LA FILLE ABHORRANT MARIAIGE

Bien aise suis de veoir la fin Du soupper, Catherine, affin D'aller se pourmener ensemble; Car, veu la saison, il me semble Qu'il n'est chose plus délectable.

Je vieillissois aussi à table, Et si m'ennuyois d'estre assise.

Qu'il faict beau temps quand je m'advise: Voyez, voyez tout à la ronde Comme le monde rit au monde: Aussi est-il en sa jeunesse.

Vous dictes vray.

Et pourquoi est-ce Que votre printemps çà et là Ne rit aussi?

Pourquoi cela?

Pour ce que n'estes point bien gaye À mon gré.

Paroist-il que j'aye Autre visaige que le mien Acoustumé?

Voulez-vous bien, Sans que vostre œil soit esblouy, Que je vous monstre à vous?

Ouy!

Voiez-vous bien là ceste rose Qui s'est toute retraicte et close Vers le soir?

Je la voy, et puis, Voulez-vous dire que je suis Ainsi décheue?

Toute telle.

La comparaison est plus belle Que propre5.

Si ne m'en croyez, Myrez-vous bien et vous voyez En ce ruisseau; mais dictes-moy Pourquoy avec si grand esmoy Durant le soupper souspiriez?

Jà ne faut que vous enqueriez De chose qui aucunement Ne vous touche.

Mais grandement; Car, quant vous estes en soucy, Je suis tout fasché... Qu'est-ce cy? Vous souspirez encor, madame? Comme il vient du profond de l'âme Ce soupir là!

Sans point mentir, J'ay qui au cueur se faist sentir; Mais le dire n'est pas bien seur...

À moy qui vous tiens pour ma sœur! Non, non, Catherine m'amye, N'aiez ne crainte ne demye: Dictes moy tout sans rien obmettre; Car à seureté vous povez mettre Votre secret en ces oreilles, Tant soit-il grand...

Voicy merveilles! Peult estre quant vous le sçaurez, Aucune puissance n'aurez De m'y servir.

On vous orra: Et qui par effect ne pourra Vous secourir, peult estre au fort, Qu'on vous servira de confort Ou de conseil.

J'ay la pépye.

Dont vient cecy? Suys-je une espye, Ou ne m'aimez-vous point autant Que vous souliez?

Je vous hay tant Que j'ay moins cher mon propre frère: Et toutesfois mon cueur diffère D'en dire rien.

Vous estes fine. Venez çà. Si je le devine, Le confesserez vous adoncq? Vous reculez? Promettez moy doncq, Ou je importuneray sans fin.

C'est vous mesme qui estes fin: Or sus puis que promettre fault?...

Tout premier rien ne vous deffault, Que je voye, en félicité.

Pleust à Dieu que la vérité Vous en deissiez!

Quant à vostre âge, Vous estes en la fleur. Et gage Que le plus de vos ans ne monte Que dix-sept?

Non!

À ce compte, Je croy que la peur de vieillesse, Ne vous met pas en grant tristesse.

Nenny.

On voit de tous costez, En vous, cent parfaites beaultez: Grant don de Dieu!

Je vous affie Que ne me plains, ne glorifie De beaulté quelle qu'elle soit.

Après, au taint, on apperçoit Que n'avez maladye aucune: Sinon qu'il y en eust quelcune Qu'on ne voit point.

L'adieu merci! Je n'ay rien eu jusques-icy De mal tache.

Quant au renom, Il n'est point mal.

Je croy que non.

Puis, vous avez, j'en suis records, Ung esprit digne de ce corps, Voire tel, sur ma conscience, Que pour moy, en toute science, Je le vouldroys.

S'il y en a, Il vient de Dieu qui le donna, Et en loue sa bonté haulte.

Au reste, vous n'avez point faulte De ceste bonne grâce exquise, Laquelle est toujours tant requise En la beaulté.

Je vous asseure Que je vouldroys estre bien seure D'avoir bonnes meurs6.

Au surplus, Il n'est rien qui abaisse plus Beaucoup de cueurs que povre race: Mais Dieu vous a faict ceste grâce D'estre yssue de bons parens, Bien nez, riches et apparens, Qui vous ayment.

