Note 199 — VII. MONACHISM.
Reading edition
Piget dicere quot quotidie virgines ruant, quantas de suo gremio mater perdat ecclesia: super quæ sidera inimicus superbus ponat thronum suum; quot petras excavet et habitet coluber in foraminibus earum. Videas plerasque viduas antequam nuptas, infelicem conscientiam mutata tantum veste protegere. Quas nisi tumor uteri, et infantum prodiderit vagitus, sanctas et castas se esse gloriantur, et erecta cervice et ludentibus pedibus incedunt. Aliæ vero sterilitatem præbibunt, et necdum sati hominis homicidium faciunt. Nonnullæ cum se senserint concepisse de scelere, abortii venena meditantur, et frequenter etiam ipsæ commortuæ, trium criminum reæ, ad inferos producuntur, homicidæ suæ, Christi adulteræ, necdum nati filii parricidæ—Hieron. Epist. XXII. ad Eustoch. c. 5.