, or ellis kys the croce of the suerd, and geve it him, and ger him kis it agayne, and sa put it in the scalbourd, and bid him think on his athe, ande charge that he has vndertane, and the honour that he suld manetene. And efter that all the seruice of God be done, the new maid Knycht suld ryde on ane coursere out throw the citee, or toune, and schaw him to the peple, sa that thai may knaw him for a Knycht, defendour of Haly Kirk and commone prouffit, and halder of lawe and justice, and mayntenour of the peple, that quhasa has ado thai suld draw till him for help; and that he suld haue mare raddour and drede to do mys, or oucht that suld be agayne the lawe euer mare in tyme to cum, and to saif the honour and the worschip of his noble Ordre; ffor raddour, drede, and schamefulnes is hye grace till all persouns that has honour to kepe. And in that day suld thare be grete festyng, justyng, and tournaymentis, with other actis, as lissis and behurdis, geue grete giftis, and mak grete solempnitee in the honoure of God and the grete feste, and that Herauldis and Kingis of Armes and Menstralis war rewardit. And than suld the Prince rewarde the new Knycht with landis, lordschippis, or othir worthy giftis and gouernementis, till eke his estate and help to manetene the honoure of the Ordre. And thus suld giftis be gevin bathe till him, and be him till otheris; ffor the Ordre requeris giftis to be gevin in daly placis; for honoure and worschip of lordis of estate may nocht be kepit, bot quhare giftis ar gevin, and noble actis of honour excersit: ffor quhare honoure is nocht kepit, ordere gais bakwart.

SEXTUM CAPITULUM.

HERE SPEKIS THE DOCTOURE OF THE SIGNIFICATIOUNE OF THE ARMES OF THE ORDER OF KNYCHTHEDE.

ow declaris the Doctour, that as the Preste quhilk in the Mess sayand has syndry habitis and habilliamentis, quhilkis ilkane has a syndry significacione, as is acordand to thair office and order, and that office of Preste and office of Knycht has sa grete affinitee and alliaunce togeder; ffor quhy? that rycht as office of Preste has certane thingis that pertenis to the Ordre; and ilkane has a certane significacione, sa has the Ordre of Knychthede: ffor ilk thing pertenand till his Order has a certane significacioune, be the quhilkis is signifyit the noblesse of the Order of Knychthede.

And first and formast, Thare is to the Knycht gevin a Suerd with a crossit hilt, that signifyis that rycht as our Lord Jhesu Crist vencust in the Croce the inymy of mannis lygnage, to the quhilk he was dempt throu the syn of Adam, oure first fader, that rycht sa suld a Knycht vencuse the fais of the Croce throu the suerd; ffor the suerd is ordanyt to do justice with; and tharefore is it maid with twa egeis, in takenyng that he suld manetene and defend bathe Temporalitee and Spiritualitee with the double scherand suerd.

Item, To the Knycht is gevin a Spere quhilk is evin, and betakenis rychtwisenesse and veritee; ffor as the spere is evin, and rycht sa suld he be bathe evynlyk and rychtwise, and manetene and defend lautee and equitee, in contrary of falshede and trecherye; and the scharp hard stelin poynt of the spere hede betakenis, that suppose falsehede be neuer sa wele armyt, ȝit will lautee pas throu him, and vencuse him. And be the pennone on the spere end, it schawis that veritee hydis him nocht, bot schawis him to falsehede, sayand ay, quhen it movis, Lo me here Veritee, that has na drede of falsehede, na trecherye; and Veritee is the foundement of esperaunce that is gude hope, and of all othir thingis that ar signifyit be the spere.

Item, Chapellat of stele alssua is gevin to the Knycht, in takenyng of drede of schame and repruf; ffor a Knycht suld be schamefull as a maydin dredand repruf: ffor Knycht or woman, but drede of schame, may nocht kepe honour langsumly, na be obedient to thair ordre: ffor rycht, as drede and schamefulnes, gerris a persone cast doune the hede, and luke to the erde, sa dois the stelin hat the Knycht cast doune his eyne; and rycht as the stelyn hat kepis the knychtis hede, quhilk is the hyast membre, and maist principale of his persone, sa kepis drede of schame the Knychtis honour, that is the hyast poynt of his ordre, and maist principale poynt of all. The quhilk drede of schame suld haue in it fyve wittis to kepe, that throu nane of thai suld dishonour cum, and that the noblesse of his curage suld defend thai fyve wittis, that neuer throu thame euill na wikkitnesse cum.

Item, Haubergeone is gevin to the Knycht, in takenyng of castell, to kepe him fra his inymyes, that is, euill vicis; ffor rycht as a castell is wallit all about with stanis togedir junyt, to kepe Knycht fra his fais, rycht sa is the haubert to kepe him rycht sa fra his fais that ar vicis and defaultis, till his maist noble Ordre of Knychthede, the quhilk is maid of mony syndry pecis as of maillis.

Item, Leg-harnais is gevin the Knycht, that his leggis and fete were seker to passe in the wayes and stretis, and kepe thame, that na robbouris, na thevis, na murderaris, vmbesett the wayes to reve na strouble lele merchandis, na labouraris, men of kirk, na pilgrimys, that passis in the contree for the commone prouffit of the Realme: And in sik keping he suld be garnyst in his armouris and his wapnis, that he mycht do scathe and tak nane.

