Note 42 — (Folk-Literature)

Tacunaynayen ni aoan sardayna á ragsác

ti napagtengmo á natacneng á gasat

ta nagteng̃am á sicacaradcad

iti aldao ng̃a inca pannacayanac.

Ayat á naitalugading á di agressat

detoy aldao á inguet gasat

rebbengna met ti panagragragsac

á saranayen ni nasungdó ng̃a ayat.

Rumamanac met itá á maquipagrambac

ta iti gasatmo ti calicagumac

tapno ragragsacto laeng ti inca mapasamac

bayat ti aldaomo ng̃a agbiag.

Ni napateg á Santa Rosa

ti tuladem á maicanadá

ta iti quinaring̃en á inicutanna

di quet natulauan ti dalusna.

Carbeng̃anna á guguram ti sudi quen pateg

cadaguiti pacumbaba ng̃a aramid

tapnó iti castá dicanto mot mailiclíc

á cas quencuana ti pagarian sadi lang̃it.

Rimmang-ayca á rimmangpaya

iti asi quen dungng̃o ti Ama quen Ina

balasangcan Mellang, ng̃a aoan ti curangna,

á cas agucrad á sampaga.

Aoatem cad detoy á siayat

itá lucong ta nasudi á daculap,

dica paayen ta nupay nalaad

nagtaud iti nadalús unay ng̃a ayat.

Itá met olom ti pang̃isaadac

itoy nanomó unay á balang̃at

ta isu ti mang̃ipaquita mang̃ipamatmat

iti ayatmi quenca á immay immarayat.

Oacnitam cad ti dalanco dinac lapdan

iti nacaap-apal á sayacsacmo ipaquitam

tapno agpapas toy puso á maaoaoan

ti ubbug ta ayat á di maugutan.

O Mellang ng̃a nacaay-ayat

á pang̃uloen amin daguiti rosas

ipalubosmo cad ti oayaoayac

ng̃a umay agbuybuya itá imnás.

Igapum cad ti pategna

detoy napagtengmo á saniata

ti puso á siulimec quen sipacumbabá

ti pannacabalinco á mang̃irucbab quenca.

Anansata ta agdaoatac

á no cas nacabasolac

daguitoy á innac pinalaoag

iti pacaoan isut gamgamac.

Agbiagca coma á sitatalná

á sicucupicup iti gracia

á cas ti casang̃aymo á Santa

á ing̃ung̃uten tí Namarsua.

Quet tapno pacapnecan ti pategna

ti panaguiaman ng̃a aoan caaspingna

ipuccaotay ng̃ad á padapada

iti naragsac unay á ¡Viva!