Note 465 — La Tromperie faicte à un Marchand par son Apprenty, lequel coucha avec sa femme, qui avait peur de nuict, et de ce qui en advint; avec le Testament du Martyr amoureux.

Puis qu'en dueil et tourment Je meurs par trop aymer, Je fais mon testament Dolent, triste et amer. Je prie à mes amis Qu'à la fin de mes jours, Mon petit cœur soit mis Dans le temple d'Amours. Douze torches j'auray De feu d'Ardent Desir; En ce cercueil seray Porté de Desplaisir. Ceux qui me porteront Auront chappeaux de saux[465], Les quelz demonstreront Mes amoureux assaux. Les porteurs soyent: Regret, Faux-Semblant et Reffus; Pour le quart, Dueil secret, Pour qui je meurs confus. Trois porteront le dueil: Rigueur, Ennuy, Soucy, Ayans la larme à l'œil, Avecques Sans-Mercy. Puis les cloches de pleurs En bruit on sonnera. Cruauté de sonneurs S'il veut ordonnera. Mon service fera L'aumosnier de Pitié; Le dyacre sera Le prestre d'Amitié. Le soubz-diacre après, Ce sera Bel-Acueil[466], Qui ne se mettra près De mon piteux cercueil. Noires chappes auront, Beau-Parler, Regard-Doux, Qui l'office feront En larmes sans courroux. A la fin, Noble-Cueur, D'un cueur bien compassé, Dira dedans le cueur: Requiescant in pace. Ballades et rondeaux D'amours seront donnez Aux amoureux loyaux Qui sont abandonnez. Je fais mes heritiers Les habitants d'Honneur, Qui aiment volontiers Dames sans deshonneur; Et l'execution Du testament sera Dame Compassion, Le plus tost que pourra. Dessus moy soit escrit: Cy gist un douloureux, Le quel rendit l'esprit Par trop estre amoureux. Je vous pry', vrais amans, De n'aimer si très fort Que n'en soyez amens Et encouriez la mort.