Item, Thare is gevin him Maisse, that is to say Pollax, in takenyng that he is officere ryale; and that gif ony man disobeyis till his wand, that he lay that maisse on thame to hald the Kingis rychtis on fut.

Alssua, Spuris ar gevin him, in signifiaunce that rycht as spuris spedis the horse to ryn fast, and besy in tyme of nede, quhen his inymyes cummys nere, rycht sa suld Knycht in tyme of nede be besy quhen the King or his Contree is ouresett with lourdanis and revaris or traytouris or other wikkit misdoaris, sa that he slepe nocht his time, bot be besy and diligent in the commone prouffit. Of the suerd we haue spoken of before, in quhat takenyng and significacioune it is gevin.

Item, The quhip is gevyn to the Knycht in his hand, quhen he is on horse, to that significacione, that he suld stand aw and be obedient till his Lord; ffor disobeisaunce vndois the Knycht and brekis his Ordre, that all his ofspring will forthink: as for the inobedience of Adam, all his ofspring was punyst.

Item, Gorgelin is gevin him, in takenyng that thare suld nouthir enter na isse throu his gorge thing that suld be villanie, na lak thing to the honour of the Ordre; as to be at bidding of his lord, but disobeysaunce, and but murmur do his lordis commandementis; and nouther do, na consent, to tresone or guille, barate, na trechery, vnleautee, na othir vice, that may cum throu word na thocht be the gorge outwart; na excesse of glutony, drunkynnesse, na othir mystemperaunce throu the gorge inwart. And thus the gorgelyn suld kepe the Knychtis gorge.

Item, Masse is gevin him, that betakenis strenth and force of curage, the quhilk masse is lyknyt till a false sterap, quhilk strykis on all sydis, apon all kynde of harnais; sa dois force of curage, it strykis on all sydis, and defendis the honour of Knichthede agayne all vicis, and enforcis vertues.

Item, Thare is gevin to the Knycht his lytill schort Suerd, that sum callis Misericorde, in signifyand that quhen he has implyde his spere, his lang suerde, his polax, his false sterap, and his falow be sa nere him that he may nocht help himself with nane of thay, than it is gude at schort strakis; and it is callit outher Schort Suerd or Misericord; ffor cause that a Knycht suld nocht all traist in his armoure na wapnis, bot in his awin vertu, and in him that maid him, and in his mercj; and traist that throu his help, quhen all wapnis are faillit, that he sall saue his honour and bring him fra the perile of dede and dishonour.

Item, Schelde or targe is gevin to the Knycht in signifiaunce that as office of schelde is to be the targe betuix the Knycht and the strakis, sa suld the Knycht be betuix the Prince or his Lorde and the strakis; as the schelde ressauis the strakis before the Knycht, sa suld the Knycht before his lorde, kepe strakis fra him. And as schelde is couplit to the Knychtis brest, thare his hert is, sa suld the Knycht be till his lord bound in lautee as till his awin hert, and is a myd moyen betuix him and his peple.

Gloues of plate ar gevyn to the Knycht in takenyng, that as thai kepe his handis fra strakis and woundis and manglyng, throu the quhilkis the body mycht be tynt, sa suld he kepe his handis, that he give na faith, na athe, na mak nane condicioune na obligacioune agayn his Lord, ffor than war he vndone; and as Knycht liftis his wapnis mare seurely and traistly, that his handis ar enarmyt, sa suld he list mare seurely to God Almichtj, that he be enarmyt, that his handis wirk na misgouernaunce in taking of wrangwise gudis; na strykyng of vnlefull personis; na making of vnlefull condiciouns, and vnlefull touchingis; na put his handis in vnlefull placis.

The Sadill that he rydis in, betakenis sekernes, that he be nocht lychtly put by his purpose, sa kepis the sadill him, that he be nocht lichtly put fra his hors; ffor quhen he war doune strykyn than war his honour lawe. And rycht as he is ferme and seker in his sete, sa suld he be ferme and seker in his curage, in justice, lautee, noblesse, veritee, and charitee; ffor throw seuretee of a gude hardy knycht mony gude dedis ar done, throu gude hardy men of armes, and mony cowartis ar declarit, quhen hardy men ar approuit, vantouris and vayn glorious men, that dar nocht be sene quhare the hardy and worthy knychtis apperis in worthynes in bataill place, and thare fortune enforsis hardynesse. And as the sadill, with the grathe that langis it, haldis him ferme, that he movis nocht for na strake of spere of inymy, sa suld forse of curage kepe him, that he move neuer again gude faith na resone, and bow nocht with vice agayn vertu. And as the hors beris grete charge of the armyt Knycht, and sadill and harnais, sa beris the Knycht, be vertu of his Ordre, grete charge, the quhilk he suld nocht lychtly be movit fra. And as he is sett apon a hie sadill, aboue a hye coursour, sa suld his curage be hye to defend the rycht, and manetene the poyntis of his maist hye and noble temporale Ordre.

And tharfore is Courser gevin him or Destrere, to betakyn noblesse and hicht of curage, that Knycht suld haue aboue all othir peple, sen he has bathe maist hye and noble order, and syne maist noble habilliament of armoure, and syne maist hye and noble hors; sa sulde he haue maist hye and noble curage, with force to passe all otheris in vailliaunce of armes and honoure, and to be sene aboue all his men, and mare fere of, sa that men that had nede of his help suld se him of fere, to draw till him for help.