Je n'en doubte.

Que diray plus? Croyez qu'en toute Ceste ville, je ne voy point Fille qui me vinst mieux à point, Ne que pour moy sitôt l'esleusse. S'il plaisoit à Dieu que je l'eusse Pour ma femme.

Aussi pour époux, Je ne vouldroye aultre que vous, Si c'estoit à moy à choisir, Et que j'eusse quelque désir De mariaige.

Il fault bien dire Que le regret qui vous martire Soit un grant cas!...

Il n'est pas du tout si léger Comme l'on diroit bien!

Or sus, Si je vous mectz le doy dessus, Ne vous en fascherez vous jà?

Je vous l'ay accordé déjà. Besongnez.

Sans mentir, je sçay, Ce défaut, j'en ay faict l'essay, Combien le mal d'amour tourmente: C'est vostre douleur véhémente? Confessez, vous l'avez promis.

Je vous confesse qu'amour a mis En mon cœur l'ennuy que je porte; Mais non pas amour de la sorte Que celle que vous entendez.

Si plus grand cler ne me rendez, Garde n'ay que plus j'en devine. Quel amour est-ce?

Amour divin.

Bref, quant dix ans je y penseroys Plus devyner je n'en saurois! Mais vostre bouche le dira, Ou ceste main ne partira Jamais de la myenne.

Quel homme! Vous pressez aussi fort comme S'il vous touchoit.

Or, quelque chose Qui soit en vostre cueur enclose, Mectez la hardiement icy.

Puisque vous me forcez ainsy, Je le diray. Quasi dès l'aage D'enfance, me vint en couraige Une affection si très grande.

Et de quoy?

D'estre de la bande Des vierges sacrées.

D'estre moynesse?

Justement...7.

Hem! c'est prendre gren pour farine.

Que dictes vous?

Bien Catherine... Je toussoys, dictes à loisir.

Mes parens à ce mien désir N'ont jamais faict que résister.

Et vous?

Et moy de persister Et de prières et de larmes, Pour les gaigner.

Et eux que feirent?

Finablement, après qu'ils veirent Que je ne cessoys de prier, De requérir, pleurer, crier, Ils s'inclinèrent, promettans, Dès que j'auroys dix-sept ans, De faire à mon intencion, Pourveu que ma dévotion Continuast. Or suis-je au terme: Mon vouloir est toujours ferme, Touttefois parens et amys, Contre tout ce qu'ils m'ont promis, Me reffusent. C'est ce qui tant Jour et nuyt me va contrestant. Je vous ay dict ma maladye: Si povez, faictes que je dye Que j'ay trouvé ung médecin.

Vierge plus blonde qu'un bassin, Tout premier conseiller vous veulx Que vos affections et vœux Vous modériez, et si contente L'on ne vous faict de vostre attente, D'en prendre ennuy ne vous jouez: Mais voulez ce que vous povez Pour le plus seur.

Morte je suis, Si je n'ay ce que je poursuis: Voire bientost.

Mais voirement, D'où printes-voue primièrement Ce mortel désir?

Une foys Que guers d'aage je n'avoys, En ung couvent on me mena De nonnains; on me promena, On nous monstra là toutes choses: Ces nonnains fresches comme roses Me plaisoient et me sembloient anges, Tout reluysoit, jusques aux franges, En leur esglise. Leurs préaulx Et jardins estoient si très beaulx: Quant tout est dict, par tous les lieux Ou je vouloys tourner les yeulx, Tout me rioit. Si nous venoient Mille propos que nous tenoient Des nonnains en leur doulx langage. J'en trouvay là deux de mon aage Avecques qui je m'esbatoys, Du temps que petite j'estoys; De ce temps là, sans point mentir, Commença mon cueur à sentir Le désir d'une telle vie.

