VOLUME II. (continued 4)

Opis the nymphe with dartis of Dyane, Camylla to revenge, has Aruns slane.

Ane huge clamour than dyd rys on hycht,15 That semyt smyte the goldyn starnys brycht; The bargane walxis mair cruell and het Quhar that the stowt Camylla was down bet: For all the rowtis of the bald Troianys, The Tyrrheyn dukis semlyt all at anys,20 And eik Evandrus wardys of Arcadys, Sammyn in the pres thar aduersaris invadis. Bot Opis tho, the nymphe, that weill neir by Be thrynfald Dyane send was to espy, Sat a lang space apon ane hillys hight, And onabasyt dyd behald the fyght. Syne thareftir on far scho can espy,5 Amyd quhar as thir ȝonkeris rasyt this scry, With schaymfull deth ourtane, Camyll the maid: Scho wepyt soir, and plenand thus scho said, Sobband full deip law from hir breist within: Allace! virgyne, to mekill, and that is syn,10 To mekill all owt, sa cruell punysyng Has thou sufferit, certis, for sik a thyng, Becaus thou hest inforsyt in all thy mycht Fortill ennoy the Troianys in this fight. Quhat proffitis the in buskis thyne allane15 To haue servyt so lang the blissyt Diane? Or by thy syde, or than on schuldir hie, So lang our quavyrris to haue born? quod sche. And, netheles, but honour in this sted Thy queyn hes not the left in poynt of ded;20 Nor this thy slauchter but ramemberyng Amang all pepill sall not be, nor menyng; Ne salt thou not that schame suffir, trast me, Forto be tald thou suld onwrokyn be: Quha evir with wond hes schent or violait25 Thy fair body, to Dyane dedicate, He sal repent the tyme that evir thou stervit, And with his deth aby, as he hes servyt. Vnder the montane law thar stude fute hoit A byng of erth, vphepit like a moyt,30 Contenyng the cald assis and brynt banys Of ald Dercennus, kyng of Lawrentanys, Ourheld with akyn treis and bewys rank: Thyddir this Goddes, hastand dovn the bank, Hyrself hes careyt, and thar huvys styll,5 And from this knowys hycht, or lityll hyll, Abydis this ilk Aruns till espy. And fra scho hym persavys glydand by, In rich armour schynand wonder brycht, And all invayn, prowd, wantoun, gay, and lycht;10 Quhy haldis thou awaywart so? quod sche: Dres hyddirmar thy futsteppis towart me; Now cummys hyddir to perys and to sterve, And caucht dewly, as that thou hes deserve, Thy reward for Camyllys ded, perde.15 On Dyanys dartis, ha, suld syk ane de? And with that word, lyke a stowt wench of Trace, The swyft gilt arow schuke owt of hir cace, And, rycht amovit, hir hornyt bow has bent, Quharin onon the takill vp is stent;20 Syne halys vp in ire and felloun haist, Quhill that the bow and nokkis met almaist: And now hir handis raxit hyt euery sted, Hard on the left neyf was the scharp steill hed, The stryng, vp pullit with the rycht hand in feir,25 Went by hir pap almaste ontil hir eyr. Aruns onon the motioun of the ayr Sammyn with the quhislyng of the takill squar Persavit hes, and eik the dynt atanys; The dedly hed throu gyrd his body and banys.30 Hys ferys all hes hym forȝet allane, Quhar as he swelt with mony a wofull grane, And in ane onkouth feld hes left hym ded, Bedoif in dust and puldyr, will of red: Syne Opys with hir weyngis swyft can fle5 Abufe the skyis heich in the hevynnys hie.

Acca to Turnus schawys Camyllais chance, Hir army fled, and left all ordinans.

The swyft army and active rowt wyth this Of Camilla fled first the feld, I wys, For thai had lost thar lady and capitane: The pissans haill and ostis Tyburtane10 Affrayt all togyddir gave the flycht; The bak hes tane Atynas bald and wight; The chiftanys brak array, and went thar gait, The banneris left all blowt and desolait, Socht to warrand on horsbak, he and he,15 Frawart thar fays, and held to the cite. Nor nane of thame, sa mayt and sa agast, The fers Troianys, quhilk thame assalȝeit fast, Onto the ded and myscheif dyd invaid, With wapynnys anys to styntyng maid a braid,20 Nor thame sustene ne ȝit resist thai mycht, Bot all atanys sammyn tuke the flycht, And on thar wery schuldris with gret schame Thar byg bowys onbent has tursyt hame; And the stowt stedis with thar huvys sovnd With swyft renkis dyndlyt the dusty grond. The blak stowr of puldir in a stew5 Als dyrk as myst towart the wallys threw; On the barmkyn abufe, and turettis hie, The wemen bet thar breistis, was reuth to se, Rasand atanys a wofull wyfly cry Went to the starnys and thyrlyt throw the sky.10 And quha mycht formest, with swyft curs hes thame set To brek in at the oppyn patent ȝet; The rowtis of thar ennemys myxt ourane Apon thame ruschis, and owrthrawys mony ane: Nor thar eschape thai nocht the wrachit deth,15 Bot in the portis ȝaldis vp the breth, Stekit amyd thar native wallys hie, And amang howsis quhar sovir semyt thame tobe. A part closyt the entre and the portis; Ne to thar ferys, nor ȝit nane other fortis,20 The ȝettis listyng oppyn, nor mak way, Nor, thocht thai oft besekyng thame and pray, Durst thame ressaue within thar wallys squar: A duylfull slauchter onon vprisys thar Of thame in armys stude the portis to defend,25 And thame with glavys war kyllyt and maid end. The sonnys furthschet, that pety was to seyn, Befor thar wepand wofull faderis eyn, Sum in the holl fowcy war tumlyt dovn, Sa thik thame cummyrris the pres throng to the tovn;30 Sum hasty and onwarly at the flycht Sclakis thar brydillys, spurrand in all thar mycht, Can with a ram rays to the portis dusche, Lyke with thar hedis the hard barris to frusch. The moderis eik and wemen albedene,5 Fra tyme Camylla kyllyt haue thai sene. Knawand thar was extreme necessite, With all debait stude on the wallys hee; Sik thyng to do that tyme and tak on hand The perfyte luf thame taucht of thar kynd land;10 And all agast dartis and stanys doun threw: The syllys square and hedyt styngis enew, And perkis gret with byrslyt endis and brunt, Full hastely doun swakkis, dunt for dunt, And, for defens of thar kynd wallys hie,15 Offerit thame self with the formest to de. In the meyn quhile, as Turnus at the wait Lay in the wod, fast by the passage strait, All the maist cruell tithingis fillys hys erys: For Acca schawys to hym and all hys ferys20 The huge affray, quhou the batale was gane, The Volscane ostis distroyt, and Camyll slane, Thar noysum fays encressyng furyus rage, And by thar prosper Martis vassallage Discumfyst all hys ostis, euery rowt,25 That now the cite wallys stud in dowt. He walxis brayn in furor bellicall, So desyrus of dedis martiall, For the hard fatys and strang mychtis he Of the gret Jove wald that it so suld be:30 The hyllys heich he left quhar at he lay, And from the dern woddis went away. And scarsly was he passyt owt of syght, In the plane feild cummyn all at rycht, Quhen that the prynce Ene with all his men5 Hes entryt in and passyt throu the glen, And our the swyre schawys vp at hys hand Eschape the dern wod, and won the evyn land; So that baith twa with thar haill rowtis at last In all thar speid held to the cite fast.10 And na lang space thar ostis war in sondir, Bot that Ene the feildis reik lyke tundir Of dusty stowr persauyt a far way, And saw the Latyne rowtis ryde away; And fers Eneas, wyrkar of hys harmys,15 Turnus persauyt also ryde in armys, The dynnyng of thar hors feit eik hard he, Thar stampyng sterage, and thar stedis ne. Incontinent thai had to batale went, And in the bargane previt thar hardyment,20 Ne war, as than, the rosy Phebus red Hys wery stedis had dowkyt our the hed Vnder the stremys of the occeane see, Reducyng the dyrk nycht, thai mycht not se; Alhail declynyt had the days lycht.25 To tentis than befor the tovn ilk wight Bownyng to rest, al thai that war withowt, And delvys trynschis all the wallys abowt.

