Note 524 — CAPITOLO VIII. Giulio Cesare.

Quant li païs d'Espagne fu trestoz aquitez Et que Cesar ot touz ses anemis matez Et as autres se fu si en pais racordez Que de nului ne fu guerroiez ne grevez Lors est li ber à Rome en joie retornez; Si fu donc receuz à Rome et honorez Del ator du triomphe qui li fu presentez Li triomphes cest ce qu'ainçois qu'il fust entrez En Rome la cité contre lui est allez Et li poeples de Rome et trestouz li ber nez. Et si li fu un chars contre lui amenez Qui toz estoit d'argent et d'or enluminez, Et IIII blanch chevaus i avoit acouplez Que por traire le char i avoit ajoustez. Et quant Cesar li ber fu vestus et parez A vesteure d'or sor le char est montez Et toz les poeples iert entor lui ajoustez. Ensi com coustume iert Cesar lor a contez Les estors qu'il a fais, ces a briement nomez Les barons et les princes que il avoit matez, Et les païs aussi qu'il avoit conquestez; Et quant iço lor ot conté briement assez Lors fu de tot le poeple hautement saluez, Et princes et poissans hautement apelez. S'ot entor lui granz chans et granz deduiz menez, Si ot timbres, tabors, cors et flaioz sonnez. Si en est parmi Rome en tel guise passez Tant qu'au maistre palais de Rome est arestez, Et lors descent du char, si monte les degrez Dou palais principal qui de marbre est pavez. Et quant enz el palais ot trestoz assemblez Les barons de la cit, granz dons lor a donez Si a terres et fiez as plusors divisez; Et adonc fu Cesar esluz et eslevez, A empereur fu de Rome couronez. S'ot donc li ber emplies ses pluseurs volontez Por que de Rome fu emperere apelez.