Note 233 — CAPITOLO CLVIII. Scienze morali e filosofiche. Economia. Storia.
Reading edition
Heic ego te appello, veneranda prædite mente, Ingenium cujus obscuri infamia sæcli Non tetigit, et vox non est suppressa strepenti Murmure stultorum, generose Copernice, cujus Pulsarunt nostram teneros monumenta per annos Mentem, cum sensu ac ratione aliena putarem, Quæ manibus nunc attrecto teneoque reperta, Posteaquam in dubium sensim vaga opinio vulgi Lapsa est, et rigido reputata examine digna, Quantumvis Stagyrita meum noctesque diesque Græcorum cohors, italumque, arambumque sophorum Vincirent animum, concorsque familia tanta; Inde ubi judicium, ingenio instigante, aperiri Cœperunt veri fontes, pulcherrimaque illa Emicuit rerum species (nam me Deus altus Vertentis sæcli melioris non mediocrem Destinat, haud veluti media de plebe ministrum), Atque ubi sanxerunt rationum capere veri Conceptam speciem, facilis natura reperta; Tum demum licuit quoque posse favore Mathesis Ingenio partisque tuo rationibus uti, Ut tibi Timei sensum placuisse libenter Accepit, Agesiæ, Nicetæ, Pythagoræque.