De rien condemner n'ay envye: Si est que, à toutes personnes, Toutes choses ne sont pas bonnes; Et, veu la gentille nature, Laquelle en vous je conjecture, Tant par les meurs que par la face, Il me semble, sauf vostre grâce, Que devez prendre pour espoux Quelque beau filz pareil à vous, Et instituer, bien et beau, Chez vous, un couvent tout nouveau, Dont vous seriez la mère abesse Et luy l'abbé.

Moi, que je laisse, Le propos de virginité! Plutost mourir!

En vérité, Virginité grant chose vault, Pourveu qu'elle soit comme il fault; Mais pour cela n'est jà mestier Qu'entriez en cloistre ne moustier, Dont ne puissiez sortir après. Vous povez vivre vierge auprès De père et mère.

Il est ainsi; Mais non trop seurement aussi.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . Les vierges de cueur pur et munde, Au temps passé, en lieu du monde, Plus honnestement ne vivoient Qu'avec leurs parents, et n'avoient Que l'évesque pour leur beau-père.... Mais nommez-moy le monastère, Je vous prie, que vous voulez prendre Pour en servitude vous rendre À jamais?

Celuy de Temspert.

N'est-ce pas celluy qui appert Sur la montagne, par delà Le boys de vostre père?

Là.

Je congnoys toute la mesgnye De céans. Quelle compaignye! Elle mérite, bien pensez, Que pour elle vous laissez Vos parents si bons et honnestes! Quant au prieur, sur toutes bestes, Je la vous promets la plus sotte. Il y a dix ans qu'il radotte, D'aage et d'ivroignerye extresme, Et a deux compaignons de mesme: Frère Jehan et frère Gervays; Frère Jehan n'est point trop mauvais; Mais au reste il n'a rien de l'homme, Fors seulement la barbe; comme Il n'a ne sçavoir, ne cerveau. Et frère Gervais est si veau, De contenance si badinne, Que, sans le froc sacré et digne Qui couvre tout, il trotteroyt Parmy la ville, et porteroyt Le beau chapperon à oreilles, Et les deux sonnettes pareilles Publicquement!

Ils sont tant doulx!

Si les congnoys-je mieulx que vous! Mais ils sont, j'entends bien le cas, Vers vos parens vos advocatz, Pour vous fere estre leur novice.

Frère Jehan m'y faict du service Et est mon grand solliciteur, Je le sçay bien.

Quel serviteur! Or, prenons qu'ilz soient maintenant Doctes, et vous à l'advenant; Pour cest affaire, dès demain, En moins que de tourner la main, Sots et mauvais se trouveront; Et tels que baillez vous seront, Vous les fault recevoir et prendre, Pour tout jamais!

Il fault entendre Que souvent on faict des bancquetz Chez nous, où l'on tient des caquetz Qui m'offencent et scandalisent; Car toujours des propos que disent Des mariés par vanité Ne sentent pas virginité: Et parfoys, dont faschée suis, Le baiser reffuser ne puis Honnestement8.

Qui fuyr veult Tout ce qui offenser le peult Quant et quant, se face inhumer. L'oreille doit s'acoustumer À oyr toutes choses dire: Prendre le bon, laisser le pire Pour le meilleur. Et, d'autre part, Je croy que vous avez à part Vostre chambre chez votre père.

Ouy dea.

Si on délibère De fere quelquefois bancquet, Tandis qu'ils tiendront leur cacquet, Tenez vous en vostre chambrette, Et en dévotion secrette Avec Dieu là devisez, Psalmodiez, priez, lisez, Louez sa bonté éternelle Ainsi la maison paternelle Ne vous fera brin de soilleure; Mais bien vous la rendrez meilleure Et plus nette, ma bonne seur.

Si est-il toutes foys plus seur Parmy les vierges se trouver.

Je ne veulx certes reprouver Compaignye chaste et honneste; Mais gardez bien qu'en vostre teste Vous n'aiez une impression De faulce imagination. Quant ung temps y aurez esté. Et de près tout veu et guetté, Peult estre que toutes les choses Entre les murailles encloses, Et lesquelles vos yeulx y virent, Ne vous riront, comme elles firent. Toutes celles qui voilles ont, Et m'en croiez, vierges ne sont.

Voilà bons motz.

