Note 110 — Chapter IV

"Les vagues les arracherent tous les vns aprés les autres de la chalouppe, qui flottoit renuersée contre vne roche. Monsieur de Sauigny seul se ietta à l'eau et nagea parmy des flots et des vagues qui resembloient à de petites montagnes. La Chalouppe n'estoit pas bien loin du riuage; mais il estoit nuict toute noire, et faisoit vn froid aspre, qui auoit desia glacé les bords de la riuiere. Le dit sieur de Sauigny, sentant le cœur et les forces qui luy manquoient, fit vn vœu à Dieu, et peu aprés frappant du pied il sent la terre, et se tirant hors de l'eau, s'en vint en nostre maison à Sillery à demy mort. Il demeura assez long-temps sans pouuoir parler; puis enfin il nous raconta le funeste accident, qui outre la mort de Monsieur Nicollet, dommageable à tout le pays, luy auoit perdue trois de ses meilleurs hommes et vne grande partie de son meuble et de ses prouisions. Luy et Mademoiselle sa femme ont porté cette perte signallée dans vn pays barbare, auec vne grande patience et resignation à la volonté de Dieu, et sans rien diminuer de leur courage."—Vimont, Relation, 1643, p. 4.