Note 473 — I. USI NUZIALI VENETI (Raccolti da Dom. Giuseppe Bernoni).
Reading edition
Sfoglio la mia raccolta edita ed inedita dei Canti popolari, ed omettendo ogni commento, riporto i seguenti:
No vogio più garofoli in pitèri E gnanca far l'amor co marineri; I marineri spuzza da catrame: Tute le pute i fa morir da fame. Tuti sti marineri, quando piove, Tira la paga e ghe ne magna nove; Tuti sti marineri, co' è bon tempo, Tira la paga e ghe ne magna çento. Done, no ghe ste' crede a marineri: I xe gelosi e pieni de sospeto; 'Na cossa sola mi ve vogio dir: 'Na note a l'ano i dorme sul so leto. Tuti me dise: Bela, no lo tor Lo mariner, chè 'l te farà morire; Se el me farà morir, e cussì sia: Sposar lo vogio, el xe l'anima mia. No vogio nè limoni, nè naranze, E gnanca pescaori cole calze; No vogio nè limoni, nè çedroni, E gnanca pescaori coi calzoni. Ti credi d'esser nata 'na regina! De un pescaor no ti te vol degnare; E ti te degnarà d'un fornareto, Ch'el te portarà el pan co'l fazzoleto. No vogio un pescaor che sa da pesse; Nè manco un ortolan che va sui orti; Nè manco un mariner che va in marina: Ma vogio un bel mercante da farina. Pute, no fe' l'amor co calegheri! I calegheri ga 'na trista fama; I calegheri ga 'na trista fama, Che tuto quel che i ciapa i se lo fragia. No vogio nè garofoli, nè fiori, E gnanca far l'amor co servitori; I servitori toca come i gati, La sera e la matina i lica i piati.