Dyonea, nycht hyrd, and wach of day, The starnys chasyt of the hevyn away, Dame Cynthia dovn rollyng in the see, And Venus lost the bewte of hir E, Fleand eschamyt within Cylenyus cave;5 Mars onbydrew, for all his grundyn glave, Nor frawart Saturn from hys mortall speir Durst langar in the firmament appeir, Bot stall abak ȝond in hys regioun far Behynd the circulat warld of Jupiter;10 Nycthemyne, affrayt of the lyght, Went ondir covert, for gone was the nycht; As fresch Aurora, to myghty Tythone spows, Ischit of hir safron bed and evir hows, In crammysyn cled and granyt violat,15 With sangwyne cape, the selvage purpurat, Onschet the wyndois of hir large hall, Spred all with rosys, and full of balm ryall, And eik the hevynly portis cristallyne Vpwarpis braid, the warld to illumyn.20 The twynklyng stremowris of the orient Sched purpour sprangis with gold and asure ment. Persand the sabill barmkyn nocturnall, Bet doun the skyis clowdy mantill wall: Eous the steid, with ruby hamys red, Abuf the sey lyftis furth hys hed, Of cullour soyr, and sum deill brovn as berry,5 Forto alichtyn and glaid our emyspery, The flambe owtbrastyng at his noys thyrlys; Sa fast Phaeton with the quhyp hym quhyrlys, To roll Appollo hys faderis goldyn char, That schrowdith all the hevynnys and the ayr;10 Quhill schortly, with the blesand torch of day, Abilȝeit in hys lemand fresch array, Furth of hys palyce ryall ischit Phebus, With goldyn crovn and vissage gloryus, Crysp haris, brycht as chrisolyte or topace,15 For quhais hew mycht nane behald hys face, The fyry sparkis brastyng from hys eyn, To purge the ayr, and gylt the tendyr greyn, Defundand from hys sege etheryall Glaid influent aspectis celicall;20 Before hys regale hie magnificens Mysty vapour vpspryngand, sweit as sens, In smoky soppys of donk dewis wak, Moich hailsum stovys ourheldand the slak; The aureat fanys of hys trone souerane25 With glytrand glans ourspred the occiane, The large fludis lemand all of lycht Bot with a blenk of hys supernale sycht. Forto behald, it was a glor to se The stablit wyndis and the cawmyt see,30 The soft sesson, the firmament sereyn, The lowne illumynat ayr, and fyrth ameyn; The syluer scalyt fyschis on the greit Ourthwort cleir stremys sprynkland for the heyt, With fynnys schynand brovn as synopar,5 And chyssell talys, stowrand heir and thar; The new cullour alychtnyng all the landis, Forgane thir stannyris schane the beriall strandis, Quhil the reflex of the diurnal bemys The beyn bonkis kest ful of variant glemys:10 And lusty Flora dyd hyr blomys spreid Vnder the feit of Phebus sulȝart steid; The swardit soyll enbrovd with selcouth hewys, Wod and forest obumbrat with thar bewys, Quhois blisfull branschis, porturat on the grund,15 With schaddoys schene schew rockis rubicund; Towris, turettis, kyrnellis, pynnaclys hie Of kyrkis, castellis, and ilke fair cite, Stude payntit, euery fyall, fayn, and stage, Apon the plane grund, by thar awyn vmbrage20 Of Eolus north blastis havand no dreid, The sulȝe spred hir braid bosum on breid, Ȝephyrus confortabill inspiratioun Fortill ressaue law in hyr barm adoun; The cornys croppis and the beris new brerd25 With glaidsum garmont revestyng the erd; So thik the plantis sprang in euery peyce, The feildis ferleis of thar fructuus fleyce; Byssy dame Ceres, and provd Pryapus, Reiosyng of the planys plentuus,30 Plenyst sa plesand and mast propyrly, By natur nurysyt wondir nobilly, On the fertill skyrt lappys of the grund Strekyng on breid ondyr the cyrkyll rovnd; The variand vestur of the venust vaill5 Schrowdis the scherald fur, and euery faill Ourfret with fulȝeis of figuris full diuers, The spray bysprent with spryngand sprowtis dispers, For callour humour on the dewy nyght, Rendryng sum place the gers pilis thar hycht,10 Als far as catal, the lang symmyris day, Had in thar pastur eyt and knyp away; And blisfull blossummys in the blomyt ȝard Submittis thar hedis in the ȝong sonnys salfgard: Ive levys rank ourspred the barmkyn wall,15 The blomyt hawthorn cled hys pykis all; Furth of fresch burgionys the wyne grapis ȝyng Endlang the treilȝeis dyd on twystis hyng; The lowkyt buttonys on the gemmyt treis Ourspredand leyvis of naturis tapestreis,20 Soft gresy verdour eftir balmy schowris On curland stalkis smylyng to thar flowris; Behaldand thame sa mony diuers hew, Sum pers, sum paill, sum burnet, and sum blew, Sum greyce, sum gowlys, sum purpour, sum sangwane,25 Blanchit or brovne, fawch ȝallow mony ane, Sum hevynly culloryt in celestiall gre, Sum watry hewit as the haw wally see, And sum depart in freklys red and quhite, Sum brycht as gold with aureat levys lyte.30 The dasy dyd on breid hir crownell smaill, And euery flour onlappyt in the daill; In battill gyrs burgionys the banwart wild, The clavyr, catcluke, and the cammamyld; The flour delys furthspred hys hevynly hew,5 Flour dammes, and columby blank and blew; Seir downys smaill on dent de lyon sprang, The ȝyng greyn blomyt straberry levys amang; Gymp gerraflouris thar royn levys onschet, Fresch prymros, and the purpour violet;10 The roys knoppys, tutand furth thar hed, Gan chyp, and kyth thar vermel lippys red, Crysp scarlet levis sum scheddand, baith atanys Kest fragrant smell amyd from goldyn granys; Hevynly lylleis, with lokrand toppys quhyte,15 Oppynnyt and schew thar creistis redymyte, The balmy vapour from thar silkyn croppys Distilland hailsum sugurat hunny droppys, And syluer schakaris gan fra levys hyng, With crystal sprayngis on the verdour ȝyng;20 The plane pulderit with semly settis sovnd, Bedyit full of dewy peirlys rovnd, So that ilk burgioun, syon, herb, and flour, Wolx all embalmyt of the fresch liquor, And bathit hait dyd in dulce humouris fleyt,25 Quharof the beys wrocht thar hunny sweit, By myghty Phebus operatiouns, In sappy subtell exalatiouns. Forgane the cummyn of this prynce potent, Redolent odour vp from rutis sprent,30 Hailsum of smell as ony spicery, Tryakill, droggis, or electuary, Seroppys, sewane, sugur, and synamome, Precyus invnctment, salve, or fragrant pome, Aromatik gummys, or ony fyne potioun,5 Must, myr, aloes, or confectioun; Ane paradyce it semyt to draw neir Thir galȝart gardyngis and ilke greyn herbere. Maist amyabill walxis the amerant medis; Swannys swouchis throw owt the rysp and redis,10 Our al thir lowys and the fludis gray Seirsand by kynd a place quhar thai suld lay: Phebus red fowle hys corall creist can steir, Oft strekyng furth hys hekkill, crawand cleir, Amyd the wortis and the rutys gent15 Pykland hys meyt in alleis quhar he went, Hys wifis, Toppa and Partelot, hym by, As byrd al tyme that hantis bigamy: The pantyt povn, pasand with plomys gym, Kest vp his taill, a provd plesand quheil rym,20 Yschrowdyt in hys fedramme brycht and scheyn, Schapand the prent of Argus hundreth eyn: Amang the bronys of the olyve twistis Seir smaill fowlys wirkand crafty nestis, Endlang the heggeis thyk, and on rank akis,25 Ilk byrd reiosyng with thar myrthfull makis: In corneris and cleir fenystaris of glas Full bissely Aragne wevand was, To knyt hir nettis and hir wobbys sle, Tharwith to caucht the myghe and litill fle:30 So dusty pulder vpstowris in euery streit, Quhil corby gaspyt for the fervent heit. Vnder the bewys beyn in lusty valys, Within fermans, and parkis cloys of palys, The bustuus bukkis rakis furth on raw;5 Heyrdis of hertis throw the thyk wod schaw, Baith the brokkettis, and with braid burnyst tyndis, The sprutlyt calvys sowkand the red hyndis, The ȝong fownys followand the dun days, Kyddis skippand throw ronnys eftir rays;10 In lyssouris and on leys litill lammys Full tayt and tryg socht bletand to thar dammys, Tydy ky lowys, veilys by thame rynnys; All snog and slekit worth thir bestis skynnys. On salt stremys wolx Doryda and Thetis,15 By rynnand strandis Nymphis and Naedes, Sik as we clepe wenschis and damysellis, In gresy gravys wandrand by spryng wellis, Of blomyt branchis and flowris quhite and red Plettand thar lusty chaplettis for thar hed;20 Sum sang ryng sangis, dansys ledys, and rovndis, With vocis schill, quhill all the daill resovndis; Quharso thai walk into thar caralyng, For amorus lays doith the rochys ryng: Ane sang, The schyp salys our the salt faym,25 Will bryng thir merchandis and my lemman haym; Sum other syngis, I wilbe blyth and lycht, Myne hart is lent apon sa gudly wight. And thochtfull luffaris rowmys to and fro, To lys thar pane, and pleyn thar joly wo;30 Eftir thar gys, now syngand, now in sorow, With hartis pensyve, the lang symmyris morow: Sum ballettis lyst endyte of hys lady, Sum levis in hoip, and sum aluterly Disparit is, and sa quyte owt of grace,5 Hys purgatory he fyndis in euery place. To pleys his lufe sum thocht to flat and feyn, Sum to hant bawdry and onlesum meyn; Sum rownys to hys fallow, thame betwene, Hys myrry stouth and pastans lait ȝisterevin:10 Smyland says ane, I couth in previte Schaw the a bovrd. Ha, quhat be that? quod he; Quhat thyng? that most be secrete, said the tother. Gud Lord! mysbeleif ȝe ȝour verray broder? Na, neuer a deill, bot harkis quhat I wald;15 Thou mon be prevy: lo, my hand vphald. Than sal thou walk at evin: quod he, quhidder? In sik a place heir west, we baith togydder, Quhar scho so freschly sang this hyndyr nycht; Do choys the ane, and I sal quynch the lycht.20 I salbe thar I hope, quod he, and lewch; Ȝa, now I knaw the mater weill eneuch. Thus oft dywlgat is this schamefull play, Na thyng accordyng to our hailsum May, Bot rathar contagius and infective,25 And repugnant that sesson nutrytyve, Quhen new curage kytlys all gentill hartis, Seand throu kynd ilk thyng spryngis and revertis: Dame naturis menstralis, on that other part, Thar blysfull bay entonyng euery art,30 To beyt thir amorus of thar nychtis baill, The merl, the mavys, and the nychtyngale, With mery notis myrthfully furth brest, Enforcyng thame quha mycht do clynk it best: The cowschet crowdis and pyrkis on the rys,5 The styrlyng changis diuers stevynnys nys, The sparrow chyrmys in the wallis clyft, Goldspynk and lyntquhite fordynnand the lyft; The gukgo galys, and so quytteris the quaill, Quhill ryveris rerdit, schawis, and euery vaill,10 And tender twystis trymlyt on the treis, For byrdis sang, and bemyng of the beys; In wrablis dulce of hevynly armonyis The larkis, lowd releschand in the skyis, Lovys thar lege with tonys curyus,15 Baith to dame Natur, and the fresch Venus, Rendryng hie lawdis in thar obseruance; Quhais suguryt throtis maid glaid hartis dans, And al smail fowlys syngis on the spray: Welcum the lord of lycht, and lamp of day,20 Welcum fostyr of tendir herbys grene, Welcum quyknar of floryst flowris scheyn, Welcum support of euery rute and vayn, Welcum confort of alkynd fruyt and grayn, Welcum the byrdis beild apon the brer,25 Welcum master and rewlar of the ȝer, Welcum weilfar of husbandis at the plewys, Welcum reparar of woddis, treis, and bewys, Welcum depayntar of the blomyt medis, Welcum the lyfe of euery thyng that spredis,30 Welcum storour of alkynd bestiall, Welcum be thy brycht bemys, gladyng all, Welcum celestial myrrour and aspy, Attechyng all that hantis sluggardy! And with this word, in chalmer quhair I lay,5 The nynt morow of fresch temperit May, On fut I sprent into my bair sark, Wilfull fortill compleit my langsum wark Twichand the lattyr buke of Dan Virgill, Quhilk me had tareit al to lang a quhile;10 And to behald the cummyng of this kyng, That was sa welcum tyll all warldly thyng, With sic tryumphe and pompos curage glaid Than of hys souerane chymmys, as is said, Newly aryssyn in hys estait ryall,15 That, by hys hew, but orleger or dyall, I knew it was past four houris of day, And thocht I wald na langar ly in May Les Phebus suld me losanger attaynt: For Progne had, or than, sung hir complaynt,20 And eik hir dreidfull systir Philomeyn Hyr lays endyt, and in woddis greyn Hyd hir selvyn, eschamyt of hir chance; And Esacus completis hys pennance In ryveris, fludis, and on euery laik: And Peristera byddis luffaris awaik; Do serve my lady Venus heir with me, Lern thus to mak ȝour obseruance, quod sche, Into myne hartis ladeis sweit presens Behaldis how I beynge, and do reuerens.30 Hyr nek scho wrynklys, trasyng mony fold, With plomys glitterand, asur apon gold, Rendryng a cullour betwix greyn and blew, In purpour glans of hevynly variant hew; I meyn our awyn natyve byrd, gentill dow,5 Syngand in hyr kynd, I come hydder to wow; So pryklyng hyr greyn curage forto crowd In amorus voce and wowar soundis lowd, That, for the dynnyng of hir wanton cry, I irkyt of my bed, and mycht not ly,10 Bot gan me blys, syne in my wedis dres, And, for it was ayr morow, or tyme of mes, I hynt a scriptour and my pen furth tuke: Syne thus begouth of Virgill the twelt buke. Explicit scitus prologus; Quharof the autour says thus. The lusty crafty preambill, perle of May15 I the entitil, crownyt quhil domysday; And al with gold, in syng of stait ryall, Most beyn illumnyt thy letteris capital.

Turnus, persavand the Latyn pepill faill, Promittis Eneas allone hym tyll assaill.

