THE REASON WHY

I ken the lassie’s winsome, An’ blithe as she is braw; But ’tis not worth nor beauty aye That steal the heart awa’. Her cheek is like the wild-rose, Her lips are like the haw; But neither ane nor t’ither ’twas That stole my heart awa’. Her locks are black as midnight, Her brow like driven snaw; And yet it was na’ these I vow That stole my heart awa’. Her smile is like the sunshine, ’Twad gar an iceberg thaw; But ’twas na’ this by my guid-faith That stole my heart awa’. Ilk lad’s lass the fairest is, For Beauty kens nae law; (Though some folk maun be easy pleased Wha’s hearts are stown awa’!) Ah weel! maybe the pearl I’ve foun’ Is no wi’out a flaw! But just because she’s her ain sel’ She stole my heart awa’.