Note A — The Legendary History of the Cross.

“And for as moche as this sayd worke was grete & over chargeable to me taccomplisshe, I feryd me in the begynnynge of the translacion to have contynued it / bycause of the longe tyme of the translacion / & also in thenpryntyng of ye same and in maner halfe desperate to have accomplissd it / was in purpose to have lefte it / after that I had begonne to translate it / & to have layed it aparte ne had it be(en) at thynstance & requeste of the puyssant noble & vertuous erle my lord wyllyam erle of arondel / whych desyred me to procede & contynue the said werke / & promysed me to take a resonable quantyte of them when they were acheyeued & accomplisshed / and sente to me a worshypful gentylman a servaunt of his named John Stanney which solycyted me in my Lordes name that I shold in no wyse leve it but accomplisshe it promysyng that my sayd lord shold duringe my lyf geve & graunt to me a yerely fee / that is to wete a bucke in sommer / & a doo in Wynter / with whiche fee I holde me wel contente,” &c.