Quhen Turnus knew the Latyn pepill haill Irk of the weir, and saw thar curage faill, By the frawart aduersiteis of Mart, Quhilk war tofor onbrokyn and stowt of hart, And thocht the tyme requiris hym, but abaid,5 Forto compleit the promys he had maid, Semyng as towartis hym tho euery wight To that effect addressyt thar luke and sycht: Than, onrequirit, by insaciabill desyre Langang to feght, and byrnand hait as fyre,10 Full hie rasand hys curage and hys cheir, He gan amyd the audiens appeir. Fers as a wild lyoun ȝond in Trace, By the huntar wondyt in the chace, Quhen the smert straik in hys breist all fast is,15 For ire the lokkyrris of hys nek vpcastis, Than first begynnyng to rays hys stern moyd, Reiosyt of the bataill, fers and wod, Onabasytly raschand the schaft in sundir, And on the man liggand at wait thar vndir, Hym to revenge, with bludy mouth doys bray;5 Nane other wys ferd Turnus the ilk day, Smytyn so brym in fervent violens, That all commouyt in the kyngis presens On this maner begouth to speke and say: Thar sall in Turnus be fund na delay;10 And al for nocht ȝon cowart Eneadanys Thar promys and thar wordis cumis aganys, Willyng retreit thar behestis and sawys; Sa sall thai nocht; we wil nane sik lawys: I sal thar falshed resist and ganestand,15 And feght contrar thar chiftane hand for hand. Thou ryall prynce and fader, kyng Latyne, Do sacryfy and conferm this convyne: For owdyr sal I with thir handis twa Ȝon ilk Troiane, forhowar of Asya,20 Do put to deth, send down to hell, quod he; Lat Latyn pepill syttyng by to se Quhou, myne allane with swerd in thar presens I sall revenge and end our allyris offens; Or than, gyf so betyd he wyn the gre,25 Lat ws all venquyst to hym subiect be, Ȝeld hym the crown enduryng term of lyve, And lat hym joys Lavinia to hys wyfe. Kyng Latyn tho with sad and degest mynd To hym answeris, and said apon this kynd: O douchty ȝyngkeir, excellent of curage, Quhou far as by thy forcy vassallage My febill age thou doith exceid, quod he, Als far mair diligently pertenys me, And ganand is, to consell and provyde,5 And exemyn euery chance may betyde, As I that has in part a maner feir, Be lang experiens knawand the dowtis of weir. Thow weldis Dawnus thy faderis realm and land, And feil citeis conquest with thyne awyn hand;10 Tharto thou has alsso a gentill hart, Liberall and fre, and in weir most expert, And kyng Latyn hes gold to geif the eik. Perfay, enew otheris, not far to seik, Of madynnys beyn onwed in Latyum wyde,15 And in the Lawrent feildis heir besyde, Of blude and frendschip na thyng myssemand, Bot worthy tobe queyn of ony land. Thoill me, I pray the, al dissait done away, Thir wordis quhoyn of weght to the till say;20 And sammyn prent thir sawys in thy wyt. Onlesum is I suld in wedlok knyt My douchtir till ald wowaris of this land, That hir tofor had axit in sik band: All the spa men and Goddis revelyng25 Declarit plane that was onlesum thyng. And netheles, I, venquyst cleyn but weir, For luf of the my spowsys cousyng deir, Ourcummyn be hir wofull terys and syte, All maner bandys now hes brokyn quyte;30 And fra my son in law, full wrangwisly, Hys spous onto hym promyst rest haue I, And forthir on hym movit a wikkyt weir. Sen syne in quhat chance I stand and danger, And quhou fers batellis now persewys me,5 Full weill thou wait, and seis, Turnus, quod he, And quhou huge travale thou has tholit and pane, As principall maste douchty capitane. Lo, twys in batale venquyst haue we be, And now scantly within our wallit cite10 The hope and weill of Italy defendis; Now of our recent blude, as noterly kend is, The flude of Tibir walxis hait agane, And of our huge banys quhite semys the plane. Quhou am I sterit thus in purpos feir?15 And quhidder flow I thus oft thar and heir? Quhat mad foly all to changis my thocht? Gyf that I reddy be and dowtit nocht The Troianys for my frendis to ressaue, Gif so war Turnus ded war and bygrave,20 Quhat! aucht I nocht far rather end the weir He beand in prosperyte haill and feir? Quhat wald our cosyngis, the Rutilianys, Or quhat wald say the other Italianys, Gyf the I suld thus wys sa wilfully,25 Axyng our douchteris wedlok and ally, Expone or offer to the ded? quod he: Fortoun defend that chance at sa suld be! Behald the chance of batale variabill, Persave of weir the sykkill ward onstabill:30 Haue reuth and mercy of thy fader ald, Quham Ardea now, hys cuntre, doys withhald, Diuidit far and disseuerit from the, And for thy saik quhou wobegone is he. Thus said the kyng; bot the violent curage5 Of Turnus hie mynd bowit neuer a stage; Quha wald with cuyr of medycyne hym meys, The moir encressys and growys hys mail eys: And, eftir that he first mycht speke agane, Thus he began expreym with wordis plane.10 O thou maist souerane fader, I the pray, To salue my honour, thou wald do away Thir curis, thochtis, and solicitude, For me thou takis; and, schortly to conclude, Suffir me forto plege my deth in wage,15 For gloryus renovn of vassillage: For we, fader, can swak dartis and brandis, Nocht with febill bot stalwart rycht handis, And of our wondis the red blude ruschis owt. To ȝonder provd Troiane, clepit sa stowt,20 Hys moder at this tyme salbe far to seik, Quhilk Goddes with hir subtell slychtis eik Hir son, accustumat to tak the flycht, Was wont to dek, and to hyde owt of sycht Within a wifly clowd, as for a trayn,25 And heild hir self alsso in schaddowis vayn.

The queyn perswadis Turnus fra stryfe desist, Bot he for batal can agane resist.

Be than the queyn Amata, all in feir Of this onkouth and new maner of weir, Wepyng full sor, all dedlyke, full of harmys, Hyr son in law Turnus hynt in hir armys, That was sa fervent in his ardent desyre.5 Turnus, said scho, thou best belovit syre, Be thir ilk wofull terys I the pra, And be the wirschip thou aw till Amata, Gyf ony honour of hyr or thy kyn Twichys or movys into thy breist within,10 I the beseik a thyng, myne awyn knycht; Desist and ces to mach Troianys in fight. Thou only comfort of our febill eld, Thou all our rest, our weilfar, and our beld, Haue reuth and piete of my wofull baill:15 In thy power and mycht restis alhaill The wirschip and empyre of kyng Latyn; Hys hows and famyll, now lyke to declyne, In the remanys, and is by the vpbore. I the assuyr, and certifeis tharfor,20 Quhat aventour in this fight sall happyn the, The selfin chance, Turnus, sall betyd me: Sammyn with the, gif thou endis in that stryfe, I sal depart furth of this irksum lyfe, Nor nevir thrall sall I remane to se Ȝon ilk Eneas son in law to me. Lavinia the maid, with soir smert, Hyr moderis wordis felt deip in hyr hart, So that the rud dyd hyr vissage glow,5 And full of terys gan hyr chekis strow; The fervent fyre of schame rysys on hie, Kyndland mar large the red culloryt bewte, So that the natural heit the blude dyd chace Our all the partis of hir quhitly face:10 Quhill that this virgyn, in this wofull rage, Syk cullouris rendris from hir fresch vissage, As quha byspark wald the quhite evor Indane With scarlet droppis or with brovn sangwane, Or quhar the scheyn lylleis in ony sted15 War pulderit with the vermel rosys red. The hait luf trublys for the knyght, That on this maid he fixis all hys sycht, And all the mair he byrnys in desyre Of bargane into armys, hait as fyre;20 Syne to the queyn Amata, but abaid, In few wordis on this wys he said: O my deir moder, of thy wepyng ho, I ȝow beseik, do not, do not so, Persew me not thus with ȝour grete and teris,25 Nor quhen I pas onto thir mortall werys. In marciall bargane contrary my fo, Do wa to present me sik takyn of wo: In Turnus myghtis lyis nocht, quod he, The chance of deth to mak hym selvyn fre.30 I say, gyf deth this way be to me schaip, Now may I not astart, nor it eschape. For at this tyme instant my messynger, Idmon clepyt, my credens hecht to ber Now to ȝone Troiane tyrrand, rehersyng5 My wordis, quhilkis lykis hym na thyng: That is to knaw, to morow, als ayrly As brycht Aurora in the orient sky With rosy chariot lyftis vp hir hed, The firmament schrowdyng in cullour red,10 That he move not aganys Rutilyanys Hys ostis, nor nane army of Troianys; Bot athir half fra batale, for the best, Baith sall Troianys and Rutilianys thame rest: And lat ws twa, this bargane to conclude,15 Betwix ws only dereyn with our blude, And into ȝonder feld, in stalwart stryfe, Lat athir seik Lavinia to hys wyfe. Fra this was said, fast to hys in he spedis, And bad onon do lat hym se hys stedis:20 Behaldand thame reiosys he in hart, To se thame stand sa fers with curage smart; Quhilk kynd of horsis quhilum, as thai say, Orythia, the lusty fresch may, Of Athenis the kyngis douchter and ayr,25 As ane maste ryall presand, wonder fair, Send from hir cuntre to kyng Pilumnus, Was foregrandschir onto this ilk Turnus; The quhilk stedis, schapyn at all delyte, Excedit far the snaw in cullour quhite;30 To speke of speid, thar swyftnes was ontald, For thai the wyndis blastis forryn wald. The byssy knapys and verlettis of hys stabill Abowt thame stud, full ȝaip and seruyabill, And with thar holl luyffis gan thame cheir,5 Dyd clap and straik thar leyndis to mak thame steir, Thar lokrand manys and thar crestis hie Dressys with trelȝeis and camys honestlye. Fra thens onto hys chalmyr went he syne; Abowt his schuldris assays hys halbryk fyne,10 Of burnyst maill, and schynand rychely Of fynast gold and quhitly alcomy. Tharwith alsso hys swerd addressis he, Quhat way he wald it oys in the melle; Hys sovir scheld assays he alsso,15 And eik hys tymbret helm with crestis two; Quhilk swerd was maid onto Dawnus hys fyre Be Wlcanus, the myghty God of fyre, That forgyt this blaid and temperit with hys handis, Hait glowand dyppyt in the Stigiane strandis.20 Syne with gret fors, enarmyt in all hys geir, Full lychtly vp he hynt hys stalwart speir, Quhilk tho amyddis the hall lenand stud Vp by a pillar huge square and rude; Quhilum the spulȝe he byreft from ane25 Clepyt Actor, a capitane Auruncane: The schaft he schuke, and branglys lustely, Tharto with lowd voce thus can he cry: O now thou speir, that neyir failȝeit thy deid Quhen I the callyt to my desyre in neid,30 Quhilum the weldit Actor, mast douchty knycht, Now the in hand withhaldis Turnus wight; Now is the tyme that I maste myster the: Forto dovn bet the corps thou grant to me Of ȝondir Phrigiane, is skant half a man,5 That with my stalwart handis I may than Hys halbrik of hys body to arras, Hakkyt, and rent, and persyt in mony place, And in the dusty puldyr heir and thar Suddill and fyle hys crispand ȝallow hair,10 That are maid creys, and curlys now sa weill, Yplet ilk nycht on the warm broch of steill, Dekkyt and donk, on hys wifly maner, Of fragrant myr and other envnctmentis seir. With sykkyn fury rage catchyt is he,15 That thus he carpys till a schaft of tre; And from the vissage of this ardent syre The sparkis glydis as the hait fyre, For veray fervour of the feirfull teyn Schynys and brystis furth of baith hys eyn:20 Lyke as the bull, that bargane begyn wald, Gevis terribill rowstis and lowis monyfald, Or than aggrevit, bustuus, and furthborn, Presys hys ire to assay with hys horn, Lenand hys spald to the stok of a tre,25 And with hys dynt the wynd to rentis he, Or, forto mak debait apoun the land, With hys hard clufe vpwarpys fast the sand. In the self tyme, na les of curage, Enee, Cled in hys moderis armour awfull to se,30 Scharpys hym self in furour marciall, Rasand hys greif for ardour bellicall, And joyus wolx of weir to mak ane end By syk proffer and poyntment as was send. Syne comfortis he hys ferys dolorus,5 And mesyt the dreid of sad Ascanyus, Declarand thame the fatale ordinans, Thar destyne, and Goddis purvians; And to the kyng of Lawrenteis, Latyn, Twychand this forsaid trety and convyne,10 Bad the messyngeris bair hame but delay Sovir answer, as thai desyrit alway, And of the peys and trewys, as thai spak, Proclame articulis and lawys of contract.

Juno, knawand Turnus last day at end, To stop the bargane has Juturna send.