Bons et notables Sont les mots qui sont véritables... Si non qu'à maintes du chappitre Soit permis de prendre le tiltre De Marie. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

Vous parleriez bien autrement,

Si vous vouliez.

Propos final. Souvent tout n'est pas virginal Parmy ces vierges.

Mon beau, sire, Et pourquoy?

Je le vous veux dire: Pour ce que parmy ces pucelles Se trouve grant nombre de celles Qui de meurs ressemblent Sapho, Plus que d'entendement.

Ho! ho! C'est jargon, je ne l'entends point.

Aussi l'ay-je dict tout à point Affin que ne fusse entendu.

Or voyla, mon cueur s'est rendu À ce désir, et fault bien dire Que l'esprit qui à ce m'atire Vient de Dieu, puisqu'il continue Depuis tant d'ans qu'il m'a tenue: Et ne faict que croistre et m'attraire De jour en jour.

Mais au contraire; Cest esprit suspect me semble, Veu que tous vos parens ensemble Fuyent à ce que vous disiez. Ils eussent esté inspirés Si vostre désir fust de Dieu; Mais la plaisance de ce lieu, Que vous veistes petite fille, Des nonnains la doulce babille. Leur habit saint, le chant d'icelles, Leurs cérémonies tant belles: Voilà l'esprit qui attira Vostre cueur et qui l'inspira. Avec les caphardes parolles De ces moynes à testes folles Qui vous chevallent pour leur bien. Et pour rungner; ils savent bien Que vostre père est homme large; À soupper l'auront, à la charge Qu'il portera du vin assez Pour dix buveurs, maistres passez; Ou bien chez luy s'en yront boyre. Parquoy, si vous m'en voulez croyre, Rien contre ce gré ne ferez De père et mère; et penserez Que Dieu veult que soubz leur puissance Demourrions en obeyssance. Songez-y bien.

En telle affaire, C'est chose saincte de ne faire Compte de ses parents.

Sans fainte? Pour Jésus-Christ, c'est chose sainte De n'obeyr à père et mère? En quelque cas c'est chose amère, Les contempner en autre endroict; Car ung filz humain qui vouldroit De malle façon laisser mourir, —J'entends s'il le peult secourir,— Son père ydolastre ou ethicque, Il seroit ung vray filz inicque; Mais si vous n'aviez le baptesme, Et la mère, ou le père mesme, Vous voulust garder de le prendre, Lors à eulx ne devez entendre, Où s'ilz vouloiènt vous mettre en teste De faire chose deshonneste, Allors pourriez, en vérité, Contempner leur autorité; Mais qu'a besoing tout ce mistère De couvent ne de monastère? Vous avez, en toute saison, Jésus-Christ en vostre maison. Davantaige, ainsy que je trouve, Nature dict et Dieu approuve, Sainct Pol remonstre fort et ferme, Et la loy humaine conferme, Qu'enfans obeyr sont tenuz À un père dont ilz sont venuz: Voulez-vous de dessoubs les mains De vos parents doulx et humains Vous retirer, et fere change D'un vray père à un père estrange, Et de propre mère tant chère Permuter à une estrangère? Ou, pour mieulx dire, voulez-vous, Pour des parens bégnins et doux, Des maistres et maistresses rudes? Et achapter ces servitudes, Vous qui meritez qu'on vous serve, Fille de maison, non point serve? Certes, charité chrétienne Rompit la coustume ancienne, D'esclaves et serfs qu'on avoit, Fors que les marques on en voit Encor en quelque région; Mais soubs nom de religion, Ce monde fol, en son cerveau, A trouvé ung germe nouveau De servitude: on n'y permect Sinon ce que la reigle y mect: Quelque bien qu'on vous donne et baille. C'est au proffict de la canaille! Troys pas allez vous promener, Soudain vous feront retourner, Comme si la fuycte aviez prise Pour avoir vostre mère occise! Et afin qu'on congnoisse mieulx La servitude desdits lieux, Il fault que là soit despoillee La robe des parens baillee; Et à la mode qu'on traictoit Jadis les serfs qu'on achaptoit, Ils changent (qui est grant mespris!) Le nom qu'au baptesme on a pris: De sorte que pour Pierre ou Blaise, Fault avoir nom Jehan ou Nicaise: Jacques aura des qu'il fut né À Jésus-Christ son nom donné; Et quant cordelier se rendra Le nom de François il prendra! Souldart qui laisse la livrée Que son seigneur luy a livrée Semble renoncer à son maistre, Et sainct homme nous pensons estre Celuy qui une robbe vest, Laquelle Jésus-Christ, qui est Seigneur de tous, point ne lui donne: Et s'il despoille et habandonne L'habit que d'ailleurs il a prins, Il en sera plus fort reprins Que s'il laissoit, par griefve offence, La blanche robbe d'innocence Que eut de Jésus-Christ son roy!

