Note * — THE LIFE AND DEATH OF St. George THE NOBLE CHAMPION OF ENGLAND.
Reading edition
"For the loue of the goddes take golde and syluer and alle that I haue / and lett me haue my doughter / they sayd how syr ye haue made and ordeyned the lawe / and our chyldren been now deed / And now ye wold doo the contrarye / your doughter shal be gyuen / or ellys we shal breune you & your hows. Whan the kyng saw he myght nomore doo he began to wepe and sayd to his doughter / Now shal I neuer see thyn espousayls / Thenne retorned he to the peple and demauded viij dayes respyte And they graunted hit to hym / and whan the viij dayes were passed they came to hym and sayd / thou seest that the cyte perissheth / Thēne dyd the kyng doo* araye his doughter / lyke as she shold be wedded / and embraced hyr kyssed hir and gaue hir his benedyccion / And after ledde hyr to the place where the dragon was / whan she was there / saynt george passed by / And whan he sawe the lady / he demaunded the lady what she made there, And she sayd / goo ye your waye fayre yonge man / that ye perysshe not also /