Note 373 — Chapter III
Reading edition
In quo Antonium Nebrissensem socium habuit, qui tamen quicquid usquam Græcarum literarum apud Hispanos esset, ab uno Aria emanâsse in præfatione suarum Introductionum Grammaticarum ingenue affirmavit. His duobus amplissimum illud gymnasium, indeque Hispania tota debet barbariei, quæ longo apud nos bellorum dominatu in immensum creverat, extirpationem, bonarumque omnium disciplinarum divitias. Quas Arias noster ex antiquitatis penu per vicennium integrum auditoribus suis larga et locuplete vena communicavit, in poetica facultate Græcanicaque doctrina Nebrissense melior, a quo tamen in varia multiplicique doctrina superabatur. Bibl. Vetus.