Note 86 — Chapter I

Got ist ein luter guot an ime selben, vnt do von wil er nienen wonen denne in einer lutern sele: in die mag er sich ergiessen vnt genzeclichen in si fliessen. was ist luterkeit? das ist das sich der mensche gekeret habe von allen creaturen, vnt sin herce so gar uf gerichtet habe gen dem lutern guot, das ime kein creature trœstlichen si, vnt ir ouch nit begere denne als vil als si das luter guot, das got ist, darinne begriffen mag. vnt also wenig das liechte ouge icht in ime erliden mag, also wenig mag diu luter sele icht an ir erliden keine vermasung vnt das si vermitlen mag. ir werdent alle creaturen luter ce niessen: wanne si niusset alle creaturen in got vnt got in allen creaturen. Denne si ist also luter, das si sich selben durschowet, denne endarf si got nit verre suochen: si vindet in ir selben, wanne si in ir natiurlichen luterkeit ist geflossen in das übernatiurliche der lutern gotheit. vnt also ist si in got, vnt got in ir; vnt was si tuot, das tuot si in got, vnt tuot es got in ir.—Wackernagel, p. 891.