Note 95 — Chapter V
Reading edition
"Balbisonem post relatam jurisprudentiæ lauream redeuntem Brixiam Nicolaus secutus est, cæpitque ex Mathematicis gloriam sibi ac divitias parare, æque paupertatis impatiens, ac fortunæ melioris cupidus, quam dum Brixiæ tuetur, homo morosæ, et inurbanæ rusticitatis prope omnium civium odia sibi conciliavit. Quamobrem alibi vivere coactus, varias Italiæ urbes incoluit, ac Ferrariæ, Parmæ, Mediolani, Romæ, Genuæ, arithmeticam, geometricam, ceteraque quæ ad Mathesim pertinent, docuit; depugnavitque scriptis accerrimis cum Cardano ac sibi ex illis quæsivit nomen et gloriam. Tandem domicilium posuit Venetiis, ubi non a Senatoribus modo, ut mos Venetus habet eruditorum hominum studiosissimus, maximi habitus est, at etiam a variis Magnatum ac Principum legatis præmiis ac muneribus auctus sortem, quam tamdiu expetierat visus sibi est conciliasse. Ergo ratus se majorem, quam ut a civibus suis contemneretur, Brixiam rediit, ubi spe privati stipendii Euclidis elementa explanare cœpit; sed quæ illum olim a civitate sua austeritas, rustica, acerba, morosa, depulerat, eadem illum in eum apud omnes contemptum, et odium iterum dejicit, ut exinde horrendus ac detestabilis omnibus fugere, atque iterum Venetias confugere compulsus fuerit. Ibi persenex decessit."—Papadopoli, Hist. Gymn. Pata., ii. p. 210.