Item, his Coursere or destryere has Bridill gevin till him, with irne bytt in the mouth, and reynis in the Knychtis hand, sa that the Knycht may refreyne the hors, that he pas nocht away with him. And that iryn bitt in mouth betakenis, that he suld refrenȝe his mouth fra bathe euill viciouse speche and euill thouchtis. And be the reynis is betakenit, that he suld hald his handis undefoulit, or fylit with oure vilaynouse dedis, or that he be oure large to geve till othir that he haue nede him self, and that he be nocht sa lycht of striking with his handis that thare be na discrecione in his dedis, and that be thai reynis he suld be led with pure folk that war nede bestad of help, quhare thane nedis war to trauaile to help thame; and that he war nocht oure narow na nedy that he had lak tharethrou, nocht to spare his gude and spend his honour; and that he be of handis hardy to defend him fra his fa; and doubte na thing, ffor oure grete doubte makkis Knychtis to haue lathe curage.

Item, The Horse-Hede is bundyn with ane hede-stell of the bridill, in that kynde that he suld do na thing, but be ordynaunce of the Knycht, that efferis till course of armes: and bot be resone; and the hede of the horse gais before, and is bundyn to do resoune, sa suld the resone ga before all dede of armes, and other actis honourable that he dois. And as his hede-stele byndis his hede to resone, sa dois resone the Knycht, and kepis his worschip. Alsua, the Knychtis hors is enournyt with harnais before and behynd, on his body, sa efferis it to Knychtis to be honourably enournyt with honourable clething, and alsa with vertues honourable. And because that sum horse ar enarmyt with sik harneis as efferis to defend thair corps fra harmes, sa suld Knycht be enarmyt with richessis of temporale gudis, or ellis he may nocht gudely do his worschip, nouthir in pes na in were, and oft tymes gerris mony reueryes and wrang wynnyngis be: for Clerkis sais, Quod propter inopiam multi deliquerunt, etc.

Item, Jakkis war ordanit to Knychtis, thai tymes of ȝeris that war of grete solempnitee, of sylk aboue all thair harnais, that signifyit grete trauailis that effeiris till him to do; ffor rycht as the jakkis ar aboue the hauberkis, and ordanyt nerest bathe wynd and rayn, and othir stormys, sa suld a Knycht for the peple susteyne all stormes and trauailis for thame, sa that all mysterfull and peceable persones that had myster, suld, throu him, haue reconfourt and refuge at nede, for the honoure of noble that ordanyt that Noble Order, for that cause to be a protectour and ane aduocate of all poore, miserable, and peceable persones: The quhilkis be the noblesse and the creacione of the Ordre, he is ordanyt to defend, manetene, and hald in thair richtis, quhen thai haue mister, and thai be requerit: Quhilkis Knychtis suld erar expone thame outhir to be dede, or presonare, or woundit sare, or he left thame but help that ar vnder thaire cure and saufgarde: Be the quhilkis poyntis of the Ordre, men may se that Knychtis, be vertu of thair Ordre, has a grete charge, quhat of justice halding, quhat of thair landis gouernyng, and of thair peple maynteyning, and of thai peceable persones defending, as ar kyrk men, and maidnis fra forse and ravisyng, wedowis, and faderles and moderles barnis fra supprising, labouraris, merchandis, and traualouris fra distroubling, and all peceable persones fra fors and wrangwise vexacione.

Eftir this, Takyn of Armes to bere is gevin the Knycht in his schelde, or in his cote of armes, or othir wayis, sa that he be knawin and kend in bataill be otheris; sa that gif he dois wele he suld have honoure and worschip, and gif he dois evill he suld haue dishonoure and disworchip, and sik as efferis till ane inymy of the Ordre of Knychthede: for gif he be vailliaunt and hardy in bataill; or he be feigned, slak, and cowart, and flee fra his lorde in bataill.

Item, Baneris ar gevyn, bot that is bot to Kingis, and Princis, Erllis, Dukkis, Marquis, Vavassouris, Barones, and Knychtis Banneroll; And thus quhen a Baroun Banneroll has mony Knychtis vnder him, thai aw to diffend thaire lordis landis, and his lyf, and his honoure: ffor the honoure of Knychthede standis in that, that he be lufit, lovit, prisit, honourit, and doubtit, with the prince, lordis, and peple of the realme; ffor the honoure of lordis and princis standis in the pluralitee of mony worschipfull and honourable Knychtis: And as Knychtis of honoure ar honourde with princis, lordis, and peple, for hardynesse, noble curage, vertu, and worthynesse, that thai haue wonyn with thair princis, lordis, and maisteris honoure in thair ȝouthede; rycht sa ar vnworthi cowartis, full of tresone and falsehede, barate and trechery, and othir viciouse lyf, suld be haldyn as dishonourit, and vnworthy to be amang thame that ar honourable in the said Order, and mare to be blamyt na othir lawlyar folk, suppose thai had done mys.

SEPTIMUM CAPITULUM.