Scarsly vpsprang the nixt day followyng,15 Scheddand the bemys of hys bryght mornyng Apoun the toppis of the montanys hie, As Phebus stedis first of the deip se Rasyt thar hedis and noys thirlys on hight, Our all the feildis blawand the cleir lyght;20 Quhen that the Troianys and Rutilianys The grund myssouris, evynnys, dichtis, and planys, Vndir the wallys of the cheif cite, Thar as the feild and fechtyng place suld be: Amyddis quham the harthis vp thai set, Quharon the fyris suld be maid and bet, And to the common Goddis eik bedeyn5 The altaris coverit with the scherald greyn. Sum otheris brocht the fontane watir fair, And sum the haly ingill with thame bair; With lynnyng valis or lyke apronys lycht Thai war arrayt, and thar hedis dicht10 In wyppys of the haly herb vervane. The legionys tho furth haldis to the plane, And all the rowtis of Awsonyanys, That otherwys ar hait Italyanys, Furth thryngis at the portis full attonys,15 With lancis lang and pykkis for the nonys. Thyddir all the Troianys wardis, by and by, And Tyrrheyn ostis ruschis hastely, Bodyn full weill in nobill armour seir; Nane otherwys with wapynnys and with geir20 Arrayt for the batale all at rycht, Than thocht the fury of Mars thame callit to fycht. Amyd the thousandis swyftly throw the planys Furth sprentis lustely thir capitanys, In rich purpour arrayt and fyne gold brycht,25 Assaracus sonnys and Mnestheus wight, And on the tother part strang Asilas, And bald Mesapus also with hym was, Neptunus son, expert in hors dantyng. And eftir that the trumpet blew a syng,30 Than euery partyment bownys to thar stand, And gan thar speris stik doun in the land, Set by thar scheildis, to behald the fyne. The wemen wedois and the matronys syne, Desyrus forto se the bargane stowt,5 Of childyr and of commonys mony a rowt That couth na wapynnys weld, nor armour weir, With the onweldy agit folk infeir, Clam on the hight and hedis of the towris, The wallys all and howsis ryggyngis flowris;10 And sum abufe apon the portis hie Ascendit ar to behald the melle. Bot Juno tho dovn from the hycht, I wys, Of the montane that Albane clepit is Now in our days, set than this hyllys dovn15 Had nowder name, honour, nor renovne, Scho dyd behald amyd the feldis plane Athir batellis and the ostis twane, Baith of the Troianys and the Laurenteis, And kyng Latynus cite eik scho seys.20 Onon to Turnus systyr vp on hie, That clepit was Juturna, carpys sche, Thys Goddes to that haly Nymphe, mastres Of wellys, stankis, and rowtand stremys expres; Quhilk honour Jove, the kyng of hevynnys hie,25 Hyr gave for the byreft virginite: Said, O thou Nymphe, wirschip of fludis cleir, That to my saul is hald maste leif and deir, Thou knawys weill, I the preferrit ay To all the otheris damysellys, persay,30 Of Latyn cuntre, quhat so evir thai wer That wrangwisly ascendit or drew neir The bed onprofitabill of Jupiter mast hie; And glaidly eik haue I not stakyt the Intill a party of the hevyn alssua?5 Hark now thy sorow, thou Juturna, And wyte me not bot I the warnyt haue. Turnus and thy cheif cite haue I save, Sa lang as that the fatis sufferit me, And quhill werd sisteris sa tholyt tobe:10 Bot now I se that ȝong man haste, but faill, To mach in feild with fatis inequaill; The lattir day and term approchis ne Of fatale fors and strangast destyne. Nowder this bargane ȝonder on the greyn15 Nor consideratioun may I se with eyn. Pas thou on, for thy deir brothir germane Gyf thou dar suffir ony mar dreidfull pane; To the this semys and pertenys, quod sche, Gyf that, perchans, ony bettyr may be,20 Or eft betyd onto ȝon catyvis kend. Scars had Juno thir wordis brocht to end, Quhen that the nymphe Juturna bedeyn Plente of terys furthȝet from hir eyn; Hyr fair quhite breist, thar as scho dyd stand,25 Thrys or four tymys smait with hir awyn hand. Saturnus get, this Juno, says; tha terys Na wys to this tyme pertenys nor efferys: Hast the, gyf that thou can be ony way Withdraw thy brother from the deth away;30 Or than do mak the ostis baith on steir, Provok the batale, and thame move to weir, And this convyne and trety, new consave, Do brek, disturb, and with the wynd bywave. I sall the warrand and the wyrkar be5 To mak the baldly vndertak, quod sche. On this wys Juno can this nymphe exort, And left hir hail in weir and dowt, at schort, With mynd full tryst, wobegone, and onsound, Full deip smyttyn with the sorowfull wound.10

Heir followis the sacrifyce and prayer, Fyrst of Eneas, syne kyng Latyn infeir.

In the meyn tyme, the kyngis of athir rowt From thar citeis and strenthis ischis owt. Amyd a four quhelit char Latyn that thraw With huge pomp by stedis fowr was draw, Quhais haris and hys tymplis war weil dycht15 With ryall crown of fyne gold burnyst brycht, Quharon stud turrettis twelf, lyke bemys scheyn, As it ane rych enornament had beyn Of cleir Phebus, that was hys grandschir hald: Nixt quham furth rollyt was prynce Turnus bald20 Within a twa quhelyt chariot of delyte, That drawyn was with stedis twa mylk quhyte; In athir hand held he, in feir of weir, The braid hed brangland on the jevillyng speir. The fader Eneas alsso furth withall, Of Romane lynnage the originall, Apon the tother half com thame agane,5 With byrnyst scheild that brycht as starris schane, And hevynly armour lemand all of lycht: Besyde hym raid Ascanyus the sweit wyght, That semyt weil, till euery manis doym, Ane other gude beleif and hope to gret Roym.10 Furth come the preste, quhamto accordyt mak The sacrifice of concord and contract, In vestment cleyn, for syk religioun wrocht, And a ȝong byrsyt swyne befor thame brocht, With a rowch twyntyr scheip sammyn infeir,15 Quhais woll or fleyce was neuer clyp with scheir; The bestis furth hes tursyt this ilke syre Onto the altar blesand of hait fyre. The princis tho, quhilkis suld this payce makyng, Turnys towartis the brycht sonnys vprysyng,20 With the salt meldyr in thar handis raith; The forrettis of thir bestis toppys baith They clyp and myssour, as tho was the gys, And cowpys full of wyne in sacryfys Abowt the altaris ȝettis he and he.25 With drawyn swerd syne the reuthfull Enee Hys orison furth maid, and thus he said: O thou brycht son, with thy scheyn bemys glaid, Be wytnes now till my behest, I pray; And this ilk grund mot testyfy quhat I say,30 For quham sa gret payn and aduersyte I sufferit haue feill syth on land and see; And thou almychty Jove heir my prayer; Saturnus douchtir, thou hys spows sa deir, Now mor benyng than thou was of befor,5 Sweit Goddes, heir me now, I the implor; And gentill Mars now takis tent heirtill, That withhaldis and writhis at thy will Every batale, stryfe, weirfar, or debait, Vndyr thy hie power deificait:10 All fludys I call, fontanys, and stremys cleir, And all maner of reuerend Goddis seir Abuf the hevyn ydred and starrit sky; And ȝow eik, blyssyt wightis, I testify, That vnder erth or law in hell doun beyn,15 Or in the fomy seis stremys greyn: Gif so betyd, that fallys the victory To Turnus on the Ausonyan party, It is conuenient, and we grant to fle, As venquyst folk, till Evandrus cite:20 Ascanyus sall als tyte thir feildis withdraw, Nor Eneadanys neuir, from the ilk thraw, Aganyst ȝou sall rebell nor move weir, Ne with na wapynnys eft thys cuntre deir. Bot gif so beys, Mars our God glorius25 The victory and ouyrhand grantis ws; As I beleif far rathar sall befall, And that als tyte conferm mot Goddis all Throw the gret mychtis of thar deite! Gif that sa fair fortoun betydis me,30 Ne will I not command Italianys Tobe subiect, nor obey the Troianys, Ne ȝit this realm desyre I not to me: Bot athir of our pepill mot go fre, Onthrall, onvenquyst, in lawys all evynly5 Considerat in perpetuall ally. The wirschipyng of Goddis in sacryfice I sal thame lern and tech at my devys: My fader in law, the kyng Latinus heir, Most rewle the pepill baith in peax and wer;10 My fader in law, as souerane lord and syre, Duryng hys lyfe most bruke solempnyt empyre. Suffir my Troianys than, as we ar bovn, For me to beild a strenth and wallyt tovn, And to this cite, quhar we sall duell at hame,15 Lat the madyn Lavinia gif the name. Thus first Eneas said; and eftir syne Apon this wys hym followys kyng Latyn, Behaldand towart hevyn quhar he dyd stand, And to the starnys vphevyis hys rycht hand:20 By this ilk erth, seys, and starnys hie, I sweir in like wys onto ȝou, Enee, And by Latonas byrth or twynnys twa, The brycht Apollo, and chast Diana, And by the dowbill frontit Janus, and all25 The pyssans of the Goddis infernal, And by the dyrk sanctuary, blak as sabill, Of grevos Pluto, that God revengeabill: The hie fader abuf mot heir my cry, That dois with thundir sik concord ratify.30 I twich thyr altaris, and ingill present, quod he, And testifyis ilk godly maieste; Sail nevir tyme, sesson, nor day betyde, To breke this peax on the Italian syde, Ne this considerans anys part in two,5 Quhat way that evir happynys the mater go; Ne na manner of violens, bost, nor aw, Sail ony wys me tharfra withdraw, Bot ferm and stabill all sall haldyn be: All thocht the erth wald myddill with the see,10 And with diluge or invndatioun schent Covir and confund athir eliment; Or thocht the hevyn in hell resolue wald, Our promys sall inuiolat be hald. Lyke as this ilk ceptour wand ȝhe see,15 (Perchans that tyme a ceptour in hand bair he) Sail nevir burgioun, nor spred branschis lyte, Nowder rank levys, nor blosum of delyte, Sen it is anys in wod, thar as it grew, Law from hys stok hard by the rutis hew,20 And wantis now hys moder of nurysyng; For all the syonys and twystis wont to spryng Or grow thar fra, as ȝhe may se perfay, With egge lumys bene sned full quyte away; Vmquhile a growand tre, thar it dyd stand,25 That now thus by the crafty warkmanis hand Inclusyt is and coverit lustely In burnyst gold and finast alcomy, And gevyn our forfaderis of Latyn land, As ceptour ryall, forto bere in hand.30 With wordis sik, and ferm relatioun, This fynal suyr confideratioun Athir pryncis has confermyt and sworn, Amyd thar nobillys standyng thame beforn: Syne, eftyr thar auld cerymonys and gys,5 The bestis dewly adrest for sacryfys Thai brytnyt haue amyd the flawmys red, And rentis out, or thai war fully ded, The entralys of all thir bestis ȝit alyve; Syne furth of platis or ballancis belyve10 With pasyt flesch plenyst the altaris large, Tharon bestowand in hepys mony a charge. Bot tho begouth of new this ilk bargane Semyng to the Rutilianys, euery man, Tobe ane rycht onevynly interprys,15 And diuers rumour can in thar brestis rys, With mony syndry demyng and consait; He thynkis thus, and he ane other gait; And ay the nerrar and mar diligently At thai the mater consider and aspy,20 Weill thai persaue and behaldis, sans faill, Thir campionys war not of strenth equaill. And onto this opinioun the ilk thraw Helpit mekill, that with still pays so slaw This Turnus musand towart the altar past,25 And it lawly adornyt with face doun cast, With chekis walxin leyn, to thar semyng, Quharon the soft berd newly dyd furth spryng, As all to ȝyng with sic ane to haue daill, Thai thocht hys vissage all becummyng paill.30

Quhou Juturna be slycht and enchantment Brekis the peax, and hasty batale sent.

