Note 26 — Le Miroir de contentement, baillé pour estrenne à tous les gens mariez.

Qu'est-ce que j'entend par la ville Du mariage d'une fille Si heureuse, qu'à ceste fois Pas ne voudroit faire un eschange De Jean contre le pont au Change[26] Ny tous les thresors des grands roys? Ceste fille fut caressée Autrefois et fort pourchassée Par gens qui ne font que causer: Chacun l'appeloit son cœur gauche, Chacun vouloit faire desbauche, Chacun promettoit l'espouzer. Cela s'appeloit par leurs signes Mariages de Jean des Vignes[27], Quand chacun trousse son pacquet Le lendemain des espousailles, Qui precèdent les fiançailles. Tout cela n'estoit que caquet. Jean, le jour d'une bonne feste, Vestu d'habit assez honneste Alloit prendre son passetemps. Il rencontre Jeanne la Grise, Il cause avec elle, il devise: Il la cognoissoit dès long-temps. Jean luy presente son service, Tournant son chapeau, puis luy glisse L'une des mains sur son devant. Jeanne, qui estoit amoureuse De Jean, s'estimoit trop heureuse De ce qu'il parloit si avant. Jean, pour n'encourir vitupère, En fit la demande à son père, Un maistre juré chiffonnier: Car la mère estoit en service, Ou, ce me semble, estoit nourrice Chez la fille d'un cordonnier. Jean le Gris se nommoit le père, Philippote Maucreux la mère, Qui prindrent à fort grand honneur D'avoir, pour marier leur fille, Si noblement en ceste ville Fait rencontre d'un tel seigneur. Pour contracter ce mariage, Jean n'y voulut point de langage, Car le conseil en estoit pris. On n'apporta papier ne plumes: Il fut faict aux uz et coustumes De la prevosté de Paris. Huict jours après, sur les quatre heures, Ils partirent de leurs demeures Pour s'en aller à Sainct-Merry. Poussez de mesme cœur et d'ame, Là Jean prist Jeanne pour sa femme, Jeanne prist Jean pour son mary. Sortis de la messe nopcière, Jean s'en va chez une trippière Prendre une teste de mouton. La langue on avoit ja ostée Pour une jeune desgoutée Qui avoit mal à son ploton[28]. Outre un pied de bœuf, il achette Un plat de trippes, dont il traitte Les parents de chasque costé; Et, pour faire la nopce entière, Il eust douze grands pots de bière, Car le vin luy eust trop cousté. Après la pance vint la dance, Et Jean, qui entend la cadence Plus que s'il estoit de mestier, Leur fournit des chansons si belles Que jamais il n'en fut de telles, Et se passa de menestrier. Suivit, pour clorre la journée, La collation ordonnée De fromage et deux plats de fruict. Par ainsi, la nopce achevée, Jean emmeine son espousée, Se retirant sans faire bruict. Arrivé qu'il fut en sa ruë, Tout le voisinage il salue D'une chanson, comme il souloit. Aussi, pour son nouveau mesnage, Il eut de tout le voisinage Plus de bonsoirs qu'il ne vouloit. Je laisse à part la mignardise Dont Jean flattoit Jeanne la Grise, Les caresses, les doux propos, Les baisers, le geste folastre, Pour amoureusement combattre Avant que prendre leur repos. Ce sont les secrets d'hymenée, Cachez dessous la cheminée, Qu'il ne faut jamais publier. Publier les faicts de la couche En ceste mignarde escarmouche, Ce seroit par trop s'oublier. Vivez contens, couple fidelle, Car vostre lignée immortelle Par tout le monde s'estendra: Juppiter vous a fait la grace, Entre autres, que jamais la race Des Jeans et Jeannes ne faudra.