Note 21 — Chapter IV
Reading edition
Witness the attempt of a translator of no ordinary ability.
Pulchra mari, crocea surgens in veste, per omnes Fundebat sese terras Aurora: deorum Summo concilium cœlo regnator habebat. Cuncta silent: Solio ex alto sic Jupiter orsus. Huc aures cuncti, mentesque advertite vestras, Dîque Deæque, loquar dum quæ fert corde voluntas, Dicta probate omnes; neve hinc præcidere quisquam Speret posse aliquid, seu mas seu fœmina. Siquis Auxilio veniens, dura inter prælia, Troas Juverit, aut Danaos, fœde remeabit Olympum Saucius: arreptumve obscura in Tartara longè Demittam ipse manu jaciens; immane barathrum Altè ubi sub terram vasto descendit hiatu, Orcum infra, quantum jacet infra sidera tellus: Ære solum, æterno ferri stant robore portæ. Quam cunctis melior sim Dîs, tum denique discet. Quin agite, atque meas jam nunc cognoscite vires, Ingentem heic auro e solido religate catenam, Deinde manus cuncti validas adhibete, trahentes Ad terram: non ulla fuat vis tanta, laborque, Cœlesti qui sede Jovem deducere possit. Ast ego vos, terramque et magni cœrula ponti Stagna traham, dextra attollens, et vertice Olympi Suspendam: vacuo pendebunt aëre cuncta. Tantum supra homines mea vis, et numina supra est. Ilias Lat. vers. express. a Raym. Cunighio, Rom. 1776.