And eftyr that this ilk commonyng Thus walxand mare and mare by mony a syng Juturna hys systyr dyd persaue, And saw the common wlgar hartis wave In diuers sentens and ententis seir;5 Than in amyd the rowtis drew scho neir, In form and lyknes of Camertis bald, Of nobill blude cummyn and lynage ald, And of hys fader the bruyt and renowne Was magnifeit in wirschip wondir hie,10 Tharto hym self maste douchty cheveller In dedis of armys and in fait of weir. Amyd the ostis this wys dyd scho thryng, Not onexpert to convoy sik a thing, And diuers rumouris in the pres skalis sche,15 Syne siclyke wordis carpis apoun hie: O Rutilianys, aschame ȝhe not for feir Into sa gret a perrell and danger A sylly sawle to put in aventour, That for ȝow all sall vndirly sik cuyr?20 Quhidder ar we not equale in our entent To the Troianys in number or hardyment? Lo, all the Troianys and Archadianys Befor ws heir arrayt on the planys: The fatall pissans is hail in this sted, And the Tuscanys that Turnus hes at fed. Sa few tha beyn, ȝhe may behald and se, That gif we list mak onset, trastis me, The half of all our menȝe gret and small5 Sail not fynd ȝondyr a fa to mach withall. Ȝon Turnus, to the Goddis abuf full straucht, To quhais altaris hym vowyt and betaucht He hes for ȝou, as that ȝhe se, said sche, With fame eternal sal vpheit be,10 As euermar alyve and maist name couth, Carpit and sung in euery mannis mowth; Quhen we, as thrallys, leif sal our natyve land, And onto prowd tyrrantis, hes the ovirhand, Salbe compellit as lordis till obey,15 That now, thus sleuthfully, sa fant and fey Hufys still on thir feldis as we war ded, And for our self list schape for na remeid. With siclike wordis the myndis and consait Of the ȝongkeris was inflawmyt hait,20 And mair and mar now, all the feld abowt, The murmur crepys out throw euery rowt; So thai quhilkis air desyrit peax and rest, And for the common weill thocht it was best To mak end of the bargane on this wys,25 Ar alterit haly in ane other avys: For now desyre thai batale, but abaid, Prayand God this contract had neuer bene maid, And has compassioun caucht in hart, but faill, Of Turnus chans, semyng so inequale.30 Thys self tyme eik hes Juturna, I wys, Ane other grettar wondir ekit to this, And heich vp from the hevyn befor thame plane A takyn hes scho schawyn auguriane; Syk a syng, that nane other to that entent5 Was mar effectuus nor conuenient To trubbill Italian myndis, and mak thame raif, And with fals demonstratioun to dissaue. For Jovis fowle, the ern, com sorand by, Fleand vp heich towart the brycht red sky,10 Befor hym catchand ane gret flycht or ost Of fowlys that dyd hant endlang the cost, Quhilk on thar weyngis, sair dredand hys wraik, Skrymmys heir and thar with mony sprauch and craik; Quhil suddanly this egill with a surs,15 As he towartis the fludis maid hys curs, Dispittuusly intill hys punsys he Hes claucht a swan excellent of bewte. Than the Italianys apon athir syde Rasyt thar myndis to se quhat suld betyde;20 And sone the other fowlys heich in the sky Turnyt agane with mony screym and cry, To chais and to assail thar aduersar, A wondir thing to se! vp in the air: The lyght thai dirkyn with thar pennys thik,25 And throw the skyis with mony a strake and pik, Sammyn in a sop, thik as a clowd, but baid, Thar fa thai dyd assalȝe and invaid, Sa lang, quhil that by fors he was ourset, And of the hevy byrdyng sa mait and het30 That hys mycht falȝeit, and of his clukis rude The egil leit hys pray fall in the flude, And vp amang the clowdis flaw away. Than the Rutilianys all, full glaid and gay, With huge brute and clamour lowd onane5 Salust this syng or takyn augurian; Syne sped thar hand, and maid thame for the fight. And, first of othir, Tolumnyus the wight, That was a spa man and diuinour sle; Ȝa, this was it, ȝa, this was it, quod he,10 Quhilk oft I visseit and desirit by and by: This gud takyn I ressaue and ratify, And knawys the Goddis favour in our supple. Rutilianys, hynt ȝour wapynnys, and follow me, Quham now ȝon vauengeour, ȝon ilk stranger,15 Affrays so with hys onworthy weir, Lyke tyll onweldy fowlys on the cost, And our marchis with fors and mekill bost Inuadis, rubbis, and spulȝeis, as ȝe se: He sall, for fer, sone gif the bak and fle,20 Mak sail onon, and hald for euer away Throu the deip sey outour the fludis gray. Tharfor ȝhe sall all sammyn, with ane assent, Assembil now ȝour rowtis heir present, And into feild defend, as men of mayn,25 Ȝour kyng Turnus he be nocht reft and slane. Thus said he, and with that word als sa fast Towartis his fais forganys hym dyd cast A weirly dart onon with all his byr: The sovir schaft flaw quhisland with a quhir,30 Thar as it slydis scherand throw the ayr, Oneschewabill, bath certane, lang, and squar. Sammyn with this, vp rysis for the nanys Ane huge noys and clamour all at anys; With sik affray and hydduus dyn and beir5 The wardis all and ostis war on steir, That, for the rerd and deray, hait in ire The hartis kyndillis of euery bald syre. Furth flaw the takill rycht our forgane his face, Thiddir as for the ilk tyme stude, percace,10 Nyne brethir germane, fresch and ȝyng of age, Nane in thar ost mair semly personage, Quham the trew faithfull wife Tyrrhene ilkane Bair till hir spows Gilip Archadiane; Of quham this dart hyt ane, thar he dyd stand,15 A gudly spryngald, a fair ȝyng galland, Richt schaiply maid, in armour schynand brycht, And at the myddill markyt hym full rycht, Quhar as the wovyn gyrdill or tysche Abufe his navill was beltit, as we se,20 And smate hym evyn into the sammyn place Neyr quhar the bukkill hys sydis dyd enbrace, Throw gyrd hys body with a grevos wond, And spaldyt hym stark ded apon the grond. Bot than hys bald brethir in a rowt,25 Wod wraith for wo, sum hyntis swerdis owt, Sum claucht in hand the dart with the steil hed, And in thar blynd fury, full of fed, Ruschit on thar fays with a feirfull braid. Aganys quham to resist and invaid,30 The rowtis of the army Lawrentanys Ran to recontyr thame: and tho atanys Agane assemblit, as a spait of flud, The Troianys and the Tuscanys wraith and wod, With thame of Arcad in arrayt feildis,5 With burnyst armour and thar payntit scheildis; Apon sik wys that all, with ane assent, Caucht haill desyre to feght apon the bent, And to dereyn in feild with bytand brand The haill mater. Sum schot doun with thar hand10 The altaris markyt for the sacryfys: Belyve our all the lyft vp semyt rys The fell tempest of dartis schote and flanys, So thik as ony schour of scharp hailstanys, As dyd incres this flycht of stelit hedis;15 Full grewos grew the bargane in all stedis: Sum ran to the wyn flacconys for gret ire, And sum hynt vp the furnace full of fyre. The kyng hym self, Latinus, for the affray Fled to the cite, and tursyt with hym away20 Hys Goddis and hys mawmentis, drevyn abak With a schamefull rebute and mekill lak, Left the concord ondone, not brocht till end. Sum brydillys stedis, and cartis vp dyd bend, And sum in haist with a lowp or a swak25 Thame self vpcastis on the horsys bak, And war all reddy in the stowr at hand With drawyn swerd and nakit burnyst brand. Mesapus, full desyrus in the pres Fortill confund the trety and the pes,30 A kyng Tyrreyn, Aulestes, in that sted With kyngis ensenȝeis and with crown on hed, Affrays sore, at hym dryvand hys steid: The tother drew away for feir and dreid, And bakwartis fallys on hys schuldris and crovn,5 Onhappely, apon ane altar dovn, Quhilk stud percace behynd hym on the land. Mesapus than, full fers, with speir in hand Apon hym drave, thocht he besocht hym fair, And with this schaft, that was als rude and squar10 As it had beyn a cabyr or a spar, Dovn from hys stowt cursor, na thyng skar, Smait hym a grewos wond and dedly byt, And syne thir wordis said; Ha, art thou hyt? Ha, that thou has: this is, be myne avys,15 To our gret Goddis mair ganand sacrifys. Italianys hurlys on hym in a floyt, Spulȝeit hys corps, hys membris ȝit all hoyt. Chorineus tho, that was a stowt Troiane, To meit ane Ebusus, com hym agane,20 That wald haue smyt hym with a bustuus dynt, And on ane altar a byrnand schide has hynt, And gan it rycht amyd hys vissage stair, That blesyt vp hys lang berd of hair, Quhilk, scaldit thus, a strang fleur dyd cast.25 And forthir this Chorineus alsso fast Ruschit on hys fa, thus fyrefangit and onsaucht, And with hys left hand by the hair hym claucht: Syne with hys kne hym possit with sic a plat, That on the erd he spaldit hym all flat,30 And with hys styf stok swerd in sik estait Throu baith the sydis at the first dynt hym smait. And Podalirius with drawyn swerd list not ces Alsus the hyrd to persew throu the pres, Quhilk ruschis abak for feir, hys life to save,5 In the vangart, throw mony a poyntit glave: Bot, quhen he saw his fa sa neir invaid That he na wys mycht eschew nor evaid, Vphesit he hys braid ax rude and squair, And akwartly strake at hys aduersar,10 Quhilk from amyd hys forhed, neir hys crovn, Onto hys chyn the egge dyd carvyn doun, That far onbreid hys armour, quhar he stude, Was all bysprent and blandit full of blude. Tho Podalirius the hard rest dyd oppres, Or cald and irny sleip of dethis stres; And vp the breith he ȝald into thar sycht, With eyn closyt in euerlestand nycht.

Enee sair wondyt of the feild dyd pas; In quhais absens Turnus mair cruell was.

