Note 330 — Chapter VII

Mentem nullis imaginibus depictam habeat: nam si corde mundus et ab universis imaginibus liber esse cupit, nil penitus cum amore possidere, nulli homini per voluntarium affectum singulari familiaritate, nullius ipsi, adhærere debet. Omnis namque familiaritas aut conversatio pure propter Dei amorem non inita, variis imaginibus inficit et perturbat hominum mentes, cum non ex Deo, sed ex carne originem ducat. Quisquis in virum spiritualem et divinum proficere cupit, is, carnali vitâ penitus renunciata, Deo soli amore adhæreat eundemque interiori homine suo peculiariter possideat, quo habito mox omnis multiplicitas, omnes imagines, omnis inordinatus erga creaturas amor fortiter ab eo profligabuntur; Deo quippe per amorem intus possesso protinus ab universis homo imaginibus liberatur. Deus spiritus est, cujus imaginem nemo proprie exprimere aut effigiare potest. Thaulerus flor. p. 79, 80.