Certes on dict, et je le croy, Que c'est chose de grant mérite Si quelcun sa liberté quicte Et en tel servage se boutte De son gré.

Cela vient sans doubte De pharisaïcque doctrine! Sainct Paul, au rebour, endoctrine Que qui est franc s'y doit tenir, Sans point vouloir serf devenir; Mais plustost qu'on se délibère De devenir franc et libère. Et, ce qui rend plus malheureuse Ceste servitude fascheuse, Il vous fault servir plusieurs maistres, Souvent grosses bestes champestres, Bien souvent trop longtemps congneuz, Aulcune foys nouveaulx venuz! Or çà est-il loy ne usance Qui vous mette hors la puissance Et hors des droitz de père et mère?

Nenny.

Et venez çà, commère! Povez-vous doncq, oultre leur gré, Vendre ou achapter champ ne pré, Qui soit de leur bien?

Rien quelconques.

Qui vous baille ceste loy donques De vous livrer en main estrange, Veu que père et mère à ce change Ne veulent consentir en rien? N'estes-vous pas leur propre bien Et leur chère possession?

La foy et la dévotion Font cesser toute loy humaine.

Le faict de la foi se devant Ailleurs et principallement Au baptesme: icy seullement N'est question que de changer D'acoustremens, et se renger À ne sçay quel genre de vye Qui n'est bon ne mauvais de soy. Je suis marry quant j'apperçoy Combien avec la liberté Vous perdez de commodité! Maintenant, il vous est licite Dedans vostre chambre petite, Lyre à part vous, estudier, Faire oraison, psalmodier. Quant et autant il vous plaira: Et des qu'il vous y faschera, Vous povez ouyr las canticques, Au service divin aller, De Dieu en chaire oyr parler; Ou bien, si quelque fille ou dame, Qui soit bonne de corps et d'ame, Vous trouvez, ou homme sçavant, Ils vous pourront mettre en avant Cent bons propos, desquelz à l'heure Vous pourrez devenir meilleure; Et pourrez eslire et sercher Homme qui sçache bien prescher Jésus-Christ sans capharderye. Si une foys en moynerye Vous entrez, perdre vous convient Ces choses là, desquelles vient Ung grand prouffict quant à la foy.

Mais tandis, à ce que je voy, Je ne seray point nonnain?

Non. Et si serez, puisque ce nom Vous plaist si fort! or audience: Elles s'enflent d'obédience, Et vous n'avez vous pas cest heur D'obeyr à vostre pasteur Et aux parens, comme est escript En la reigle de Jésus-Christ? Quant à pauvreté qu'elles vouent Et dont tant s'estiment et louent, Ne l'avez-vous, quant tous voz bienz Vos parens les ont, et vous riens? Toutes fois les vierges vouées, Jadis, estoient surtout louées Des doctes et des sainctes gens De subvenir aux indigens, Selon la fortune et l'affaire: Ce quelles n'eussent pas sceu fere Si leur bien n'eussent regenté. Au reste, quant à chasteté, La vostre n'empirera point En vostre maison. Par ce point, Vous voilà nonnain. Autant vault. Dictes-moy que c'est qu'il s'en faut Ung certain voille, une chemise Qui dessus la robe soit mise, Au lieu que dessoubz on la porte, Et des mynes de mainte sorte, Qui, de soy, ne font valloir mieulx La personne devant les yeulx De Dieu, qui nostre cueur regarde.