HERE SPERIS THE DOCTOURE OF GUDE CUSTUMES THAT EFFERIS TO KNYCHTHEDE.

nd, first, he sais that Noblesse of curage has chosyn Knychtis of honour to be aboue the small peple, and the small peple to be at thair seruice and gouernement. Than suld Noblesse and gude custumes be intill all noble knychtis, be vertu of thair Ordre; ffor noblesse of Knychthede cummys neuer to man of gude evin rychtwisely na honourably, bot it be throu noblesse of curage; ffor but noblesse of curage it may neuer cum to that hie degree of honoure, and but electioun of vertu, and gude custumes and thewis; and thus on nede force it behufis the Knycht, or he cum to that hye worschip and estate, worthily but vsurpacione, that he be knawin full of gude vertues, gude custumes, and gude thewis in gouernance. And fyrst and formast, all Knycht or he tak Ordre suld knaw all the Seven Vertues, and thair branchis; that is to say, the four Vertues Cardinale, and the thre Vertues Theological. The thre Theological is Faith, Gude Hope, and Cheretee, as we have before touchit. The Four Cardinale Vertues ar Justice, Temperance, Fors, and Prudence.

And first and formast, a Knycht bot he be of gude Faith, all is for nocht that he dois; ffor he may neuer haue othir vertewe na gude custumes; ffor but faith all is bot syn that euer man dois: ffor be faith men has all gude knawlage and vnderstanding of God and his haly Sanctis; and but faith man is wer na nocht; ffor be oure faith we haue sight spirituale of hevin and hell, and all Goddis workis, visibilis and invisibilis. And be Faith men has Esperaunce, Cheritee, and Leautee, and ar servitouris to Veritee, and fault of Faith myssaris all thir thingis. Knychtis be gude ancien custumes was wont to ga in the Haly Land, to defend and manetene the Cristyn Faith, fechtand agains the inymyes of the Croce, and was marterit: but full few now dois that. Alsua, be vertu of fayth and gude custumes, Knychtis defendis the Clerkis and Kirkmen fra wikkit tyrane men, the quhilk aganis the faith, and for default of faith schapis thame to derob and ourethraw bathe clerkis and kirkmen, for thair tyranny and wikkitnes.

Item, Esperaunce is a noble vertu, be the quhilk Knychtis traistis to haue the victory in battail and in feicht. Clerkis be Esperaunce traistis to haue the joy of hevyn, and be thair teching gerris vs trow rycht sa: but the quhilk Esperaunce, that is Gude Hope, we war all forlorne. Thairfore Esperaunce sittis well as in a Knycht, ffor be esperaunce he has mare traist in God, na in his horse, harnais, and menze; throu esperaunce the curage of knychtis is reinforssit, and the curage of cowartis ouresett. Gude Hope gerris the knycht oursett grete trauailis, and hard fortunes, in hope of better ay. Alssua Esperaunce gevis knychtis curage to kepe and defend citeis, castellis, and wallit townis on small evyn, and thole bathe hungir, thrist and waking, and mony grete strakis, oft tyme. And war nocht Esperaunce of gude hope Knychtis had neuer honour, ffor it is the principale instrument that gouernis Knychthede in honoure.

Item, Knycht but Cheritee may neuer be but crueltee and euill will, quhilkis concordis neuer with the honour of Knychthede; and thus mon Cheritee be chief in a Knycht; ffor throu Cheritee man lufis his God atoure all thing, and, as himself his nychtbour: but the quhilk poynt is na man may be perfyte Cristyn man.

Item, A Knycht suld haue in him grete pitee of all pure folk maleesy persones, and of pure prysonaris quhen he has the maistry of thame, and till haue mercy of thame for resonable finaunce; and throu cheritee men has pitee, but the quhilk charitee na Knycht mycht sustene the grete charge of Knychthede; ffor as horse but fete may nocht bere grete chargis, sa may nocht Knychthede, but cheritee: the quhilk cheritee makis hevy birding lycht to bere, and grete charge soft, bathe for the vphald of honour of Knychthede, and meryt of the saule behufe.

Item, Justice is till all Knychtis nedefull, ffor Knycht but justice is but honoure; for Justice and Knychthede is sa wele acordaunt that Knycht but justice is a body but saule, for but justice may na Knychthede be; ffor Knycht injurius is inymy of justice, and castis him self out of the Ordre, the quhilk reuys him and dispisis him in that cas.

