Note 19 — Le Miroir de contentement, baillé pour estrenne à tous les gens mariez.

Jean, petit mignon de l'Aurore, Chante la beauté qu'il adore En se levant de grand matin; Puis, d'une chanson bien gentille Qu'il dit des sergens de la ville, Passe en musique l'Arétin[19]. Le dos recouvert de sa hotte D'une mine qui n'est point sotte, Semble un orgueilleux limaçon Qui, de sa coquille les bornes Outrepassant, monstre ses cornes Au soleil de brave façon. Ceste hotte, pour des bretelles, A deux lizières assez belles, L'une rouge, l'autre de gris; Car la corde à la longue affole, Et lui avoit sié l'espaule Et son pourpoint de petit gris. Jean n'est curieux de la mode, Mais, vestu comme un antipode D'un haut de chausse plein de trous, Plus large en bas qu'à la ceinture, Ne craint point que la ligature Luy face mal sur les genoux. Haut de chausse fait d'une cotte Qu'Urgande portoit à la crotte L'espace de neuf ou dix ans, Frangé par bas, et si honeste Que jamais n'eut coup de vergette, Faict en despit des courtisans. Je pense avoir leu dans l'histoire, Si j'ay encor bonne memoire, Ce fut en l'an cinquante-neuf Qu'on osta les chausses bourrées[20] Où les armes estoyent fourées; Lors ce haut de chausse estoit neuf. Si vous le voyez plein de tailles, C'est qu'il a veu maintes batailles A Dreux, Jarnac et Moncontour; A Sainct-Denys fut sa deffaicte: Un goujat l'eut pour sa conqueste, Qui ne le portoit qu'au bon jour. Il estoit aux troupes des reistres Lors que deux ou trois cens belistres Furent deffaits dedans Auneau[21]; Puis il vint à la Fripperie, Où Jean, qui hait la braverie L'eut en eschange d'un moyneau. C'est son compagnon plus fidèle: Soit qu'il travaille à la Tournelle, Soit qu'il ballie sa maison, Soit que par fois il aille au Louvre, De ce haut de chausse il se couvre, Qui est propre en toute saison. Pour conserver ceste relique, Qui sert tant à la republique, Jean, qui sçait bien son entregent[22], Porte une soutane de toile Faicte du reste d'un gros voile Dont un nocher luy fit present. On prendroit Jean, en ceste guise, Pour un senateur de Venise, Ou pour un jeune Pantalon[23], Ou pour un bachat en Turquie, Car sans orgueil sa sequenie[24] Lui bat presque sur le talon. Jean vient au bord de la rivière, Trouve une troupe lavandière De femmes battans les drappeaux: Il baise l'une, et s'escarmouche Avec l'autre un peu plus farouche, Luy baisant ses tetins jumeaux. Cupidon, aux rives de Seine, Rid de ceste amour incertaine, Car Jean n'est en place arresté; Et de vray, qui voit la caresse De Jean, il n'y a point d'adresse; Jean se loue de tout costé. Jean n'eust jamais l'ame captive, Jean rid tousjours, pourveu qu'il vive, Il ne voudroit pas estre un roy; Jean n'offence jamais personne, Jean ne craint point qu'on l'emprisonne, Jean ne faussa jamais sa foy. Après le bonjour ordinaire, Jean, chargé comme un dromadaire, Le linge encore degoutant, S'en va par la plus courte voye A la maison où on l'envoye Se descharger, tousjours chantant. Poussé d'une mesme alegresse, Jean s'en retourne de vitesse, Du fromage et du pain portant, Et de vin nouveau la choppine Pour le desjeuner de Bertine; Mais Jean en est participant. O Dieu! quels bons mots ils se dient Quant à desjeuner se convient! Si nous les avions tous escrits, Ils nous feroient crever de rire. Relisez les Fleurs de bien dire[25]: L'auteur de Jean les a appris. Ainsi Jean passe la journée, Jean passe ainsi toute l'année, Sans un seul grain d'ambition. Que le monde coure ou qu'il trotte, Que Jean ne perde point sa hotte, Il est exempt de passion. Hotte qui luy vaut un empire, Hotte que Jean seule respire, Hotte coulante de fin or Plus que le Tage en abondance, Hotte l'espoir et l'asseurance, Et de Jean l'unique thresor. Sçachez Platon et Aristote; Qui ne cognoit Jean et sa hotte Ignore la perfection, Et la plus belle intelligence De tout le bonheur de la France, Qu'il faut chercher d'affection. Aussi, pour tant de grands services Et quantité de bons offices, Elle avoit le cul tout percé; Mais Jupiter, très favorable, Pour un signe au ciel remarquable Entre les astres l'a placé. Jean heureux, heureuse ta hotte Qui te fait chanter gaye notte! Certes, je ne m'estonne pas Si tant de Jeans font bonne vie, Gays, joyeux, et auroit envie Tel d'estre Jean qui ne l'est pas.