Note 299 — NOTA DELL’EDITORE.
Reading edition
Si decus Italiæ, si nostræ gloria Gentis Infixa est animo, Lector, honosque tuo, Si gesta Heroum monumento digna perenni Vera tibi præbent gaudia, siste gradum. Hic tres atque decem Galli, pariterque Latini, Ob laudis stimulum, conseruere manus, Congressique pares numero, et florentibus annis, Attamen haud similes viribus, atque animo. Hoc campo certatum est ferro, hic Gallica Pubes Experta est nostras in sua damna manus. Prosiluere omnes in pugnam audacter utrimque, Sed non pugnatum Marte, manuque pari. Virtuti Italicæ jactantia Gallica cessit, Armaque Victori tristis, equosque dedit, Captivisque ad Barulum ductis ad vespera, tota Nocte Urbs festivis plausibus obstrepuit. Fama perennis erit præclaræ, et gloria pugnæ, Italia æternum quæ resonabit io.