Item, Prudence is a vertue als, that Knychthede may nocht be but; ffor Prudence is a knawlage that man has of all thing, bathe gude and euill, throu the quhilk he is maid inymy to euill, and frende till all gudenes; and alsa be Prudence man has knawlage of the thing that is for to cum, and that be the notice of the present tyme, as he seis the warld gais: Item, Prudence can with cautelis and subtiliteis, a man can, as be the apperaunce of the thingis that he seis, eschewe perilis that ar to cum, and mend ane euill fortune apperand be vertynasse, bathe corporalis and spiritualis. And thus knaw thai all tymes that is, and wes, and sal be, and puttis gouernaunce till all as efferis. The commone proufit, and the prince, ar mekle behaldin to the worthy Knychtis, for the mony perilis that thai expose thaim in for it: and thus is Prudence ane of the maist nedefull poyntis that may be for Knychtis; worschipfull custume is in Knycht in tyme of necessitee to request of party to arme him, and defend the commone prouffit. Bot mekle mare is it honourable custume to Knychtis till vse resoun in all his dedis, and gude will and wele sett, that is the glore of Knychthede; ffor oft tymes bataillis ar mare wonnyn be grace, na be force, and be wit and subtilitee na be multitude of armyt company, as sais Macabeus to the Peple of Israel, quhen he sawe his inymyes cum on him sex tymes ma na he; "Ha! Ha! Dere Brethir, reconfort ȝow, and makis gude chere, and traistis wele that God sall help vs in this houre, ffor traist nocht that grete multitude makis grete victory, bot mekle erare, grete confusione; ffor sa grete multitude mycht nocht be gouernyt togeder, ffor thay may nocht wit in the tane end, quhat the tothir dois; and a lytill misreugle or affray makis all to flee, etc.:" And gert his peple put thame in gude estate, and prayde to God to help thame. And thus was the bataill wonnyn throu his wit and counsaile, and confourt quhilk come of grete prudence and grace. And thus suld all gude Princis and Lordis that wald haue thaire barnis worthy and wyse men, and hable to the Ordre foresaid: thai suld ger doctryne thame, instruct thame, and teche thame first in thir virtues before namyt, and specially till vse resone and justice, and gude vnderstanding of wit, and that prudence teche thame to be a frende till all gudelynes, and inymy till all wikkitnes, ffor be thai vertues, the vertew of prudence junys him with Knychthede, and dois it mekle honoure.

Item, Force is a grete vertu in all noble actis, and specialy agayn the Seven Dedely Synnis, quhilkis, quhen thai haue the maistry, ledis man to the paynis of hell; off the quhilk sevin synnis, Glutony is ane of the werst; fforthy, that quhen a glutoun has chargit him our mekle with metis and drinkis than bringis it in Suerenesse, that he mon slepe or rest; and in his rest than desyris he Luxure; and quhen he seis that all this charge may nocht be uphaldyn but grete gudis and richess, than cummys Couatise, that settis nocht by how that gude be wonnyn bot he haue it; off the quhilk conquest cummys Ire, and Inuye, and redy Murther and slauchter, quhilkis cummys seldyn, bot that Pryde be in thair falouschip. And thus throu glutony is gaderit and assemblyt all the foule company of the Seven Dedely Synnis: And thus Knychtis that haldis thir wayis, gais nocht in the hall of noblesse; Glutony makis the corps feble, and schortis the lyf, agaynis the quhilk vicis, and namely of glutonye, the worthy curage of a noble Knycht stryvis full stoutly, and wynnis the victory on him that is inymy to the noble Ordre of Knychthede. And thus be Force he feichtis agayn his inymyes throu hye noblelesse of curage with help of abstynence and of temperance: And agayne Luxure feichtis Chastitie forsably, and beautee of corps, mekle etyng and drinking, quynte clething, and joly polist corps; falsate, tresoune, injure and misprising of God, and of his Sanctis and of his mekle gloire, and no doubt the paynis of hell, na sik like thingis is agayne the Ordre of Knychthede, and all gude thewis. Perfyte Chastitee forsably feichtis aganis Lechery throu the remembraunce of God and his commandementis. And to wele vnderstand the the hye graces and gudelynes and glore of the hyast God, quhilkis he has ordanyt for thame that lufis and honouris him, and seruis him treuly; and alssua to think on the sorow and disese that ordanyt is for thame that dois the contrair, that mysprisis his commandementis, and mystrowis him; for to lufe him, serue him, and honour him, that is sa worthie to be lufit, man has forss and grace, with Chastite forsable, with stark curage vnvencusable, werrays and ourecummys the vice of mysordinate Lecherye, be force of curage and noblesse, quhilk will nocht put him in subjectione of evill thouchtis; na be oure cummyn with sik wrechitness; na his hye honour lawit na defoulit, that sa mekle charge has sustenyt in grete honourable actis in weris that he suld thole his worthi curage of Knychthede be ourecummyn with vicis. For suppose he be curageous and hardy, and of corps strenthy to ourecum his corporale inymyes; and nocht noblesse in him of forss of curage to vencuse and ourethrawe his inymyes spirituale, that is vicis; he has nocht all the verray noble poyntis, propereteis, na condiciouns of Knychthede that he suld ficht with; ffor noble curage of Knycht suld alswele feicht again the Deuill that is inymy of the saule as agayne man inymy to the corps.