Than the reuthfull and pacient Eneas, Behaldand quhou all wrang the gem dyd pas,20 Hys rycht hand onenarmyt, to stynt thar fed, Furth strekis, and oncoverit hes hys hed, And cryis and clepis on his pepill tho; My frendis deir, quhidder now hurl ȝe so, Ilkane aganys other? quhou may this be? Quhat has movit this hasty discord? quod he. O, stanch ȝour wraith for schame, or all is lorn!5 The payce and concord now is twichit and sworn, And the articulis and the lawys dyng Appunctit vp, and promist euery thing: Of det and ryght I aucht apon this land Allane Turnus recontyr, hand for hand:10 Suffir me perform my dereyn by and by, And do away all dreid and villany. I sall with my hand sone mak ferm and stabill Our appoyntment, for evir onvariabill; For this ilke sacrifice violate in this sted15 Sall rendir onon Turnus to me ded. Amyd sic sawys, as he thir wordis said Forto asswage thar mynd, but mar abaid A quhirrand arrow, lo, with fedderit flycht At swift randon dyd in hys the bayn lycht;20 Oncertane fra quhat hand that it was sent, Quhat kynd of schote, nor of quhat instrument. The hie glory of sa notabill a deid Is hyd, that nane knew quha it dyd but dreid, Nor wist quha wrocht had to the Rutilianys25 Sa gret wirschip and lovyng for the nanys; Quhidder it betyd on cace and aventur, Or of sum God be dispositioun suyr; Nor nevir person eftir, he nor he, Dyd hym avant he wondit had Ene.30 Quhen Turnus all the chiftanys trublit saw, And Eneas sair wondit hym withdraw, Than, for this hasty hope als hait as fyre, To mell in feght he caucht ardent desyre: He askis hors and harnes baith at anys,5 And haltandly in hys cart for the nanys He skippis vp and musturis wantonly, Furth sprentand throu the feildis by and by, And at his will, quharso hym list tobe, With hys awyn hand the renȝeis rewlis he.10 And dryvand furth thus into his ire Laid feill corpsis ded, and mony bald syre; Down strowand eik vnder fut in the plane Diuers otheris ȝit throwand and half slane: Owder with his cart the rowtis he drave away,15 Or, as thai tuke the flycht for gret affray, Castyng speris and dartis scharp hynt he, And leit thame thik amang his fays fle. Sik wys as bludy armipotent God Mars, Besyde hys frosty flude Hebrum in Tras,20 Full hastely bownand to batale feild, Makis gret bruyt and clatteryng with hys scheild, Quhen he list movyng weir mast chevalrus; Furth steris hys stedis, fers and furyus, Quhilk fleys furth sa swith with mony a stend25 Owtour the planys at large quhar thai wend, That thai forryn and goys befor alway Ȝephyrus and Nothus, swyftest wyndis tway: And, with the dyn of thar feyt and hys cart, All Trace gronys onto the ferthar part.30 Abowt hym walkis, as hys godly feris, Dreid with paill face, Debait, and mortale Weris, The Wraith, and Ire, and eik fraudfull Dissait, Lyggyng vndir covert at enbuschment or await. Turnus siclike, als chery, prowd, and lycht,5 Amyd the batale catchys to the fycht Hys stedys, rekand of swete quhar thai raid. And sa baldly hys fays dyd invaid, With sik slauchter, that piete was to se; And sik deray has maid in the melle,10 That hys swyft stedis hovys, quhar thai went, Spangit vp the bludy sparkis our the bent, Quhil blude and brane, in abundans furth sched, Mydlit with sand vndir hors feit was tred. For he, or now, hes doun bet Sthenelus,15 And kyllit eik Thamyrys and Polus: The formast twa he slew machit at hand; And this Polus, as he far of dyd stand: On far eik slew he of Imbrasyus The sonnys twa, Glawcus and Iasus,20 Quham this Imbrasyus fosterit had, baith twa. Into the far cuntre of Lycia, And thame instrukit had full equaly In fait of armys, and to hant chevelry; Owder till assaill befor, or ȝit behynd,25 Or with swift hors for till forryn the wynd. Ȝond, in ane other part, amyd the feild The fers Eumedes walkis vnder scheild, Quhilk was the son and air, as that thai tell, Of agit Dolon valȝeant in batell:30 The name he bair of hys fore grandschir wight, Bot the strang handis and stowt curage in fight Of hys awyn fader, this Dolon, he bair; Quhilk at Troy vmquhile, as the sege lay thar, Ane was of sa stowt curage and hie will5 That he durst ask the chariot of Achill To his reward, for that he sa baldly The Grekis tentis tuk on hand to aspy: Bot the son of Tedeus, Diomed, Ane other fassoun hes hym quyt his meid10 For sa stowt ondyrtakyn, and hym sleuch: And ȝit for all his renovn, provit eneuch, Ne durst anys pretend, for all hys dedys, That he was worthy to weld Achillys stedys. Bot to our purpos; this forsaid Eumedes15 As Turnus dyd behald ȝond in the pres, On the plane feld thar as he dyd ryde, First weill a far way at hym leyt he glyde A fleand dart; and furth with that, rycht thar, Gan stynt hys horssis and his quhirland char,20 And ferely dyd lepyng from hys cart, And sone apon hys aduersar astart, Quhilk tho was fall to grond, and half deill ded: Syne with hys fut doun thryst in the ilk sted Hys fair nek bayn, and owt of hys rycht hand25 Richt austernly has he thrawyn the brand, Quhilk schynand brycht into hys throte he wet, And tharto ekyt thir wordys wondyr het: O thow prowd Troian, lyggand thar at grond, Now may thou myssour the feld at thou has fund;30 Lo heir the bundis, lo heir Hesperia, Quhilk thou to seik in weirfar was sa thra: Thys is the bontay thai sal bair away That dar with wapynnys or armour me assay! To hym in feir also has he laid5 With a scharp castyn hed, but mair abaid, Ane Butys, and eftyr hym ane Chloreus, Syne Sybar, Dares, and Thersilocus, And Thymetes, a man of full gret fors, Castyn from hys staffage, skeich, and hedstrang hors.10 And as the blastis with thar bustuus sovn From mont Edon in Trace cumis thuddand doun On the deip sey Egean fast at hand, Chasand the flud and wallys to athir land; And quhar the wyndis assalys, the suyth to say,15 The clowdis fleys fast our the hevyn away: The sammyn wys, quhat way at Turnus went, The rowtis red hym plane rovm on the bent, And all the ostis fast abak dyd fle; For, with sik fors and fard furth dryvys he,20 Hys bissy movand tymbrell euery art Catchis the wynd and ayr forgane hys cart. Phegeus, a Troiane, seand Turnus all mad Sa instantly assaill with strakis sad, Na langar mycht hym thoill, bot with bald hart25 Hym self kest in the way to meit hys cart; And he the renys in hys ryght hand hynt, Syne writhit hes about, or euer he stynt, The fomy mowthis of the hasty stedis. And as this douchty man, sa gud at nedis,30 Thus hang and harlyt was in euery art By the lymouris and hamys of the cart, That he hys body mycht nocht kepe nor held, To covyr with hys armour and his scheld, The speir hym followis with scharp hed and braid,5 And rent hys hawbrik of dowbill plyis maid, Hurt his body sum deill, nocht fully sond, Persand the hyde, and maid a litill wond. He, nocht the les, agane hys fa furth sprent, With hys braid scheild or target evir vp stent,10 And in hys hand held drawyn the burnyst blaid, Cryand for help his aduersar till invaid; Quham tho, allace, gret piete was to se! The quhirland quheill and spedy swyft extre Smate doun to grond, and on the erd lay plat:15 And, as he fell, Turnus followis with that, And evyn betwix the helm can hym arras And vmast roll or hem of hys curas, Smait of his hed clenly with hys brand, And left the corps lyke a stok in the sand.20

Na mannys cuyr nor craft of surrurgyne Mycht heill Eneas, bot Venus medycyn.

And as Turnus thus in the batale sted With the ovirhand sa feil corps laid ded, The meyn quhil Mnestheus and traste Achates Hes led the bald Eneas of the pres, Ascanyus ȝyng with thame in cumpany, And to the tentis brocht hym all bludy, With steppis slaw furth stalkand all in feir,5 Lenand ilk pays on a lang poyntit speir. Wod wroth he worthis, for dysdene and dispyte That he ne mycht hys ferys succur als tyte: He wrythis, and enforsys tyll owtdraw The schaft in brokkyn, and the hed withall:10 He axis help at all thar standand by, Quhat was the nerrest way and maist reddy; And bad thai suld with a scharp knyf that tyde Scheir doun the wond, and mak it large and wyde, Rype to the boddum weill, and tak gude tent15 To sers the hyrnys quhar that the hed was went, That thai mycht hast thame self, but mair delay, To the batale, forto stynt this effray. Now was thar than present in the pres Iapis, that was son of Iasides.20 Abuf all otheris to the God Phebus he Was best belovyt and haldyn in dante; With quhais favour vmquhile strangly caucht, This God Appollo gladly has hym taucht Hys craftis and his officis, by and by,25 Of diuinatioun or of augury, The musik tonys to play on harp waill sle, And forto schute and lat swyft arrowis fle. Bot this Iapis, fortill prolong, perfay, Hys faderis fatis, quhilk as bedrall lay30 Befor hys ȝet, of hys lyfe in dispar, Had levyr haue knawyn the sciens and the lair, The myght and fors of strenthy herbys fyne, And all the cunnyng of vse of medycyne, And with sik secrete craftis prevely5 To leid hys lyfe and tyme mair esely. Eneas standis byttyrly chidand, Lenand apon a bustuus speir in hand, Amyd gret confluens of thir childer ȝyng, And eik his son Ascanyus fair wepyng;10 Bot he na thing hym movit at thar terys. Than this Iapis, sage and ald of ȝheris, With habyt schapyn on furrugyn mak, Vprollit weill and wymplit far abak, Rycht bissely with hys nait handis tway15 Begouth fortill exem, and till assay The wond with mony crafty medycyn, And mychty herbys taucht be God Appollyn; Bot all for nocht his travale and hys pane. Oft with hys rycht hand sersis he, invane,20 To rype the owtgait of the wond sa wyde, And forto seik the schaft on euery syde, With hys wynrys and grippand turcas sle To thrist the hed, and draw furth, pressis he: Bot, for na chance that evir betyd may,25 Wald fortoun dres hys hand the sovir way; Na thing avalyt hys crafty medycyne, Nor ocht hym helpys his master Appollyn. And now the grisly dreid, ay mair and mair, Our all the feildis walkis heir and thar,30 Nerrar drawys the perrell and affray; So that all dyrknyt wolx the cleir day Of dusty puldir in the hevyn dyd stand; The horsmen all approchis fast at hand, That dartis thik amyd the tentis fell:5 Wofull clamour with mony cry and ȝell Went to the skyis of ȝong men faucht in feild, And thame that swelt, sair wondit vnder scheild. Venus hys moder tho, this pane to meys, Caucht rewth and piete of hir sonnys dyseys,10 And from the wod of mont Ida in Creit Vp hes scho pullit dictam, the herb sweit, Of levis rank, rypit, and wondir fair, With sprowtis, sprayngis, and vanys our alquhar, As that we se on sik verdour spryngand,15 And on the top a purpour flour curland: Sik gresis gude beyn no wys onknaw To the wyld bestis, quhen that ony thraw Thai with the fleand arrow beyn ourtak, The hed stikand owther in syde or bak.20 Thiddir brocht Venus this herb; and scho was schrowd Baith face and body, in a watry clowd; And with the herb alsso mydlit hes sche The hailsum thryfty watir wondir sle, That from hir brycht lippys scho ȝet in hy;25 And temperis and enbalmys prevely The plastyr tharwith, strynkland all ourane The hailsum jus of herb ambrosian, And the weill smelland herb hait panaces. This ancyent surrigian, Iapes,30 With sik watir or jus, that he nocht knew, The wond mesys, and softnyt hes of new: And suddanly the payn vanyst als cleyn Of hys body, as thocht it had beyn Bot a dyrlyng or a litill stond;5 All blud stanchit and stud in the deip wond. Tharwith baith hed and schaft com owt droppand, But ony pull following of manis hand, That strenth and fors of new to mak debait Restoryt war onto thar ald estait.10 Harnes, harnes, bryng hym hydder in hy! Quhy stand ȝe sa? Iapis gaue a cry; And with this word aganyst thar fays he Hes first thar spreit inflammyt to melle. O Eneas, quod he, I mak ȝou suyr,15 Throw manis mycht was neuer wrocht this cuyr, Nor be na mastir craft of medycyne; Thou art not helyt by this hand of myne, Bot be sum grettar God, full weill I se, The quhilk to grettar workis preservis the.20 Eneas tho, desyrus of bargane, Hys lymmys in legharnes gold begane Claspyt full clos, and dyd hym self array; Bad speid in haist, for he hatit delay: He schuke and branglit fast his speir that tyde.25 And eftir hys active scheild was by his syde Cowchit full meit, and on his bak full thik Sesyt his curace or hys fyne hawbrik, Ascanyus ȝyng tendirly the ilk place, With all his harnes bilappit, dyd embrace,30 And throw his helmys ventall a litill we Hym kyssyt hes; syne on this wys said he: O thou my child, do lernyng, I the pray, Vertu and verray laubour till assay At me, quhilk am thy fader, as thou wait;5 Desyre tobe chancy and fortunate As othir pryncis, quhilkis mair happy beyn. Now sall my rycht hand thy querrell susteyn, And the defend in batale by and by, To mak the partisman of gret senȝeory.10 Do thou siclyke, I pray the, myne awyn page, Als fast as thou cumis to perfyte age, Ramembir heiron, and revolue in thy mynd Thy lynage, thy forbearis, and thy kynd; Exempill of prowes in the steris frendis befor,15 Baith fader Eneas and thyne vncle Hector.

Juturna gydys hir brotheris cart rycht sle Frawart the batel, he suld nocht mache Enee.

