Note 37 — Chapter VI
Reading edition
Hor. Donec gratus eram tibi, Nec quisquam potior brachia candidæ Cervici juvenis dabat; Persarum vigui rege beatior. Lyd. Donec non aliam magis Arsisti, neque erat Lydia post Chloen; Multi Lydia nominis Romanâ vigui clarior Iliâ. Hor. Me nunc Thressa Chloe regit, Dulceis docta modos, et citharæ sciens; Pro qua non metuam mori, Si parcent animæ fata superstiti. Lyd. Me torret face mutuâ Thurini Calaïs filius Ornithi; Pro quo bis patiar mori, Si parcent puero fata superstiti. Hor. Quid, si prisca redit Venus, Diductosque jugo cogit aheneo? Si flava excutitur Chloe, Rejectæque patet janua Lydiæ? Lyd. Quamquam sidere pulchrior Ille est, tu levior cortice, et improbo Iracundior Hadriâ; Tecum vivere amem, tecum obeam libens. Hor. l. 3, Od. 9.