Item, Auarice is a vice that gerris oft tymes the curage of mony noble Knycht descend full lawe; ffor quhy, the gredynesse of gude blyndis thair hye curage for glytwisnesse of gold and of richesse, that it ourecummys the force that suld vencuss his inymy with, and makis him subject till sa lawly wretchitnesse and vnhonest thing, that is bot for defaut of forss; that suld be his pillare of worschip till hald him ferme; the quhilk pillare faillis him at nede quhen noblesse of hye corage is slokit throu Cuvatise, nocht defendand thame aganis it, as the worthynesse of the Ordre requeris: bot tholis him to be ourecummyn and vencust throu cowardise spirituale, and lachesse of curage souplit throu Auarice; and changit thair curage again the noblesse of the Ordre: And tharefore it is a grete maugre in a realme quhare lordis and knychtis ar gredy to gudis, and couatouse; ffor it is rute of all wikkitnesse; ffor of it cummys wrangwise extorsiouns, and euill wonnyn gudis, wrangwise conquestis of landis, and syne ar thay fast haldand, that na gude will part with, bot the nede peny; and be this way thai becum bondis and subjectis to thair gudis, and varyis fra the rycht way of liberalitee that manetenis noblesse of Cheualrye, and is inymy to the noble Ordre, to be wrechit of the gudis that God has send thame to preue thame, and assay thair vertu with; and nocht to be hid, na hurdit. And as for remede of this, thare is a vertew callit Fortitude, that is stifnes in hert aganis vice, that will nocht falde no mare na rank stele, quhilk is sa ferme in itself, that it will nouthir bow to frende na faa, to help thame at nede, bot he be requerit and askit, and that is for the hie stifnes that is in him, of the vertu of fortitude of curage; that sa grete honour it is worthi to have for his worthynes, that he is euer redy to be at bidding of worthy dedis and honourable, quhen he is requerit. And the hyenes of his noble corage he thrawis him fra all appetite mysordinate of all vicis; as quhen a Knycht is tempt with Couatise or Auarice, that his hert is sett and enclynit to that wrechit gredynesse that is moder of all wikkitnesse, and of traysounis, falsate, barate, trechery, manesuering; than suld he sauf his honour to have recourse to Fortitude, and thare sall he fynd na fault of help, counsale, and confourt, to supplee him at nede; for he is nouthir lache na ȝit cowart, na false hertit na negligent; bot with him sall be foundyn strenth and fors, hye curage in gudelynes, quhilk efferis wele to be fere to the noble Ordre of Knychthede; ffor throu that, a Knycht may be lorde of his curage, and be maister of himself, and ourecum all vicis. And thus suld ilke noble Knycht think on the noble King Alexander of Macedoyne, and of his liberalitee, the quhilk had sa noble a curage, that he dispisit auarice and couatise; in largesses of giftis, he had euer the hand opyn till all men, alswele frende as fa; throu the quhilk renoune of fredome the souldiouris of his inymyes that war auariciouse and couatouse, come fra thame till hym, and gert his company grow, and euermare and mare he conquest, and euermare and mare delt till his men; and thus, throu his renoune of liberalitee and dispising of the vice of auarice, with othir vertues of noblesse of fortitude, he come to the honour of Conqueroure of all the Warld. Quhairfore, all nobil Knychtis suld euer think on vertues of noblesse and of largesse, and despise auarice and couatise; that he be nocht subject till vnworthy persounis, na wyrk nane vnworthy dedis; na think to mak nane vnworthy conquestis throu auarice, the quhilk efferis nocht to noble and worthy Ordre of Knychthede—Accydo est male.

Suerenes is a vice quhilk makis a man to hate all gudelynes and to lufe all viciousnes. Be the quhilk vice, thare is ma folk condampnyt na be ony othir vice in this warlde be takenis and signis may be persauit; and be the contrair, that is wilfulnes in gudelynes to do gude werkis, men may knawe the takenis of a man that sal be savit fra dampnacioune better, and mare clerely, na be ony vertuouse condicione that man may haue; and thus, quha will ourecum and vencuse Suerenesse, he mon nedely begyn at gude, and fortitude of curage, throu the quhilk he ourecummis the inclinacioune of Suerenes that mannis flesch is inclynit to, be the syn of Adam, our held fader, quhilk of the erde takis inclinacioune mare to sleuth na to diligence, and mare till euill na to gude; ffor sleuth and leithfulnesse drawis efter it dule and displesaunce of othir mennis gude auentures, and is blythe of thar mysfortunys: and quhare thai haue euill, thai wald it war wer, and thus has he ay disese; ffor he has disese and dule of thair gude, and syne he has disese and dule of that, that thai haue nocht sa mekle euill as he wald; the quhilk puttis thame in ire and in passione dolorouse contynualy, bathe in body and saule; and tharefore, thou Knycht that wald vencuse that vice of sleuth, pray to God to graunt thé force in curage of diligence aganis that vice of sleuth, that thou may ourethrawe him, and halde him at vnder; and think how that our Lord God, quhen he gevis till othir men ony grace or gudelynes for thair gude meritis, he takis nocht fra thé to give thame, na he gevis thame nocht all the gudis that he has to geve; bot that he has yneuch bathe to geve thé and otheris, that makis him gude cause; of the quhilk he gevis vs ane example in the Ewangel, sayand, Amice, non facio tibi injuriam, That is to say, Quhen the vignerones labouraris had wroucht all the day, fra the morne early till nycht, and otheris began at the Evyn-sang tyme, and wroucht rycht sa to the nycht; and the Lord of the wynis gave thame y-lyke feis for thair day werk; and thai that had wrocht fra the morne airly murmurit the Lord, sayand, He was vnrychtwise, that gave thame alsmekle that began at Evyn-sang tyme as to thame that began at morne airly: and he ansuered, That he did thame na wrang, quhen he departit his awin gude at his awin will, and payde tham all that he hecht thame; quharefore thai had na cause to murmur him, na to haue nane envy at thair nychtbouris, as said is.