Quhen this was said, furth at the portis hee, Schakand in hand a gret speir, ischit he: With hym also to the feild ruschis owt Anteus, Mnestheus, and ane full thyk rowt;20 Alhaill the barnage flokkis furth atanys, Left voyd the tovn and strenth with wasty wanys. Than was the playn ourset, quha com behynd, With dusty stew of puldyr maid folk blynd, And, for stampyng and fell dynnyng of feyt, The erd movit and trymlyt euery streyt. Turnus, apon the party our rycht forgane,5 Persauyt thame thus sterand throw the plane, Thame saw also the pepill Ausonyanys, And the cald dreid for feir ran throw thar banys. First of the Latynys all, this ilke maid Juturna thame knew, and was not glaid;10 Scho hard the soundis and the fell deray, And quakand fast for feir hes fled away. Bot this Eneas, full bald vndyr scheild, With all hys ost drave throw the plane feld, And with hym swyftly bryngis our the bent15 A rowt coill blak of the stew, quhar he went. Lyke as the bub or plaig of fell tempest, Quhen that the clowdis brekis est or west, Dryvys by fors throw the sey to the land, Doand the cayrfull husbandis vnderstand20 The gret myscheif tocum, and felloun wraik; Quhilk, with fair hartis quakand, allake, allaik! Says, lo ȝon bub sall stryke dovn growand treys, Doun bet our cornys, and by the ruyt vpheis, And far onbreid ourturn all doys vpstand:25 Hark! heir the swouch cumis brayand to the land. On siclyke wys this ilk chiftane Troian The corsy pasand Osyris hes slane: Mnestheus kyllyt Archet, and Achates Byhedit has the wight Epulones;30 Gyas doun bet Vfens the gret captane; Dovn fell also the gret augurian, Tolumnyus him self, that the ilk day Threw the first dart hys fays till assay. Vprysis than the clamour, and a scry5 Quhilk semyt wend onto the starnyt sky. Thar curs abowt than the Rutilianys Hes tane the flyght, and gave the bak atanys, Skatterit throw owt the feldis heir and thar, Quhil stovr of puldir vpstrikis in the air.10 Bot the chiftane, this vailȝeant Ene, Dedenȝeit nane doun bet as thai dyd fle, Ne thame invaid that met hym face for face, All thocht thai fawght with wappyn, swerd or mace; Bot throw the thikast sop of dust in hy15 Only Turnus went to seik and aspy, And hym allane, accordyng the tretye, He askis and requiris into melle. With dreid heirof the mynd was smyttyn so Of Juturna, the verray virago;20 Quhilk term to expone, be myne avys, Is a woman exersand a mannys offys; Amyd the lyamys and the thetis thar Doun swakkis scho Metiscus the cartar, That Turnus char had forto rewle on hand,25 And left hym lygand far ȝond on the land, Fra the cart lymmowris warpit a gret way; And scho, in sted, hys office dyd assay, And with hir handis abowt writhis sche The flexibill renys frawart the melle,30 Berand the lyknes in all maner thing Of Metiscus voce, person, and armyng. Als feill wrynklis and turnys can scho mak As dois the swallow with hir plumys blak, Fleand and seirsand swiftly thar and heir5 Our the gret lugyngis of sum myghty heir, Apon hir weyngis scummand euery syde Thir heich hallys, bene full large and wyde, Gadderand the small morcellis est and west To bair hir byrdis chepand in thar nest;10 Now into gowsty porchis doith scho fle, Now by the donky stankis soundis sche: In siclike wys this Juturna belyfe Throw owt the ostis gan the horssis dryfe, Circuland abowt with swift fard of the cart15 The feildis our all quhar in euery art, And schew hir bruthir Turnus in his char, Now brawland in this place, now voustand thar; Na be na way wald scho suffir that he Assembill hand for hand suld with Enee;20 Bot fled hym far, and frawart hym held ay, Writhand hir cartis curs ane other way. In na les haist Eneas on the bent Hys quhelys turnys and writhis mony a went; The man he seirsis throw the effrait routis,25 And on hym callis with lowd cry and hie schowtis. And als feill sys as he his eyn kest Apon his fa, al tymys he hym adrest To chas hym with swyft curs throu the melle, On hors that semyt ryn as fowle dois fle; Bot evir als oft Juturna ane other art Awaywart turnys and writhis hyr broderis cart. And thus Eneas remanys all on flocht In syndry motioun of ire, bot all for nocht: Allace! ne knawis he not now quhat to do:5 Diuers thochtis, and seir consatis, lo, Hys mynd in mony contrar purpos sent. And as he thus was trublit in entent, Mesapus, that on cace was neirhand by, And in hys left neif haldis all reddy10 Twa sowpill castyng speris hedit with steill, Of quham that ane full sovirly and weill Towart Ene addressit leit he glyde. Eneas hovit still the schote to abyde, Hym schrowdand vndir his armour and his scheild,15 Bowand hys howch, and stude a litill onheld: And, netheles, this speir, that scharply schar, Of hys basnet the tymbrell quyte doun bair, And smait away the creistit toppis hie. Than mair in greif and ire vpgrowis he,20 Seand hym catchit with dissait and slycht, Quhen that he hes persauyt in his sycht Turnus horsis drevyn ane other art, Awaywart turnyng sa feill sys his cart: Tho mony tymys lowd did he testify25 Gret Jupiter, quhou that sa wrangwisly He was iniurit, and constrenyt to fight; To witnes drew he als with gret onrycht The altaris of considerans violate; And now at last, full furyus and hait,30 The mydwart of his ennemys dyd invaid: With prospir chance of batale, sa onglaid And terribill to his fays walxis he, That hail, but ony differans of degre, All goith to wraik; for na man list he spair:5 A cruell slauchter he hes rasit thar. All kynd of wreth and breithfull ire now he Leyt slyp at large, but brydill, with renȝeis fre.

Heir followys of the slauchter monyfald Maid by Turnus and be Eneas bald.

Quhat God sall now me techyng to endite Sa mony wondis and this cairfull syte?10 Or quha me lern in metyr to declar Sa feill and diuers slauchteris as was thar, And gret deces of dukis in that sted, Our all the feildis strowyn lyggis ded, Quham euery ane sammyn hys curs abowt15 Now down bet Turnus, now Eneas stowt? O Jupiter, was it plesand to the, With sa gret motioun of crudelyte Athir pepill suld rusch on other in pres, Quhilkis eftir suldbe ane in etern pes?20 Eneas first, that tareit not to lang, Smate ane Sucron, a Rutilian strang; A grevous wond he hyt hym in the syde, Throw owt hys rybbys can the stif swerd glide, Persyt hys cost and breistis cundyt in hy, Thar as the fatale deth is maste hasty: This bargane first fermyt Troianys to stand,5 That langeir fled Turnus fra hand to hand. Tho Turnus has rencontyrit in the pres Amycus, and hys brother Diores, Quham, fra thar horssis on the grond doun bet, On fut in feild strangly he ombeset:10 And the formast with a lang stif speir Smate ded, and with a swerd the tother in feir, Syne baith thar hedis hakkit of in hy, And at his cart thame hyngis by and by, The blude tharfra dreippand, tursys away.15 The self stound Eneas at ane assay, Or ane onset, hes kyllit Tanaus, Talon also, and the stowt Cethegus; Syne, eftyr thame, he kyllyt in the pres The sad and ay sorofull Onytes,20 Renownyt of Thebes blude, and the ofspryng Discendyng down from Echion the kyng, And of hys moder born, Peridia. This othir chiftane, Turnus, killit twa, That brethir war, and owt of Lycia send,25 Appollois cuntre, Troianys to defend; And eftir thame ane Meneit hes he slane, A ȝong man that was born ane Archadane, That all his days evir hatit the melle, Bot all for nocht, for he most neid thus de:30 About the laik of Lern and fludis gray Hys craft was forto fyschyng euery day; A puyr cote hous he held, and buyr hym law; Rewardis of rich folkis war to hym onknaw; Hys fader eyrit and sew ane peys of feld,5 That he in hyregang held tobe his beild. And lyke as that the fyre war new vpbet, And in sum dry wydderit wod vpset, Baith heir and thar, at diuers partis seir, Amyd the sovndand buskis of lawrer;10 Or quhar the fomy ryveris, red on spait, Hurlys doun from the month a large gait, With hydduus bruyt and felloun fard atanys, Thar as thai ryn ourflowand all the planys; Ilkane distroys, wastis, and dryvis away15 All that thai fynd befor thame in the way: Na slawar baith this Turnus and Ene Hurlys and ruschis fers throw the melle. Now, now, the brethfull ire and felloun thocht Within thar myndis boldynnys all on flocht,20 And tha breistis, can na wys venquyst be, Now bristis full of greif and cruelte; Now lasch thai at with bludy swerdis brycht, Fortill mak wondis wyd in all thar mycht. The tane of thame, that is to knaw, Enee,25 Kyng Murranus, of anchestry maist hie, Sovndand the name of his forfaderis ald, Our all the clan of Latyn kyngis bald Observyt man by man onto his day, Furth of hys cart hes smyttyn quyt away,30 And bet hym doun onto the erd wyndslaucht, With a gret roik or quhirrand stane ourraucht; That this Murranus the renys and the thetis, Quharwith hys stedis ȝokkit war in thretis, Vndyr the quhelis hes do weltit doun;5 Quhar, as he lyggis in hys mortall swoun, Of hys awyn stedis abuf hym rap for rap The sterand hufis, stampand with mony clap, Ourtreddis and doun thryngis thar master law, And gan thar lordis hie estait mysknaw.10 And Turnus hes recontryt ane Hilo, That ruschand hurlit throw the melle tho, Full fers of muyd and austern of curage: Bot this Turnus, for all hys vassalage, At hys gilt halssettis a grundyn dart dyd thraw,15 That fixit throu hys helm the schaft flaw, Persand hys brane, quhill owt bruschit the blude. Nor thy rycht hand, Creteus, sa gude, Thou forcyast Greik, cumyn from Archad land, Mycht the deliuer from this ilk Turnus brand:20 Nor all hys goddis Cupencus in the plane Myght defend from Ene, com hym agane, Bot at hys breist with the steill poynt is met, That thirlyt hes throu all, and hym doun bet, That nother scheild nor obstant plait of steill25 This catyvis breist hes helpit neuir a deill. O Eolyn, the feildis Lawrentane Hes the behald tharon dovn bet and slane, And with thy braid bak in thy rich weid The grund thou hes byspred rycht far onbreid:30 Thar lyis thou ded, quham Gregioun ostis in fyght Nothir venquys nor to the erth smyte mycht, Nor fers Achilles to the grund couth bryng, That was ourquhelmar of kyng Pryamus ryng: Heir war thy methis and thy term of ded:5 The hous and famyll or the nobill sted Of thy kynrent stant vndir mont Ida, In the gret cyte of Lyrnessia; Bot in the feildis of Lawrentane sulȝe Thy sepultur is maid for ay tobe.10 Apon this wys the ostis and wardis haill On athir part returnyt in bataill, Aganyst othir to feght sammyn attanys, All the Latynys and alhaill the Troianys; Duke Mnestheus, and the stern Serestus,15 And, on the tother half, prynce Mesapus, That of gret hors the dantar clepit was, And with hym eik the stalwart Asylas, The Tyrreyn rowtis semblit all atanys, And kyng Evandrus army Archadianys:20 Euery man for hym self, as he best mycht, At the vtyrrans of all hys fors gan fyght. No rest nor tary was, thai so contend, Sum to confoundyng all, sum to defend.

Quhou Eneas segit the tovn agane, And queyn Amata hir self for wo has slayn.

