Note 30 — Chapter III · THE LAST ROMAN SCHOOLS AND THE COMPENDS (FIFTH TO SEVENTH CENTURIES)
Reading edition
Quidam ab Arvernis Belgicam petens ... postquam Remos advenerat, scribam tuum sive bybliopolam pretio fors fuat officione demeritum copiosissimo velis nolis declamationum tuarum schedio emunxit. Qui redux nobis ... curæ mihi ... cuncta transcribere. Omnium assensu pronuntiatum pauca nunc posse similia dictari. Etenim rarus aut nullus est cui meditaturo par affatim assistat dispositio per causas, positio per litteras, compositio per syllabas; ad hoc oportunitas in exemplis fides in testimoniis, proprietas in epithetis urbanitas in figuris, virtus in argumentis pondus in sensibus, flumen in verbis fulmen in clausulis. Structura vero fortis et firma coniunctionumque perfacetarum nexa cæsuris insolubilibus, sed nec hinc minus lubrica et levis ac modis omnibus erotundata quæque lectoris linguam inoffensam decenter expediat, ne salebrosas passa iuncturas per cameram palati volutata balbutiat; tota denique liquida prorsus et ductilis, veluti cum crystallinas crustas aut onychitinas non impacto digitus ungue perlabitur ... non extat ad præsens vivi hominis oratio quam peritia tua non sine labore transgredi queat ac supervadere. IX. vii. 1-4.