Orgueille, that is callit Pryde, thinkis na man pere till him, and is a grete vice; ffor he wald na man war sa gude na sa worthy as he, and had leuer be him allane, na in ony company that him thocht na pere till him. And Humilitee and Fortitude are twa vertues that lufis evynlynes, and sa ar thai aganis Pride; and, tharefore, gif a proud, hichty, hautane Knycht may nocht stanche his awin pride, call till Mekenes and Fortitude; ffor mekenesse withoutyn stedefastnes may nocht gaynstand pryde; ffor quhen thai twa ar togidder, than may thai wele gaynstand pryde; na pryde may neuer be vencust, but mekenesse and stedefastnes of fortitude; ffor kyndely thing is, that quhen a ȝong King is sett on his hye horse, he is proud and hautane, but syne cummys fortitude of humilitee, with grete stedefast mynde, thinkand how he suld haue pryde in his hert, quhen he rememberis of all the poyntis of his Ordre, and quhy he is maid Knycht. Bot quhat is the pryde of a proud haultane man worth, quhen he can nocht remembre of the poyntis that God may sone lawe him with? ffor thare is na man sa proud and full of orgueill, bot and he had bene disconfyte and ourecumyn in bataill place and vencust, bot he suld be full meke; and that fallis ofttymes amang Knychtis of honoure: for quhy? the fors of ane othir mannis corps has strykyn doune the pryde of his curage: And thus sen fors corporale in a strange persone has lawit his pryde, it war lyke that fors of humilitee spirituale, that is fer mare vertuouse, suld in his awin persone ourecum pryde; sen the tane is spirituale noblesse, and the tothir corporale.

Item, Envy is a vice that is not agreable to God, na justice, na charitee, na to largesse, the quhilk pertenis to the Ordre of Knychthede, and thus quhen ony Knycht has his hert failit, and his curage lawlyit, that he may no mare folow the actis of noblesse, na dedis of were, for faulte of strenth of curage that is failit in him, na has nocht in him, Justice, Charitee, na Largesse, syk men dois injure to thair Ordre of Knychthede, that gerris mony Knychtis be envius of othir mennis gude fortune, and thai ar suere and lythir to trauaile thame to wyn honoure in armes, the quhilk bringis the richessis; for euer efter honour thare cummys rychesse, and thai that ar thus enviouse takis fra othir men the gude that is nocht, na may nocht be thairis, ffor thai wald pres thame to reve thame thair honoure, quhilk, quhen thai had gert thame tyne, throu murmuracioune and enviouse langage of bakbyting, that honour that thai tak fra thame, may nocht cum to thameself; and be syk Enuy he dois mony thingis that ar discordant till his Ordre.

Item, Ire is a stroublance of curage, and of gude mynde, and gude will, and disturnis a mannis curage to vengeaunce; and thus, quha sa lykis to sett remede in this vice of Ire, he mon haue recourse to forse of corage; that is, the lord and maister of mannis mynde and his passions, and syne seke to Pacience and to Charitee, the quhilkis ar cheif of counsale to Knychthede, and with temperaunce, mese his mynd and bryng his hert to sobirnes; and thir Vertues ay bringis allegeaunce of the grete paynis and trauailis that Ire has movit in mannis hert: and in samekle as the ire is the mare, in samekle suld force of curage of noblesse of Knychthede be the starkare to ourecum the vnresonable passions of ire, the quhilkis cummis ay of euill, and dois bot euill, ffor the ire of man makis nocht man to haue mare rycht anent Godwart; bot man suld be armyt with gude will, sobernesse, humilitee, and pacience, charitee and abstinence, and syne cummys justice, and bringis wisedome with him, and annoblis the Ordre of Knychthede fere mare na it was before, and thus we haue that aganis all vicis of the Seven Dedely Synnis: The vertu of Force, with help of thir othir counsalouris that we haue here before namyt, is souerane remede aganis thame.

And now is it spedefull that we se quhat is the vertu of Temperaunce, and quhat it is nedefull and behovefull till: And as to that, the Doctour sais, That Temperaunce is a vertu quhilk haldis him euer in the mydwarde betuene twa vicis, that is to say, betuene oure lytill and oure mekle, and thus techis temperance a man to kepe the mydwarde, ffor vertu is ay in the mydwarde: ffor man that has na mesure in himself, quhen he dois outhir till the hye or to the law, thare wantis discrecione of temperaunce and mesure, (the quhilk is nedefull to be in Knychthede), ffor quhen Knycht knawis nocht his quantiteis of his mesure in all his dedis, his honoure is in were: ffor he suld be temperit in largesse, that he be nouthir fule large na oure wrechit; in hardinesse, that he be nocht fule hardy na oure cowart; in etyng and drinking that he be nocht glutone, na gormand, na slut, na slutheroune, na zit dronkynsum; na that he hunger nocht himself for wrechitnes; in his speche that he haue nocht our mony wordis, na that he be nocht oure bestely, na our blate, that he haue na langage, na collacione in tyme quhen it efferis; alsua in his clething that he excede nocht, na that he be nocht oure wrechit: And thus in all thing to hald mesure is temperaunce: And schortly to say, it is the reugle of all wisedome, and but it na Knycht may well gouerne his Ordre, na neuer sall men fynd temperance bot with wisdome and with vertu.

