Note 2 — Chapter I

xxxvi. v. “Scopas habuit æmulos eadem ætate Bryaxim et Timotheum et Leocharen, de quibus simul dicendum est, quoniam pariter cœlavere Mausoleum; sepulchrum hoc est ab uxore Artemisia factum Mausolo Cariæ regulo, qui obiit Olympiadis cvii anno secundo: opus id ut esset inter septem miracula, hi maxime fecere artifices. Patet ab austro et septemtrione sexagenos ternos pedes, brevius a frontibus, toto circuitu pedes quadringentos undecim; attollitur in altitudinem viginti quinque cubitis; cingitur columnis triginta sex; pteron vocavere circuitum. Ab oriente cœlavit Scopas, a septentrione Bryaxis, a meridie Timotheus, ab occasu Leochares, priusque quam peragerent regina obiit; non tamen recesserunt nisi absoluto jam, id gloriæ ipsorum artisque monimentum judicantes; hodieque certant manus. Accessit et quintus artifex; namque supra pteron pyramis altitudine inferiorem æquavit, viginti quatuor gradibus in metæ cacumen se contrahens. In summo est quadriga marmorea, quam fecit Pythis; hæc adjecta centum quadraginta pedum altitudine totum opus includit.”