Note 1126 — Chapter XIII · (continued 2)

Respublica Jurisconsultorum, p. 237. Intactum in jurisprudentia reliquit nihil, et quæ scribit, non tam ex aliis excerpta, quam a se inventa, sane fatentur omnes; ita omnia suo loco posita, non nimis protracta, quæ nauseam creant, non arcte ac jejune tractata, quæ explicationis paullo diffusioris pariunt desiderium. Candida perspicuitate brevis, elegans sub amabili simplicitate, caute eruditus, quantum patitur occasio, ubique docens, ne aliqua parte arguatur otiosus, tam nihil habet inane, nihil inconditum, nihil curtum, nihil claudicans, nihil redundans, amœnus in Observationibus, subtilis in Tractatibus, uber ac planus in Commentariis, generosus in refellendis objectis, accuratus in confingendis notis, in Paratitlis brevis ac succi plenus, rectus prudensque in Consultationibus.