Note 218 — Chapter VIII · THE FIRST BOOK OF DISCIPLINE; OR, THE BOOKE OF THE POLICIE OF THE CHURCH.

"Of your almis, gude folks, for God's luife of heavin, For I have motherles bairns either sax or seavin;"

"Gude man, will ye gif me of your charitie, And I sall declair yow the black veritie. My father was ane auld man, and a hoir, And was of age four scoir of yeirs and moir. And Mald, my mother, was four scoir and fyfteine, And with my labour I did thame baith susteine. Wee had are meir, that caryit salt and coill, And everie ilk yeir scho brocht us hame ane foill. Wee had thrie ky, that was baith fat and fair, Nane tydier into the toun of Air. My father was sa waik of blude, and bane, That he deit, quhairfoir my mother maid gret maine: Then scho deit, within ane day or two; And thair began my povertie and wo. Our gude gray meir was baittand on the feild, And our Land's laird tuik hir for his hyreild, The vickar tuik the best cow be the heid, Incontinent, quhen my father was deid. And quhen the vickar hard tel how that my mother Was deid, fra hand he tuke to him ane uther: Then Meg, my wife, did murne baith evin and morow, Till at the last scho deit for verie sorow: And quhen the vickar hard tell my wyfe was dead, The thrid cow he cleikit be the heid. Thair umest clayis, that was of rapploch gray, The vickar gart his clark bear them away. Quhen all was gane, I micht mak na debeat, Bot with my bairns past for till beg my meat. Now, haif I tald yow the blak veritie, How I am brocht into this miserie."