Vous me comptez quand je y prens garde Choses estranges et nouvelles.

Mais très vrayes et toutes telles Comme je le dy.

Certes cy est-ce Qu'au cueur n'auray jamais liesse, Si sans espoir on contredit Religion!

Voilà bien dict! Prinstes vous pas au baptesme Religion?

Si feiz!

Et mesme Tous ceulx qui soubz Jésus-Christ vivent Et ses commandemens ensuyvent Ne sont-ilz point religieux?

Si sont!

Je suis fort envieux De savoir doncq comment s'appelle Ceste religion nouvelle Qui rend ainsi de nul effect Ce que loy de nature a faict, Ce qu'enseigne la loy anticque, Ce qu'approuve l'évangélicque, Et l'appostolicque conferme; Ce décret là, tant soit-il ferme, De Dieu n'est faict, ne approuvé; Mais par les moines controuvé. À ce propos, plusieurs se trouvent Qui les mariaiges approuvent Des jeunes gens, lesquels s'atachent Sans que père et mère le saichent, Voire malgré eulx, plusieurs fois: Raison humaine toutesfois, Ne les loix les plus anciennes, Ne Moïse dedans les siennes, Ne Evangille, ne canon, Ne tient cela?

Je croy que non. Par ce doncq vouliez proposer, Que je ne sçaurois espouser Jésus-Christ, s'il ne vient à plaire À mes parens?

Je vous déclaire Que desja épousé l'avez: Si ont tous ceux qui sont lavez De baptesme. Qui est l'épouse Qui deux foys ung mary espouse? Il n'est question seullement Que ou lieu de l'habillement Et des cérémonies ensemble: Pour cela ne fault, ce me semble, Père et mère ainsi mespriser. Et puis il faut bien adviser, Qu'en voulant encore entreprendre De Jésus-Christ, pour mary prendre, À d'autre ne vous mariez9!

À les écouter vous diriez Qu'on ne peut plus sainctement fere, Que ne tenir, en cest affaire, Compte de parens ne tuteurs?

Priez doncques ces beaux docteurs Qu'aux saincts escriptz ils vous en trouvent Quelque passage, et s'ils ne peuvent, Commandez-leur de boyre un verre De bon vin de Beaune ou d'Auxerre! Ils pourront bien faire cela. Quant ses parens on laisse là Infidelles, pour Jésus suivre, Cela, c'est son salut poursuyvre; Mais ses parens chrestiens quitter Pour en moynerye habiter, Qui est souvent, et j'en réponds, Pour les mauvais laisser les bons, Quelle dévotion peult-ce estre? Encores ceulx que le bon maistre Jésus-Christ avoit convertiz À la foy, du temps des gentilz, Estoient tenus, par tous moyens, Servir à leurs pères payens, Autant comme il se povoit fere Sans foy chrestienne forfaire!

Vous tenez donc pour mauvais Cest ordre de vivre?

Non fais! Mais tout ainsi qu'aux enserrés Et qui du tout se sont fourrés, Je ne vouldroys persuader D'en sortir hors, ne demander, Ains sans scrupulle, ne doubte, Puys conseiller à fille toute, Mesme de gentille nature, De n'entrer point à l'adventure En lieu dont ne puissent sortir: De ce vous puis bien advertir; Veu mesmes que, le plus souvent, Virginité en ung couvent, Plus tost qu'ailleurs, est en danger, Et que, sans vostre habit changer, Povez fere autant d'œuvres bonnes Au logis, comme en font les nonnes En leur couvent.

Vos argumens Sont infinis et véhémens. Toutes foys, de ce mien désir Ne se peult mon cueur dessaisir: Et en suis là.

Et bien, m'amye, Si attirer je ne puys mye Vostre voulonté à la mienne, À tout le moins, qu'il vous souvienne Des propos tenus en ce lieu. Ce temps pendant, je prie à Dieu Que l'affection désireuse Que vous avez soit plus heureuse Que mon conseil n'a pas esté De n'avoir sceu estre accepté!