Note 397 — QUARRELS OF AUTHORS; (continued 4)
Reading edition
“Verum enimverò de his et hoc genere hominum ne verbum amplius addam, tabellam tamen summi illius artificis Apellis, cùm colorum vivacitate depingere non possim, verbis leviter adumbrabo et proponam, ut Antiphilus noster, suique similes, et qui calumniis credunt, hanc, et in hac seipsos semel simulque intueantur.
“Ad dextram sedet quidam, quia credulus, auribus prælongis insignis, quales ferè illæ Midæ feruntur. Manum porrigit procul accedenti Calumniæ. Circumstant eum mulierculæ duæ, Ignorantia ac Suspicio. Adit aliunde propiùs Calumnia eximiè compta, vultu ipso et gestu corporis efferens rabiem, et iram æstuanti conceptam pectore præ se ferens: sinistra facem tenens flammantem, dextra secum adolescentem capillis arreptum, manus ad superos tendentem, obtestantemque immortalium deorum fidem, trahit. Anteit vir pallidus, in specium impurus, acie oculorum minimè hebeti, cæterùm planè iis símilis, qui gravi aliquo morbo contabuerunt. Hic livor est, ut facilè conjicias. Quin, et mulierculæ aliquot Insidiæ et Fallaciæ ut comites Calumniam comitantur. Harum est munus, dominam hortari, instruere, comere, et subornare. A tergo, habitu lugubri, pullato, laceroque Pœnitentia subsequitur, quæ capite in tergum deflexo, cum lachrymis, ac pudore procul venientem Veritatem agnoscit, et excipit.”