Note 10 — Le Miroir de contentement, baillé pour estrenne à tous les gens mariez.

Je veux chanter dessus ma lyre Ce que j'ay eu peine d'escrire, Et ramasser de tous mes sens Les plus melodieux accens. Je veux, à quatre escus pour teste, Faire une solennelle feste A tous les enfans d'Apollon; Je veux le luth, le violon, La harpe et la douce pandore, La flutte et le tambour ancore, Les perles des musiciens, Jeunes, vieux, nouveaux, anciens; Je veux le concert plus habile De la veille Sainte-Cécile[10], Les chantres du roy journaliers Et les orgues des Cordeliers[11], Pour chanter en note amoureuse De Jean la vie bien heureuse, Jean tousjours gay, roy des contens, Jean tout confit en passe-temps, Jean qu'on ne verra tant qu'il vive Jamais que porter la lessive, Jean qui ne voudroit s'obliger, Pour tout l'or du monde, à changer Son port de lessive en office Qui lui donnast autre exercice. O Muse, eslite du trouppeau Qui habite sur le couppeau[12] Du mont Parnasse, je te prie, Dy-moy de Jean l'estre et la vie. Le temps de sa nativité Fut un jour de Sainct-Jean d'esté. Aussi, neuf mois devant, la lune Avoit monstré sa face brune, Quand sa mère en songeant croyoit Que de son flanc issir voyoit Un chat qui, d'une course brève, Monta au feu Sainct-Jean en Grève[13]; Mais le feu, ne l'espargnant pas, Le fit sauter du haut en bas, Si que, pour attiedir sa peine, Il se relança dans la Seine, Où Neptune au festin estoit D'une Nymphe qui le traictoit. Ce fut un asseuré presage Que Jean aymeroit ce rivage, Et que ses exploits les plus beaux Il feroit aux rives des eaux; Bref, sa retraite journalière Seroit au bord de la rivière. Or, le jour que ce pauvre oizon Parut dessus nostre orizon, Et que l'estoile matinière Descouvrit son heure première, Sa mère estoit en un grenier Logée près d'un menestrier, Qui faict que Jean sçait la practique De toute sorte de musique, De rondeaux, ballades, chansons, Les voltes[14] de toutes façons, Les courantes, la sarabande, Et des branles toute la bande, Mesmes celuy des bons maris, Qu'on souloit danser à Paris, Des Bretons la druë carole[15], Et la pavane à l'Espagnole[16]. S'il faut danser les Matassins[17], Il n'a les pieds dans des bassins; Dispos pour danser la fissaigne[18] Autant qu'une chèvre brehaigne. Quand Jean fut un peu grandelet, On luy apprit son chappelet; Car Jean a la mine trop bonne Pour estre un docteur de Sorbonne. Il sçait son Pater, son Ave, Son Confiteor, son Salve; Il sçait un peu son nom escrire. Du reste, il ne s'en faict que rire, Parce qu'on dit à tout propos: Les plus sages sont les plus sots.