Note 10 — PREFAZIONE
Reading edition
Non mancano in Pomigliano cultori del dialetto; nè so resistere alla tentazione di riprodurre qui una satira, il brindisi de' galeotti, composta da un valentuomo ne' giorni scorsi, in occasione della grazia al De Mata ed altri simili scandoli.
Vuagliune ammartenate de 'stu core,
Songhe fernute 'e juorne de li pene!
'Ngoppa 'a Giustizie e Grazie 'nu signore
Sta, ca nce vo' sferra' da li catene.
Ha verute, ch'è scuorne e ciucce arrore
Nun fare chelle, che sse po' de bene.
'O Ciele 'o benerice! 'E schitt' argiente
Ss'avrie da fa' 'na statue a 'stu purtiente!
Isso, verace figlio de la terra,
Ch' è stato de lanterna a tutt' 'o Munne,
La bona sciorte p' 'e capille afferra
E a auta voce rice chiare e tunne:
—«L'ommo n'è fatto pe' sta' sempe 'nguerra,
«Nè per avere tutto a ssè secunne.
«E nuje vulimme, comme 'e surecille,
«Tenè' li carcerate 'inte 'e mastrille?»—
'Nu letterate 'ruosse raccuntave,
Ch' a piezze sse faceve 'u malandrine
Primme, se sule 'nu schiaffone rave
O a lu barone nun faceva 'nchine.
Ch' 'e (con le) fune, 'o fierro, 'o fuoche, sse restavo
Mieze muorte lu povere schiappine,
Che pe' la famme aveva a 'o calavrese
Scippate 'ngoppa 'ô juoche 'nu tornese.
'Nu taliane nobbele e rettore
Scrivette: Comme mo' sse mange cheste?
Chi accire e arrobbe tene 'mpiette 'o core.
Sia cunnannato, ma nu' leste leste!
Muorto de famme e strazie e de dolore
Comme a 'nu cane è puosto into a caneste.
'E nuoste, 'e Magnasive, Angrise e tutte
Luvarene 'ste pene e chilli lutte.
E mo', ch' 'e belle tiempe so' benute,
Che sciure e frutte nascene 'a pe' lore,
Che simme fratacchiune 'rrevenute,
C' 'o cielo 'mmece 'e l'acqua chiove l'ore,
Vulimme i' 'nnanze e fa' ca' li patute
Cantene d'alterezze tutte a core?
Eh vive 'à lebbertà, fore 'e cancello
Da 'o Fische cchiù nun s'hanno li panelle.
Avêre iè (vero è) cu n'avimme, a iesse' 'ngrate
A unurare in chistu gran cunvite,
Chille, che nce hanno tanto reparate.
Veve 'â salute 'e tutte; e auze 'o rite
'Ruosse, e repete: Juorne furtunate
A lu Ministre nuoste prià' ve 'nvite.
Si resta 'natu poche 'stu guvierne
Annure jamme de state e de vierne.