Note 325 — DE LA LITTÉRATURE DES NÈGRES.
Reading edition
Note 325:
(retour)
Integerrimo et fortissimo viro Georgio Haldano, armigero, Insulae Jamaicensis gubernatori; Cui, omnes morum, virtutumque dotes bellicarum, In cumulum accesserunt. CARMEN. Denique venturum fatis volventibus annum, Cuncta per extensum læta videnda diem, Excussis adsunt curis, sub imagine clara Felices populi, terraque lege virens. Te duce, quæ fuerant male suada mente peracta Irrita conspectu non reditura tuo. Ergo omnis populus, nec non plebecula cernet Hæsurum collo te relegasse jugum, Et mala, quæ diris quondam cruciatibus, insons Insula passa fuit; condoluisset onus, Ni victrix tua Marte manus prius inclyta, nostris Sponte ruinosis rebus adesse velit. Optimus es servus regi servire Britanno, Dum gaudet genio scotica terra tuo: Optimus heroum populi fulcire ruinam; Insula dura superest ipse superstes eris. Victorem agnoscet te Guadaloupa, suorum Despiciet merito diruta castra ducum. Aurea vexillis flebit jactantibus Iris, Cumque suis populis, oppida victa gemet. Crede, meum non est, vir Marti chare, Minerva Denegat Æthiopi bella sonare ducum. Concilio, caneret te Buchananus et armis, Carmine Peleidæ, scriberet ille parem. Ille poeta, decus patriæ, tua facta referre Dignior, altisono vixque Marone minor. Flammiferos agitante suos sub sole jugales Vivimus; eloquium deficit omne focis. Hoc domum accipias multa fuligine fusum Ore sonaturo; non cute, corde valet. Pollenti stabilita manu, Deus almus, eandem Omnigenis animam, nil prohibente dedit. Ipsa coloris egens virtus, prudentia; honesto Nullus inest animo, nullus in arte color. Cur timeas, quamvis, dubitesve, nigerrima celsam Cæsaris occidui, scandere musa domum? Vade salutatum, nec sit tibi causa pudoris, Candida quod nigra corpora pelle geris! Integritas morum Maurum magis ornat, et ardor Ingenii, et docto dulcis in ore decor; Hunc, mage cot sapiens, patriæ virtutis amorque, Eximit è sociis, conspicuumque facit. Insula me genuit, celebres aluere Britanni Insula, te salvo non dolitura patre. Hoc precor ô nullo videant te fine regentem Florentes populos, terra, deique locus!