Item, Gude custume and vsage is till Knychtis to here every day the Messe, quhare euer he be, gif it may gudely be gottyn, and gif ony preching or teching of clerkis, or wyse men be proponyt, he suld be redy euer to here the Word of God, and euer be redy till honoure, anourne, and pray to God, and to lufe him, serue him, honoure him, and obeye him in all place, atour all thing; and in all his dedis, haue euer his hert on him, and euer think on the Passioun of Crist, and on his awin dede, that he mon anyss dee, and think on the schortnes and the wrechitnes of this warld, and of the paynis of Hell, and of the grete joyis and glore celestiall of Hevyn; And euer ask him of his grace that hye glore of Paradise, and traistis wele that he that takis mare plesaunce in haukis and houndis, deliciouss metis, joly clethingis, fair women, gude wynis and spicis, lycht wordis with negligence of Goddis seruice, and lycht lying and despising of Goddis pure peple, and of the lawis of God and man, syk Knychtis ar nocht worthy Knychtis, bot erar dispisaris of the Ordre, and inymyes to Knychthede; ffor sum trowis in wichecraftis, as in meting of bestis, or in fleyng of foulis with thame or agayne thaim, or on rycht hand, or on left hand, sayand, the rycht syde gais aganis him, and the left syde gais with him: And sayand, That all sik folyis efferis nocht to wisedome, resone, na discrecioune, na to gude faith. Bot it as foly of fulis that grevis God, and castis men of Goddis grace, and gerris thair inymyes oft tymes be maisteris of thame, quhen thai will nocht tak documentis of gude teching, na gude thewis to reugle thair dedis, and mare has traist in thair fretis and folyis, na in the faith of God Almychty. And tharfor, thai that vsis thir folyis, and levis the Vertues before said of Fayth, Gude Hope, and Charitee, Humilitee, Largesse and Lawtee, and nobilnesse of Forse of curage, to gaynstand all thir vnworthy fantasyes, he is nocht worthy to bere that hye, worthy, and noble Ordre of Knychthede that dois thus; ffor sum Knycht has syk custumes to trow, quhen euer he seis a nakit womman in the mornyng, he sall nocht do his prouffit na honoure that day, na quhen he seis a womman kemmand hir hede nakit in the mornyng, he sall nocht have honour in armes that day; and this is a false vnworthy treuth, ffor a juge that kepis the lawis that he is ordanyt to kepe, dois wele his office. Sa dois a Knycht quhen he vsis resone and discrecione, and kepis fayth and lawtee with all the laue of Vertues of noblesse, than is he worthy Knycht, and kepis wele his Ordre: Bot a Knycht that wyrkis eftir ȝone fretis, that we have here sum part namyt, and otheris, and levis the ordre of gude vertues and gude thewis, he is dois evin as a juge that leuis gude and suthfast witnessis led in a cause before him, and jugis agayn gude fayth, be the chirmyng of foulis, or be the berking of doggis, and syk lyke thing; and thus Knycht suld be ferme in the faithe, nocht variand, na suld nocht traist in sik fretis, na wichcraft; and leue the verray faith of God, ffor all syk thingis are bot janglyng of fendis, that fleis in the ayre, that temptis Cristyn folk, to ger them vary fra the rycht faith to drawe thame to thair condampnacione.

Item, Till Knychthede efferis; principaly to be amorouse of the commone prouffit, and of the commouns; ffor quhy? be the commouns, and for the commone prouffit Knychthede was foundyn, stablyst, and ordanyt, than suld Knychtis be curius of thair prouffit, be resone; ffor gude resone gevis, that all Princis, Lordis, and Knychtis specialy, sulde be mare curius of the commoun prouffit, na of thair awin propre gudis; ffor quhy? it is mare nedefull and mare spedefull, and grettar and mare necessair, ffor the commoun prouffit riches bathe Prince and Peple, and gude propre gudis, bot a persone proprely, and mare gude, is to be bathe riche, Prince and Peple, na he allane, and nocht his peple.

Item, To Knycht efferis to speke sobirly and wisely, and curtasly; and to be alssua nobly cled in diuerss clethingis, and honourable, fair horse, fair harnais, in the hanting of weris, and gouernaunce that he has: till hald alsua gude house, eftir his power and estate, till haue honest housing; and treuly Curtasy and Knychthede suld neuer part company; ffor foule and vilaynouse speche fylis the mouth of a noble Knycht, and sa dois it of all persone of estate; hamelynes and gude specialitee of acquyntance with gude folk, worthy and honest, is wele accordant to Knychthede.

Item, Lautee, Veritee, Justice, Humilitee, Charitee, Largesse, Hardynesse, Prowesse, with Forse in curage and noblesse, Pitee, Honestee, Drede, Schame, with othir syk like Vertues, and otheris that we haue before namyt, appertenis wele to be in company with the noble Ordre; and rycht as we say, That in God is all vertu, all noblesse, and all gudelyness, sa suld all Knychtis, Lordis, and Princis, folow at all thair gudely powere the futsteppis of thair ledare, lord, and techour, Jhesu Crist, quhilk all his werkis that he wrocht was all to geve us gude instructioun to gouerne vs in syklike maner. And all the writtis that euer was writtin for our documentis and teching, for the teching of the keping of horse and harnais and wapinis, is nocht anerly the instructione of Knychthede till his barnis and otheris that he suld teche vnder him: bot the gude custumes, gude instructiones in vertues, and gude ensamples of gude godlyke gouernaunce, efter all the form and maner before said, suld be the gouernaunce of Knychtis, first in thameself, and syne teche till otheris; ffor he that better techis his horse na his barnis, he gais nocht the rycht gate to teche the Ordre.