At this tyme, the bargane induryng thus, Eneas moder, the farest dame Venus, Into hys mynd scho has put this entent, To hald onto the wallys incontinent, And steir hys ost the cyte till assay5 With hasty onset and suddane affray, At gret myscheif the Latynys to effeir, Quhilk of hys cummyng tho onwarnyt wer. And as at he held movyng to aspy Turnus throu syndry rowtis by and by,10 On euery syde he has castyn hys E; And at the last behaldis the cite, Saikles of batale, fre of all syk stryfe, But payn or travale, at quyet man and wyfe. Than of a grettar bargane in hys entent15 All suddanly the figour dyd imprent: He callys Mnestheus and eik Sergestus, Chiftanys of hys ost, and strang Serestus, And on a lytill mote ascendit in hy, Quhar sone forgadderit all the Troian army,20 And thik abowt hym flokkyng can, but baid; Bot nother scheld nor wapynnys doun thai laid. And he amyddis on the knollis hight Onto thame spak thus, herand euery wight: Heir I command no tary nor delay Be maid of my preceptis, quhat I sal say, Nor se that na man be sweir nor slaw to ryn; Till our hasty onset we will begyn, Sen Jupiter assistis onto our syde.5 Now harkis quhat I purpos do this tyde: This day I sal distroy and cleyn bet doun Of Lawrent haill the cite and the tovn, Quhilk is the caus of all our werying, And quyte confund the kyng Latinus ryng,10 Les than thai wil ressaue the bridill at hand, Be at obeysans, and grant my command; And ȝon hie turrettis, and tha toppis hie Of rekand chymnais ȝondir, as we se, I sal mak plane and equale with the grond.15 Quhat suld I tary or delay a stond, Abydand heir into sik plyte, quod he, Quhil Turnus lyst feght with ws in melle; Or quhil that he, ane other tyme agane Ourcum and venquyst into batale plane,20 May haue refuge to this tovn to releif, Syne eftir in feild vs recontyr and greif? O citeȝanys, the hed is this cite Of our weirfair, and cheif of iniquyte: Turs thiddir in hy the hait byrnand fyre brandis,25 And with the blesand flawmys in ȝour handis Renewys and requir agane, said he, The trety sworn and promyst ȝou and me. Quhen this was said, thai put thame in array, Togiddir all the cite tyll assay:30 Thai pyngill thraly quha mycht formest be With dowr myndis onto the wallys hie; Knyt in a sop, with gret pissans thai thrist The leddyrris to the wallys, or ony wist, And hasty fyre blesis dyd appeir.5 Sum otheris of the Troianys ruschit infeir Onto the portis, and the first thame met Hes kyllyt at the entre and doun bet: Sum otheris schutis dartis, takillis, and flanys, At thame quhilkis on the barmkyn hed remanys,10 That with the flycht of schaftis heir and thar Thai dyrknyt all the skyis and the air. Ene hym self with the formast can stand Vndyr the wallys, puttand to hys hand To the assalt, and with lowd voce on hie15 The kyng Latinus fast accusys he; Drawand the Goddys to wytnes, quhou agane He is constrenyt on fors to move bargane; And quhou at the Italianys, thus twys At syndry tymys, schew thame hys ennemys;20 And how falsly that day thai brokyn had The secund consideratioun sworn and maid. Amang the citeȝanys, into gret affray, Vprais discord in mony syndry way: Sum bad onclos the cite, and als fast25 Warp vp the portis, and wyde the ȝettis cast To the Troianys, and thar gret prynce Ene Ressaue as for thar kyng in the cite; Otheris start to thar wapynnys and thar geir, Forto defend thar tovn in feir of weir:30 As we may geif a symylitude, wail lyke Quhen that the hyrd hes fund the beys byke, Closit vnder a dern cavern of stanys, And fillit hes full sone that litill wanys With smoik of sowr and byttir rekis stew;5 The beys within, affrayt all of new, Ourthwort thar hyvis and walxy tentis rynnys, With mekill dyn and bemyng in thar innys, Scharpand thar stangis for ire, as thai wald fycht: Swa heir, the laithly odor rais on hycht10 From the fyre blesis, dyrk as ony roik, That to the ruffis toppys went the smoik; The stanys warpit in fast dyd rebund, Within the wallis rays gret bruyt and sound, And vp the reik all void went in the air,15 Quhar as na tenementis stud nor howsis war. Betyd alsso to thir wery Latynys, Quhilk so irkit at sik myscheif and pyne is, Ane chance of mysfortoun, that all the tovn With womentyng straik to the boddum doun.20 For as the queyn Amata saw syk wys The cyte ombeset with ennemys, The wallys kyndlyt be with flambys heit, The fyre blesis abuf the ruffis gleyt, Na Turnus army cumand thame aganys,25 Nor ȝit nane ostis of Rutilianys; Scho, full onhappy, in the batell sted Wenyt ȝong Turnus feghtand had bene ded: And tho for verray sorow suddanly, Hyr mynd trublit, gan to rame and cry,30 Scho was the caus and wyte of all this greif, Baith crop, and ruyte, and hed of sik myscheif; And in hir dolorus fury thus myndles, All enragit for duyll tho dyd expres Full mony a thing, and reddy to de with all5 Rent with hir handis hyr purpour weid ryall, And at ane hie balk teyt vp scho has With a lowp knot a stark cord or a las, Quharwith hir self scho spilt by schamefull ded. And fra the Latyn matronys, will of red,10 Persavit hes this vile myschewos wraik, Thai rent thar hair, with harrow, and allaik! Hyr douchter first besyde the ded corps standis, Ryvand hyr gyltyn tressys with hir handis, Hyr rosy chekis to tor and scartis sche:15 Than all the laif, that piete was to se, Of ladeis that about the ded corps stud, Rentis and ruggis thame self as thai war wod, That of thar gowlyng, greting, and deray, The large hald resundis a far way,20 Quhil from the kyngis palyce inveroun Dywlgat went and spred our all the tovne The fey onhappy fame of sik a deid; Than euery wight tynt hart for wo and dreid. With habyt rent kyng Latyn on the gait25 Walkis wobegone, astonyst of the fait Of hys deir spous, and of the cite syne, That semyt brocht onto fynall ruyne: Hys canos hair, sair movit in hys entent, With onclene puldyr has he all bysprent,30 And mony tymys hym selvyn hes accusyt, That he sa lang had lachit and reffusyt To ressaue glaidly the Troiane Ene; Repentyng sair, for weill of the cyte, That he had nocht requirit hym, and draw5 Or than tobe his mawche and son in law.

The quenys deces fra Turnus cleirly wist, Went to the sege Eneas to resist.

In the meyn tyme, as weriour vnder scheild, Turnus ȝond at the far part of the feld A few menȝe persewand our the plane, Quhilk at the stragill fled in all thar mayn,10 Sum deill or than walxis dolf this syre, Seand his horssis begyn to sowpe and tyre; That euer the les and les joyus was he Of thar renkis and gait throu the melle. Tharwith the wynd and sowchquhyng of the air15 This feirfull clamour brocht to hym rycht thar, Mixt with oncertane terrour and affeir; The confusioun of sovnd smait in hys eyr, Com from the cyte, of felloun murmuryng, Rycht onglaid bruyt of cayr and womentyng.20 Ha, ways me! he said, quhat may this be? Quhou beyn the wallys trublit of this cite With so gret duyll and sorrow as I heir? Or quhou thus ruschis so felloun noys and beir And clamour from the tovn at euery part? Thus has he said, and can do stynt his cart, And all enragit tyt the renȝeis abak.5 Quhamto his sistir tho Juturna spak, As scho that was turnyt, as I said air, In semlant of Metiscus the cartar, That horssis, renȝeis, syd rapis, and cart, dyd sche Rewle and direct amydwart the melle;10 With sic wordis scho ansueris hym fute hait: Turnus, lat ws persew Troianys this gait, Quhar victory ws schawis the reddy way; Thar beyn enew otheris, be my fay, Forto defend and weill manteym the tovn.15 Ȝon is Eneas makis the brute and sovn, That can invaid Italianys, as ȝe heir, Mydlit in batale on sik feir of weir. Tharfor lat ws with cruell hand in this sted Lay als feill corpsis of the Troianys ded;20 For with na les numbir slane vnder scheild, Nor les honour, sall thou wend of the feild. Turnus answeris; O thou my sistyr deir, I knew full weill at it was thou, langere, That be thi craft and quent wylis sa sle25 Our consideratioun trublit and trete, And entrit in this batell quhilk thou wrocht: And now, Goddes, thy wylis ar all for nocht. Bot quha was that send the from hevyn so scheyn, So huge sturt and travell to susteyn?30 Quhidder gif thou com to that entent to se The cruell deth of thy fey brother? said he: Quhat sall I do, lat se; quhar sall I now? Or quhat succurs promittis fortoun, and quhou? I saw myself befor myne eyn langere5 Gret Murranus, quham nane mair leif and deir Onto me was that levand is this day, Swelt on the grund, and with lowd voce, perfay, On me dyd call, quhar as he lay onsound At erth discomfyt with ane grisly wond:10 And lo, doun bet and slane in hys defens Is not alsso the stowt capitane Vfens, That he suld not our lak and schame behald? Hys corps and armour doys Troianys baith withhald. Sail I als suffir thame doun the cyte dyng?15 Of our myscheif thar restis bot that a thing: Nor sall I not with this rycht hand in hy Confund schir Drances langage onworthy? Sail evir this grund behald or se sik lak, That I sall fle, or Turnus gif the bak?20 Is it all owt sa wrachit thing to de, That, or thai stervyn, men suld rathar fle? Ȝhe Manes, clepit Goddis infernal, Beis to me frendly now, sen that all The Goddis myndis abuf ar me contrar;25 Be ȝhe benevolent quhen that I cum thar: Ane haly saule to ȝou discend sall I, Saikles of all sic cryme or villany, Na wys onworthy namyt forto be With my eldris and forfaderis mast hie.30 Scars hes he said, quhen, lo, throu the plane Ruschand amyd hys fays, com hym agane Ane Sages, montit on a fomy steid; And he was wondit sair, and gan to bleid, In the face with ane arrow vndir the E,5 Cryand, help, Turnus, be his name, quhar is he? Turnus, quod he, in the and thy twa handis The extreme help and lattir weilfar standis: Haue reuth and piete of thyne awin menȝe. Now, as the thundris blast, faris Ene10 In bargane, so enragit he doith mannays The cheif cyte of Italy doun to arrays, And into fynal ruyne to bet doun The principall palyce and all the ryall tovn; And now onto the thak and ruffis hie15 The flambys and the fyre blesys doys fle. In the thar wltys, in the thar eyn, but faill, The Latyn pepill dressyt hes alhaill: The kyng hym self Latinus, the gret heir, Quhispyris and musys, and is in maner seir20 Quham he sall cheis or call, into this thraw, Tobe hys douchteris spous, and son in law, Or to quhat frendschip or allyans fyne Is best hym selwyn at this tyme inclyne. And forthirmore, Amata the fair queyn,25 Quhilk at all tymys thyne afald frend has bene. With hir awyn hand doith sterve, now liggand law, And for affray hir self hes brocht of daw. Only Mesapus and Atynas keyn At the portis doys the stour susteyn:30 Abowt thir twa on athir syde thik standis Arrayt rowtis, with drawyn swerdis in handis, Full horribill and austern athir barnage, Cled in steill weid with wapynnys, man and page; And thou, thus rollyng furth thy cart bedene,5 Walkis at avantage on the void grene. Turnus astonyst stude dum in studeyng, Smyt with the ymage of mony diuers thyng: Deip in hys hart boldynnys the felloun schame, All mixt with dolour, angyr, and defame;10 Syne fervent luf hym catchit in fury rage, And hys bykend hardyment and curage. As first the schaddois of pertrublans Was dryve away, and hys rememberans The lycht of ressoun has recoverit agane,15 The byrnand sycht of baith his eyn twane, Sore aggrevit, towart the wallys he kest, And from hys cart blent to the cyte prest. Bot lo, a sworll of fyre blesys vpthraw! Lemand towart the lyft the flambe he saw,20 Amang the plankis and the loftis schire Stremand and kyndland fast the hoyt fyre, That caucht was in a mekill towr of tre; Quhilk towr of sillys and gestis gret belt he, And thar vnder, to roll it, quhelis set,25 With staris hie and batelling weirly bet. Now, now, systir, quod he, lo all and sum The fatis has vs venquyst and ourcum: Desist tharfor to mak me langar tary; Lat ws follow that way, and thiddir cary,30 Quhar God and this hard fortoun callys me. Now standis the poynt, I am determyt, quod he, Eneas hand for hand fortill assaill; Now standis the poynt, to suffir in bataill The bittir ded and all paynfull distres:5 No langar, sistir germane, as I ges, Sall thou me se schamefull onworthy wight. Bot, I beseik the, manly as a knycht Into this fervent furour suffir me To go enragit to batale, or I de.10 Thus has he said, and from the cart in hy Apon the land he lap deliuerly, And left his sistir trist and dissolate; Thrist throu hys fays and wapynnys all, fute hait, And with sa swift fard schot throu the melle15 That the myd rowtis and wardis schuddris he. And like as the gret roch crag with a sovn From the top of sum montane tumlyt doun, Quhen at it is our smyt with wyndis blast, Or with the drumly schowris spait doun cast,20 Or than be lang proces of mony ȝheris Lowsyng tharfra the erd, and away weris, Is maid to fall and tumbill with all his swecht, Lyke till a wikkit hill of huge weght, Halding his fard the discens of the bra25 With mony skyp and stend baith to and fra, Quhill that he schut far on the plane grund, And all that he ourrekis doith confund; Woddis, heyrdis, flokkis, catale, and men, Our welterand with hym in the deip glen:30 Towart the wallys Turnus ruschit als fast Throw owt the rowtis, by hys fard doun cast, Quhar tho the grund wet and bedyit stude A weill far way with effusioun of blude, And large on breid the skyis and the ayr5 For schaftis schot dyd quhissilling heir and thar: A bekyn with hys hand to thame maid he, And sammyn eik with lowd voce cryis; lat be! Stynt, ȝhe Rutilianys, se ȝhe feght na mair, And, ȝhe Latynys, ȝour dartys castyng spar;10 Quhou evir the fortoun standis at this tyde, The chance is myne, the fait I mon abyde. It is mair just and equale I allane For ȝou sustene the payn was ondertane, And purge the cryme, so happynnyt now of lait,15 Of this consideratioun violate: Lat me stand to my chans, I tak on hand Forto derene the mater with this brand. Than euery man amydward thame betwene Can draw abak, and maid rovm on the greyn.20