34. But-but and Anansi. [Note]
Reading edition
34. But-but and Anansi. [Note]
Richard Morgan, Santa Cruz Mountains.
But-but an’ Hanansi dem gwine up to town. When dem ketch a pass Hanansi said, “Brar But-but, let we eat fe you pone!” an’ dey eat half of But-but pone. As’ dem gwine along, But-but feel hungry. He said, “Brar Hanansi, me hungry now.” Hanansi say, “Brar But-but, you too foolish! we no half get to town yet.” But-but walk till him faint away. Hanansi travel ketch roun’ one turn, he ’top an’ eat off of his pone deh.
Hanansi got t’ree sons. When him goin’ a house, put down him basket. As he open de basket, But-but fly out an’ go upon de firs’ pic’ny head. Hanansi say, “’tand ’teady, me baby, mak I kill him!” An’ tak a morter-stick an’ lick upon head an’ kill de pic’ny. An’ go up upon de nex’ head again. An’ say, “’tand ’teady, me baby; dat no deady, on’y sleeping!” an’ he lick de odder one dead. Dat was two gone. An’ go up on de las’ one now. An say, “’tand ’teady, me baby, put yo’ neck good mak I lick him!” an de t’ird one dead. An’ he fly upon de wife head now. An’ he said, “’tand ’teady, me wife, you is de ’tronger head now!” an’ lick de wife dead. An’ But fly upon him head now. An’ him go up on de ridge-pole of de house an’ tu’n down him head a bottom fe kill But-but ’pon him head. As’ him fall down an’ ketch half-way, But-but fly off, an’ Hanansi broke him neck. So But-but destroy de whole family.